Святое Дабравесце (па Беларуску) пераклад Бiблейскай камiсii БПЦ МП

Святое Дабравесце паводле Матфея

◄◄ | ◄ | Глава ⚫ | ► | ►►

¹ Убачыўшы люд, Ён узышоў на гару; і калі сеў, прыступілі да Яго вучні Ягоныя.

² I, адкрыўшы вусны Свае, Ён вучыў іх, кажучы:

³ Блажэнныя ўбогія духам, бо іх ёсць Царства Нябеснае.

⁴ Блажэнныя тыя, што плачуць, бо яны суцешацца.

⁵ Блажэнныя лагодныя, бо яны ўспадкуюць зямлю.

⁶ Блажэнныя тыя, хто жадае і прагне праўды, бо яны спатоляцца.

⁷ Блажэнныя міласэрныя, бо яны памілаваны будуць.

⁸ Блажэнныя чыстыя сэрцам, бо яны Бога ўбачаць.

⁹ Блажэнныя міратворцы, бо яны сынамі Божымі назавуцца.

¹⁰ Блажэнныя гнаныя за праўду, бо іх ёсць Царства Нябеснае.

¹¹ Блажэнныя вы, калі будуць вас ганьбіць і гнаць і ўсякім словам ліхім несправядліва зневажаць за Мяне.

¹² Радуйцеся і весяліцеся, бо ўзнагарода ваша вялікая на нябёсах: так гналі прарокаў, што былі перад вамі.

¹³ Вы - соль зямлі. Калі ж соль страціць сілу, то чым паправіць яе? Яна ўжо ні на што не прыдатная, хіба што выкінуць яе прэч на патаптанне людзям.

¹⁴ Вы - святло свету: не можа схавацца горад, які стаіць на гары.

¹⁵ І запаліўшы свечку, не ставяць яе пад пасудзінаю, а на падсвечніку, і свеціць усім, хто ў доме.

¹⁶ Так няхай свеціць святло ваша перад людзьмі, каб яны бачылі вашыя добрыя ўчынкі і ўслаўлялі Айца вашага, Які ёсць у нябёсах.

¹⁷ Не думайце, што Я прыйшоў парушыць закон, альбо прарокаў: не парушыць прыйшоў Я, а здзейсніць.

¹⁸ Бо праўду кажу вам: пакуль не мінецца неба і зямля, ані ёта адна, ані рыска адзіная не мінецца з закона, пакуль не збудзецца ўсё.

¹⁹ Дык вось, хто парушыць адну з запаведзяў гэтых найменшых і навучыць гэтак людзей, той найменшым назавецца ў Царстве Нябесным; а хто выканае і навучыць, той вялікім назавецца ў Царстве Нябесным.

²⁰ Бо, кажу вам, калі праведнасць ваша не перавысіць праведнасці кніжнікаў і фарысеяў, дык не ўвойдзеце вы ў Царства Нябеснае.

²¹ Вы чулі, што сказана продкам: "Не забівай; а хто заб'е, падпадае суду".

²² А Я кажу вам, што кожны, хто гневаецца на брата свайго марна, падпадае суду; хто ж бо скажа брату свайму "рака", падпадае сінедрыёну; а хто скажа "неразумны", падпадае геене вогненнай.

²³ Дык вось, калі ты прынясеш дар твой да ахвярніка і ўспомніш там, што брат твой мае нешта супроць цябе,

²⁴ пакінь там дар твой перад ахвярнікам, і ідзі спярша памірыся з братам тваім, і тады прыйдзі і прынясі дар твой.

²⁵ Мірыся з праціўнікам тваім хутчэй, пакуль ты яшчэ ў дарозе з ім, каб не аддаў цябе праціўнік суддзі, а суддзя не аддаў цябе слузе, і не кінулі цябе ў цямніцу;

²⁶ праўду кажу табе: не выйдзеш адтуль, пакуль не аддасі апошняга кадранта.

²⁷ Вы чулі, што сказана продкам: "Не чыні пералюбу".

²⁸ А я вам кажу, што кожны, хто глядзіць на жанчыну з пажадаю, ужо ўчыніў пералюб з ёю ў сэрцы сваім.

²⁹ Калі ж правае вока тваё спакушае цябе, вырві яго і кінь ад сябе; бо лепей табе, каб загінуў адзін з членаў тваіх, а не ўсё цела тваё было ўкінута ў геену.

³⁰ І калі правая твая рука спакушае цябе, адатні яе і кінь ад сябе; бо лепей табе, каб загінуў адзін з членаў тваіх, а не ўсё цела тваё было ўкінута ў геену.

³¹ Сказана таксама, што, калі хто развядзецца з жонкаю сваёю, няхай дасць ёй разводны ліст.

³² А Я вам кажу: кожны, хто разводзіцца з жонкаю сваёю, акрамя як з прычыны распусты, той даводзіць яе да пралюбадзейства; і хто ажэніцца з разведзенай, той пралюбадзейнічае.

³³ Зноў жа чулі вы, што сказана продкам: "Не давай ілжывай прысягі, а выконвай перад Госпадам прысягі твае".

³⁴ А Я вам кажу: не прысягай зусім: ні небам, бо яно - Прастол Божы;

³⁵ ні зямлёю, бо яна падножжа нагам Яго; ні Іерусалімам, бо ён горад Вялікага Цара;

³⁶ ні галавою тваёю не прысягай, бо не можаш ніводнай валасінкі зрабіць белаю альбо чорнаю.

³⁷ А няхай будзе слова ваша: "так - так", "не - не"; а што звыш гэтага, тое ад ліхога.

³⁸ Вы чулі, што сказана: "Вока за вока, і зуб за зуб".

³⁹ А Я кажу вам не працівіцца злому. А калі хто цябе ўдарыць па правай шчацэ тваёй, падстаў яму і другую;

⁴⁰ і калі хто захоча судзіцца з табою і ўзяць у цябе сарочку, аддай яму і вопратку;

⁴¹ і калі хто цябе змусіць ісці з ім адно попрышча, ідзі за ім два.

⁴² Таму, хто просіць у цябе, дай і ад таго, хто хоча пазычыць у цябе, не адварочвайся.

⁴³ Вы чулі, што сказана: "Любі блізкага твайго і ненавідзь ворага твайго".

⁴⁴ А Я кажу вам: любіце ворагаў вашых, благаслаўляйце тых, што праклінаюць вас, рабіце дабро тым, што ненавідзяць вас і маліцеся за тых, што крыўдзяць вас і гоняць вас;

⁴⁵ і будзеце вы сынамі Айца вашага, Які ёсць у нябёсах; бо Ён загадвае сонцу Свайму ўзыходзіць над ліхімі і добрымі і пасылае дождж на праведных і няправедных.

⁴⁶ Бо, калі вы будзеце любіць тых, што любяць вас, якая вам узнагарода? Ці не тое ж самае робяць і мытнікі?

⁴⁷ І калі вы вітаеце братоў вашых толькі, што асаблівага робіце? Ці не тое ж самае робяць і язычнікі?

⁴⁸ Дык вось, будзьце дасканалыя, як дасканалы Анцец ваш Нябесны.