Святое Дабравесце (па Беларуску) пераклад Бiблейскай камiсii БПЦ МП

Святое Дабравесце паводле Матфея

◄◄ | ◄ | Глава ⚫ | ► | ►►

¹ І праз шэсць дзён ўзяў Іісус Пятра, Іакава і Іаана, брата яго, і ўзвёў іх на гару высокую адных,

² і перамяніўся перед імі, і заззяла аблічча Яго, як сонца, а ўбранне Яго стала белае, як святло.

³ I вось, явіліся ім Маісей і Ілія, і з Ім гутарылі.

⁴ Азваўшыся, Пётр сказаў Іісусу: Госпадзе! добра нам тут быць; калі хочаш, зробім тут тры шатры: Табе адну, і Маісею адну, і адну Іліі.

⁵ Калі ён яшчэ гаварыў, вось, воблака светлае ахінула іх; і вось, голас з воблака мовіў: Гэты ёсць Сын Мой Любасны, Якога Я ўпадабаў; Яго слухайце.

⁶ І пачуўшы, вучні ўпалі на твары свае і вельмі перапалохаліся.

⁷ І прыступіўшы, Іісус дакрануўся да іх і сказаў: устаньце і не бойцеся.

⁸ А узвёўшы вочы свае, яны нікога не ўбачылі, акрамя аднаго Іісуса.

⁹ І калі сыходзілі яны з гары, Іісус загадаў ім, кажучы: нікому не кажыце пра бачанае, пакуль Сын Чалавечы не ўваскрэсне з мёртвых.

¹⁰ І спыталіся ў Яго вучні Ягоныя, кажучы: як жа кніжнікі кажуць, што Ілія мае прыйсці раней?

¹¹ Іісус сказаў ім у адказ: Ілія сапраўды прыйдзе раней і падрыхтуе усё;

¹² але кажу вам, што Ілія ўжо прыйшоў, і не пазналі яго, а зрабілі з ім, што хацелі; так і Сын Чалавечы мае пацярпець ад іх.

¹³ Тады зразумелі вучні, што Ён пра Іаана Хрысціцеля казаў ім.

¹⁴ І калі прыйшлі яны да люду, надышоў да Яго чалавек і, укленчыўшы перад ім,

¹⁵ сказаў: Госпадзе! памілуй сына майго; ён лунатык і цяжка пакутуе, бо часта падае ў агонь і часта ў ваду;

¹⁶ я прыводзіў яго да вучняў Тваіх, і яны не маглі ацаліць яго.

¹⁷ А Іісус сказаў у адказ: о, родзе бязверны і разбэшчаны! дакуль буду з вамі? дакуль буду цярпець вас? прывядзіце яго да Мяне сюды.

¹⁸ І забараніў яму Іісус; і выйшаў з яго дэман; і выздаравеў хлопец у тую ж хвіліну.

¹⁹ Тады вучні, прыступіўшы да Іісуса асобна, сказалі: чаму мы не маглі выгнаць яго?

²⁰ А Іісус сказаў ім: ад няверства вашага; бо праўду кажу вам: калі вы будзеце мець веру з гарчычнае зерне і скажаце гары гэтай: "перайдзі адсюль туды", і яна пяройдзе; і нічога не будзе немагчымага вам.

²¹ Гэты ж род выганяецца толькі малітваю і постам.

²² У той час, як былі яны ў Галілеі, сказаў ім Іісус: аддадзены будзе Сын Чалавечы ў рукі чалавечыя,

²³ і заб'юць Яго, і на трэці дзень уваскрэсне. І засмуціліся яны вельмі.

²⁴ Калі ж прыйшлі яны ў Капернаум, дык падышлі збіральнікі дыдрахмаў да Пятра і сказалі: Настаўнік ваш ці не дасць дыдрахмы?

²⁵ Ён кажа: так. І калі ўвайшоў ён у дом, дык Іісус, напярэдзіўшы яго, сказаў: як табе здаецца, Сімане? цары зямныя з каго бяруць мыта ці падатак? ці з сыноў сваіх, ці з чужых?

²⁶ Кажа Яму Пётр: з чужых. Сказаў яму Іісус: значыцца, сыны свабодныя;

²⁷ але каб нам не спакусіць іх, ідзі на мора, закінь вуду, і першую рыбіну, якая зловіцца, вазьмі; і, адкрыўшы рот ёй, знойдзеш статыр; вазьмі яго і дай ім за Мяне і за сябе.