Святое Дабравесце (па Беларуску) пераклад Бiблейскай камiсii БПЦ МП

Святое Дабравесце паводле Матфея

◄◄ | ◄ | Глава ⚫ | ► | ►►

¹ І выйшаўшы, Іісус ішоў ад храма. І прыступілі вучні Яго, каб паказаць Яму будынкі храма.

² Ён жа сказаў ім: ці бачыце ўсё гэта? Праўду кажу вам: не застанецца тут каменя на камені; усё будзе разбурана.

³ Калі ж сядзеў Ён на гары Елеонскай, дык прыступілі да Яго вучні асобна, кажучы: скажы нам, калі гэта будзе? і якое знаменне Твайго прышэсця і сканчэння веку?

⁴ І ў адказ Іісус сказаў ім: глядзіце, каб хто вас не ўвёў у зман;

⁵ бо многія прыйдуць пад імем Маім і будуць казаць: "я Хрыстос", - і многіх ўвядуць у зман.

⁶ Таксама пачуеце пра войны і ваенныя чуткі. Глядзіце, не жахайцеся; бо павінна ўсё тое быць. Але гэта яшчэ не канец:

⁷ бо паўстане народ на народ і царства на царства; і будзе голад і мор, і землятрусы месцамі;

⁸ а ўсё гэта - пачатак пакут.

⁹ Тады будуць выдаваць вас на пакуты і забіваць вас; і вы будзеце зненавіджаныя ўсімі народамі за імя Маё.

¹⁰ І тады спакусяцца многія; і адзін аднаго будуць выдаваць, і ўзненавідзяць адзін аднаго;

¹¹ і многія ілжэпрарокі паўстануць і ўвядуць у зман многіх;

¹² і з-за памнажэння беззаконнасці ахалоне любоў у многіх;

¹³ а хто выцерпіць да канца, уратуецца.

¹⁴ І абвешчана будзе гэтае Дабравесце Царства па ўсім свеце, на сведчанне ўсім народам; і тады прыйдзе канец.

¹⁵ Дык вось, калі ўбачыце мярзоту спусташэння, пра якую сказана прарокам Даніілам, якая паўстане на святым месцы, - хто чытае, няхай разумее, -

¹⁶ тады хто будзе ў Іудзеі, няхай уцякаюць у горы;

¹⁷ і хто на даху, той няхай не сыходзіць узяць што-небудзь з дома свайго;

¹⁸ і хто ў полі, той няхай не вяртаецца назад, каб узяць вопратку сваю.

¹⁹ Гора ж цяжарным і тым, што кормяць грудзьмі, у тыя дні!

²⁰ Маліцеся, каб не здарыліся ўцёкі вашы зімою, альбо ў суботу;

²¹ бо тады будзе вялікае ліха, якога не было ад пачатку свету да сёння, і не будзе.

²² І калі б не скараціліся тыя дні, дык не ўратавалася б ніякая плоць; але дзеля выбраных скароцяцца тыя дні.

²³ Тады калі хто скажа вам: "вось, тут Хрыстос", альбо "там", - не верце;

²⁴ бо паўстануць ілжэхрысты ды лжэпрарокі і дадуць знаменні вялікія і цуды, каб увесці ў зман, калі магчыма, і выбраных.

²⁵ Вось, Я наперад сказаў вам.

²⁶ Значыцца, калі скажуць вам: "вось Ён у пустыні", - не выходзьце; "вось, Ён у патайных пакоях", - не верце;

²⁷ бо, як маланка бліскае з усходу і відна бывае аж да захаду, такім будзе прышэсце Сына Чалавечага;

²⁸ бо дзе будзе труп, там збяруцца арлы.

²⁹ І раптам, пасля смутку дзён тых, сонца памеркне, і месяц не дасць святла свайго, і зоркі спадуць з неба, і сілы нябесныя зрушацца;

³⁰ і тады явіцца азнака Сына Чалавечага на небе; і тады заплачуць усе плямёны зямныя і ўбачаць Сына Чалавечага, Які будзе ісці на аблоках нябесных з сілаю і славаю вялікай;

³¹ і пашле Ангелаў Сваіх з трубою громагучнаю, і збяруць выбраных Ягоных ад чатырох вятроў, ад краю нябёсаў да краю іх.

³² Ад смакоўніцы вазьміце падабенства: калі голле яе ўжо мякчэе і пускае лісце, вы ведаеце, што блізка лета;

³³ так і вы, калі ўбачыце ўсё гэта, ведайце, што блізка, пры дзвярах.

³⁴ Праўду кажу вам: не міне род гэты, як усё гэта будзе;

³⁵ неба і зямля мінуць, а словы Мае не мінуць;

³⁶ а пра дзень той і гадзіну ніхто не ведае, ні Ангелы нябесныя, а толькі Айцец Мой адзін;

³⁷ але як было ў дні Ноя, так будзе і ў прышэсце Сына Чалавечага:

³⁸ бо як у дні перад патопам елі, пілі, жаніліся і выходзілі замуж да таго дня, як увайшоў Ной у каўчэг,

³⁹ і не разумелі, пакуль не прыйшоў патоп і не забраў усіх, - так будзе і прышэсце Сына Чалавечага;

⁴⁰ тады будуць двое на полі: адзін будзе ўзяты, а другі пакінуты;

⁴¹ дзве будуць малоць у жорнах: адна будзе ўзята, а другая пакінута.

⁴² Дык чувайце ж, бо не ведаеце, ў якую гадзіну Гасподзь ваш прыйдзе...

⁴³ Але гэта вы знаеце, што калі б ведаў гаспадар дома, у якую варту прыйдзе злодзей, дык не спаў бы і не даў бы падкапаць дома свайго.

⁴⁴ Таму і вы будзьце гатовыя, бо у час, пра які не думаеце, Сын Чалавечы прыйдзе.

⁴⁵ Хто ж верны і разумны раб, якога гаспадар ягоны паставіў над слугамі сваімі, каб даваў ім ежу ў свой час?

⁴⁶ Блажэнны той раб, якога гаспадар яго, прыйшоўшы, застане, што робіць так;

⁴⁷ праўду кажу вам, што над усёй маёмасцю сваёю паставіць яго.

⁴⁸ А калі скажа ліхі раб той ў сэрцы сваім: "не хутка прыйдзе гаспадар мой",

⁴⁹ і пачне біць таварышаў сваіх, і есці і піць з п'яніцамі, -

⁵⁰ прыйдзе гаспадар раба таго ў дзень, у які ён не чакае, і ў гадзіну, у якую не ведае,

⁵¹ і рассячэ яго напалам, і вызначыць яму адзін лёс з крывадушнікамі: там будзе плач і скрыгат зубоў.