Святое Дабравесце (па Беларуску) пераклад Бiблейскай камiсii БПЦ МП

Святое Дабравесце паводле Матфея

◄◄ | ◄ | Глава ⚫ | ► | ►►

¹ Тады Іісус прамовіў да люду і вучняў Сваіх,

² кажучы: на Маісеевым пасадзе селі кніжнікі і фарысеі;

³ дык вось, усё, што яны кажуць вам захоўваць, рабіце і захоўвайце; а паводле ўчынкаў іхніх не рабіце, бо яны гавораць, і неробяць:

⁴ звязваюць цяжары важкія і непасільныя і ўскладаюць на плечы людзям, а самі не хочуць і пальцам зрушыць іх;

⁵ а ўсе справы свае робяць дзеля таго, каб бачылі іх людзі; пашыраюць філактэрыі свае ды павялічваюць кутасы на адзенні сваім;

⁶ а таксама любяць узляжаць наперадзе на гасцінах, і наперадзе сядзець у сінагогах,

⁷ і вітанні на плошчах, і каб людзі клікалі іх: "Вучыцель!*вучыцель!"

⁸ А вы не называйцеся вучыцелямі, бо адзін у вас Вучыцель - Хрыстос, а ўсе вы - браты;

⁹ і айцом сабе не называйце нікога на зямлі, бо адзін у вас Айцец, Які на нябёсах;

¹⁰ і не называйцеся настаўнікамі, бо адзін у вас Настаўнік - Хрыстос.

¹¹ Большы з вас няхай будзе вам слуга:

¹² бо хто ўзвышае сябе, той прыніжаны будзе; а хто прыніжае сябе, той узвысіцца.

¹³ Гора вам, кніжнікі і фарысеі, крывадушнікі, што зачыняеце Царства Нябеснае перад людзьмі; бо самі не ўваходзіце і тых, што ўваходзяць, не пускаеце ўвайсці.

¹⁴ Гора вам, кніжнікі і фарысеі, крывадушнікі, што паядаеце дамы ўдоў і напаказ доўга моліцеся: за тое прымеце тым большае асуджэнне.

¹⁵ Гора вам, кніжнікі і фарысеі, крывадушнікі, што праходзіце мора і сушу, каб прыдбаць хоць аднаго нававерца; і калі гэта здараецца, робіце яго сынам геены, двойчы горшым за вас.

¹⁶ Гора вам, павадыры сляпыя, што кажаце: "калі хто прысягне храмам, дык нічога; а калі прысягне золатам храма, дык вінаваты".

¹⁷ Неразумныя і сляпыя! што большае: золата, ці храм, які асвячае золата?

¹⁸ І: "калі хто прысягне ахвярнікам, дык нічога; а калі прысягне дарам, які на ім, дык вінаваты".

¹⁹ Неразумныя і сляпыя! што большае: дар, ці ахвярнік, які асвячае дар?

²⁰ Дык вось, хто прысягне ахвярнікам, прысягае ім і ўсім, што на ім;

²¹ і той, хто прысягае храмам, прысягае ім і Тым, Хто жыве ў ім;

²² і той, хто прысягае небам, прысягае прастолам Божым і Тым, Хто сядзіць на ім.

²³ Гора вам, кніжнікі і фарысеі, крывадушнікі, што даяце дзесяціну з мяты, анісу і кмену, і адкінулі важнейшае ў законе: суд, міласць і веру; гэта трэба было рабіць, і таго не пакідаць.

²⁴ Павадыры сляпыя, што адцэджваеце камара, а вярблюда праглынаеце!

²⁵ Гора вам, кніжнікі і фарысеі, крывадушнікі, што ачышчаеце знешнасць чашы і місы, а усярэдзіне яны поўныя драпежнасці і няпраўды.

²⁶ Фарысей сляпы! ачысці спярша сярэдзіну чашы і місы, каб чыстая была і знешнасць іх.

²⁷ Гора вам, кніжнікі і фарысеі, крывадушнікі, што прыпадабняецеся да павапленых магіл, якія звонку здаюцца прыгожымі, а ўсярэдзіне поўныя касцей мёртвых і ўсякага бруду;

²⁸ так і вы знешне здаяцеся людзям праведнымі, а ўсярэдзіне поўныя крывадушнасці і беззаконня.

²⁹ Гора вам, кніжнікі і фарысеі, крывадушнікі, што будуеце грабніцы прарокам і ўпрыгожваеце помнікі праведнікам,

³⁰ і кажаце: "калі б мы былі ў дні бацькоў нашых, дык не былі б саўдзельнікамі іх у праліванні крыві прарокаў";

³¹ тым самым вы самі сведчыце супроць сябе, што вы сыны тых, якія забілі прарокаў;

³² дапаўняйце ж меру бацькоў вашых.

³³ Змеі, адроддзе яхідніна! як унікнеце вы асуджэння ў геену?

³⁴ Таму, вось, Я пасылаю да вас прарокаў, і мудрых, і кніжнікаў; і некаторых з іх вы заб'яце і ўкрыжуеце, а некаторых будзеце біць у сінагогах вашых і гнаць з горада ў горад;

³⁵ каб спала на вас уся кроў праведная, пралітая на зямлі, ад крыві Авеля праведнага да крыві Захарыі, сына Варахіевага, якога вы забілі паміж храмам і ахвярнікам.

³⁶ Праўду кажу вам: усё гэта спадзе на род гэты.

³⁷ Іерусаліме, Іерусаліме, ты забіваеш прарокаў і каменнем пабіваеш пасланых да цябе! колькі разоў хацеў Я сабраць дзяцей тваіх, як птушка збірае птушанят сваіх пад крылы, і вы не захацелі!

³⁸ Вось, пакідаецца вам дом ваш пусты.

³⁹ Бо кажу вам: не ўбачыце Мяне ад сёння, пакуль не ўсклікнеце: "благаславёны Той, Хто ідзе ў імя Гасподняе!"