Святое Дабравесце (па Беларуску) пераклад Бiблейскай камiсii БПЦ МП

Святое Дабравесце паводле Матфея

◄◄ | ◄ | Глава ⚫ | ► | ►►

¹ Тады Іісус быў узведзены Духам у пустыню, на спакушэнне ад дыявала.

² І, пасціўшы сорак дзён і сорак начэй, урэшце адчуў голад.

³ І прыступіў да Яго спакуснік і сказаў: калі Ты Сын Божы, скажы, каб камяні гэтыя сталі хлябамі.

⁴ А Ён сказаў яму ў адказ: напісана: "не хлебам адным будзе жыць чалавек, а ўсякім словам, якое зыходзіць з вуснаў Божых".

⁵ Тады бярэ Яго дыявал у святы горад і ставіць Яго на крыле храма,

⁶ і кажа Яму: калі Ты Сын Божы, кінься ўніз; бо напісана: "Ангелам Сваім накажа пра Цябе, і на руках панясуць Цябе, каб не спатыкнуўся Ты аб камень нагою Тваёю".

⁷ Сказаў яму Іісус: напісана яшчэ: "не спакушай Госпада Бога твайго".

⁸ Зноў бярэ Яго дыявал на вельмі высокую гару, і паказвае Яму ўсе царствы свету і славу іх,

⁹ і кажа Яму: усё гэта Табе дам, калі ўпаўшы паклонішся мне.

¹⁰ Тады кажа яму Іісус: адыдзі ад Мяне, сатана; бо напісана: "Госпаду Богу твайму пакланяйся, і Яму аднаму служы".

¹¹ Тады пакідае Яго дыявал, - і вось, Ангелы прыступілі і слугавалі Яму.

¹² Іісус, пачуўшы, што Іаан аддадзены варце, адышоў у Галілею,

¹³ і, пакінуўшы Назарэт, прыйшоў і пасяліўся ў Капернауме прыморскім, у межах Завулонавых і Нефалімавых,

¹⁴ каб збылося сказанае праз прарока Ісаію, які кажа:

¹⁵ "Зямля Завулонава і зямля Нефалімава, на дарозе прыморскай за Іарданам, Галілея язычніцкая,

¹⁶ народ, што сядзеў у цемры, убачыў святло вялікае, і ўсім, хто сядзеў у краіне і цяні смерці, заззяла святло".

¹⁷ З таго часу Іісус пачаў прапаведаваць і казаць: пакайцеся, бо наблізілася Царства Нябеснае.

¹⁸ А праходзячы каля мора Галілейскага, угледзеў Ён двух братоў: Сімана, якога завуць Пятром, і Андрэя, брата ягонага, якія закідвалі мярэжы ў мора; бо яны былі рыбакі.

¹⁹ І кажа ім: ідзіце за Мною, і Я зраблю вас лаўцамі людзей.

²⁰ І яны адразу, пакінуўшы мярэжы, пайшлі за Ім.

²¹ Адтуль прайшоўшы далей, угледзеў Ён іншых двух братоў, Іакава Зевядзеевага і Іаана, брата ягонага, у лодцы з Зевядзеем, бацькам іх, якія ладзілі мярэжы свае, і заклікаў іх.

²² І яны адразу, пакінуўшы лодку і бацьку свайго, пайшлі за Ім.

²³ І хадзіў Іісус па ўсёй Галілеі, навучаючы ў сінагогах іхніх і прапаведуючы Дабравесце Царства і ацаляючы ўсякую хваробу і ўсякую немач у народзе.

²⁴ І прайшоў пра Яго погалас па ўсёй Сірыі; і прыводзілі да Яго ўсіх нямоглых, рознымі хваробамі і пакутамі ахопленых, і апанаваных дэманамі, і лунатыкаў, і спаралізаваных, і Ён ацаляў іх.

²⁵ І за Ім ішло мноства люду з Галілеі і Дзесяцігароддзя, і з Іерусаліма, і з Іудзеі, і з-за Іардана.