Бiблiя беларуская - пераклад Василя Сёмухи
(1995, Минск)

Паводле Мацьвея

◄◄ | ◄ | Глава ⚫ | ► | ►►

¹ Тады Ісус быў паведзены Духам у пустыню, на спакушэньне ад д'ябла.

² І, пасьціўшы сорак дзён і сорак начэй, напасьледак згаладаўся.

³ І падступіўся да Яго спакусьнік і сказаў: калі Ты Сын Божы, скажы, каб камяні гэтыя сталі хлябамі.

⁴ А Ён сказаў яму ў адказ: напісана: "ня хлебам адным будзе жыць чалавек, а ўсякім словам, якое зыходзіць з вуснаў Божых".

⁵ Тады бярэ Яго д'ябал у сьвяты горад і ставіць Яго на крыле храма,

⁶ і кажа Яму: калі Ты Сын Божы, кінься ўніз; бо напісана: "Анёлам Сваім накажа пра Цябе, і на руках панясуць Цябе, каб не спатыкнуўся Ты аб камень нагою Тваёю".

⁷ Сказаў яму Ісус: напісана яшчэ: "не спакушай Госпада Бога твайго".

⁸ Зноў бярэ Яго д'ябал на вельмі высокую гару, і паказвае Яму ўсе царствы сьвету і славу іх,

⁹ і кажа Яму: усё гэта Табе дам, калі ўпаўшы паклонішся мне.

¹⁰ Тады кажа яму Ісус: адыдзі ад мяне, сатана; бо напісана: "Госпаду Богу твайму пакланяйся, і Яму аднаму служы".

¹¹ Тады пакідае Яго д'ябал, - і вось, анёлы прыступілі і слугавалі Яму.

¹² Ісус, пачуўшы, што Ян аддадзены варце, адышоў у Галілею,

¹³ і, пакінуўшы Назарэт, прыйшоў і пасяліўся ў Капернауме прыморскім, у межах Завулонавых і Нэталімавых,

¹⁴ каб збылося сказанае праз прарока Ісаю, які кажа:

¹⁵ "Зямля Завулонава і зямля Нэталімава, на дарозе прыморскай за Ярданам, Галілея язычніцкая,

¹⁶ народ, што сядзеў у цемры, убачыў сьвятло вялікае, і ўсім, хто сядзеў у краіне і цяні сьмерці, зазьзяла сьвятло".

¹⁷ З таго часу Ісус пачаў прапаведаваць і казаць: пакайцеся, бо наблізілася Царства Нябеснае.

¹⁸ А праходзячы каля мора Галілейскага, угледзеў Ён двух братоў: Сымона, якога завуць Пятром, і Андрэя, брата ягонага, якія закідвалі мярэжы ў мора, бо яны былі рыбакі.

¹⁹ І кажа ім: ідзеце за Мною, і Я зраблю вас лаўцамі людзей.

²⁰ І яны адразу, пакінуўшы мярэжы, пайшлі за Ім.

²¹ Адтуль прайшоўшы далей, угледзеў Ён іншых двух братоў, Якава Завядзеевага і Яна, брата ягонага, у лодцы з Завядзеем, бацькам іхнім, якія ладзілі мярэжы свае, і заклікаў іх.

²² І яны адразу, пакінуўшы лодку і бацьку свайго, пайшлі за Ім.

²³ І хадзіў Ісус па ўсёй Галілеі, навучаючы ў сынагогах іхніх і прапаведуючы Дабравесьце Царства і ацаляючы ўсякую хваробу і ўсякую немач у людзях.

²⁴ І прайшоў пра Яго погалас па ўсёй Сірыі; і прыводзілі да Яго ўсіх нямоглых, рознымі хваробамі і пакутамі ахопленых, і апанаваных дэманамі, і лунатыкаў, і спаралізаваных, і Ён ацаляў іх.

²⁵ І за Ім ішло мноства люду з Галілеі і Дзесяцігародзьдзя, і зь Ерусаліма, і зь Юдэі, і з-за Ярдана.