Бiблiя беларуская - пераклад Василя Сёмухи
(1995, Минск)

Паводле Мацьвея

◄◄ | ◄ | Глава ⚫ | ► | ►►

¹ І сталася, калі закончыў Ісус настаўленьні дванаццаці вучням Сваім, перайшоў адтуль вучыць і прапаведаваць у гарадах іхніх.

² А Ян, пачуўшы ў цямніцы пра дзеі Хрыстовыя, паслаў двух вучняў сваіх

³ сказаць Яму: ці Той Ты, Які павінен прыйсьці, ці чакаць нам другога?

⁴ І сказаў ім Ісус у адказ: ідзеце, скажэце Яну, што чуеце і бачыце:

⁵ сьляпыя робяцца відушчымі і кульгавыя ходзяць, пракажоныя ачышчаюцца і глухія чуюць, мёртвыя ўваскрасаюць, і ўбогія зьвястуюць,

⁶ і дабрашчасны той, хто не спакусіцца празь Мяне.

⁷ Калі ж пайшлі яны, Ісус пачаў гаварыць людзям пра Яна: што глядзець хадзілі вы ў пустыню? ці ня трысьцінку, ветрам калыханую?

⁸ Што ж глядзець хадзілі вы? ці не чалавека, у мяккія шаты апранутага? тыя, што носяць мяккія шаты, жывуць у харомах царскіх.

⁹ Што ж глядзець хадзілі вы? прарока? Так, кажу вам, нават больш, чым прарока.

¹⁰ Бо ён той, пра якога напісана: "вось, Я пасылаю анёла Майго перад абліччам Тваім, які падрыхтуе шлях Твой перад Табою".

¹¹ Праўду кажу вам: сярод народжаных жанчынамі не паўставаў большы за Яна Хрысьціцеля; але найменшы ў Царстве Нябесным большы за яго.

¹² Ад дзён жа Яна Хрысьціцеля да сёньня Царства Нябеснае дасягаецца сілаю, і тыя, што руплівасьць ужываюць, здабываюць яго;

¹³ бо ўсе прарокі і закон прадвясьцілі да Яна.

¹⁴ І калі хочаце прыняць, ён ёсьць Ільля, які мае прыйсьці.

¹⁵ Хто мае вушы, каб чуць, няхай чуе.

¹⁶ Да каго ж прыпадобню род гэты? Падобны ён да дзяцей, якія сядзяць на рынку і, зьвяртаючыся да сваіх сяброў,

¹⁷ кажуць: "мы гралі вам на жалейцы, а вы не скакалі; мы сьпявалі вам песьні журботныя, а вы не галасілі".

¹⁸ Бо прыйшоў Ян, ня есьць, ня п'е; і кажуць: "у ім дэман".

¹⁹ Прыйшоў Сын Чалавечы, есьць і п'е; і кажуць: "вось, чалавек, які любіць есьці і піць віно, прыяцель мытнікаў і грэшнікаў". І апраўдана мудрасьць дзецьмі яе.

²⁰ Тады пачаў Ён дакараць гарады, у якіх найбольш праявіліся сілы Яго, бо яны не пакаяліся.

²¹ Гора табе, Харазіне! гора табе, Віфсаіда! бо калі б у Тыры і Сідоне явіліся сілы, яўленыя ў вас, дык даўно б яны ў вярэце і ў попеле пакаяліся;

²² але кажу вам: Тыру і Сідону лягчэй будзе ў дзень судны, чым вам.

²³ І ты, Капернауме, што да неба ўзвысіўся, да пекла зрынешся; бо калі б у Садоме явіліся сілы, яўленыя ў табе, дык ён прастаяў бы па сёньняшні дзень;

²⁴ але кажу вам, што зямлі Садомскай лягчэй будзе ў дзень судны, чым табе.

²⁵ Тым часам, далей прамаўляючы, Ісус сказаў: слаўлю Цябе, Войча, Госпадзе неба і зямлі, што Ты ўтоіў гэта ад мудрых і разумных і адкрыў тое дзецям;

²⁶ так, Войча! бо такое было Тваё ўпадабаньне.

²⁷ Усё Мне перададзена Айцом Маім, і ніхто ня ведае Сына, толькі Айцец; і Айца ня ведае ніхто, толькі Сын, і каму Сын хоча адкрыць.

²⁸ Прыйдзеце да Мяне, усе струджаныя і прыгнечаныя, і Я супакою вас;

²⁹ вазьмеце ярмо Маё на сябе і навучэцеся ад Мяне, бо Я лагодны і пакорлівы сэрцам; і знойдзеце спакой душам вашым;

³⁰ бо ярмо Маё добрае, і цяжар Мой лёгкі.