Святое Дабравесце (па Беларуску) пераклад Бiблейскай камiсii БПЦ МП

Святое Дабравесце паводле Матфея

◄◄ | ◄ | Глава ⚫ | ► | ►►

¹ І сталася, калі закончыў Іісус настаўленні дванаццаці вучням Сваім, перайшоў адтуль вучыць і прапаведаваць у гарадах іх.

² А Іаан, пачуўшы ў цямніцы пра дзеі Хрыстовы, паслаў двух вучняў сваіх

³ сказаць Яму: ці Той Ты, Які павінен прыйсці, ці чакаць нам другога?

⁴ І сказаў ім Іісус у адказ: ідзіце, скажыце Іаану, што чуеце і бачыце:

⁵ сляпыя робяцца відушчымі і кульгавыя ходзяць, пракажоныя ачышчаюцца і глухія чуюць, мёртвыя ўваскрасаюць, і ўбогія дабравесцяць,

⁶ і блажэнны, хто не спакусіцца аба Мне.

⁷ Калі ж пайшлі яны, Іісус пачаў гаварыць народу пра Іаана: што глядзець хадзілі вы ў пустыню? ці не трысціну, ветрам калыханую?

⁸ Што ж глядзець хадзілі вы? ці не чалавека, убранага ў мяккае адзенне? Але тыя, што носяць мяккае адзенне, жывуць у харомах царскіх.

⁹ Што ж глядзець хадзілі вы? прарока? Так, кажу вам, і больш, чым прарока.

¹⁰ Бо ён той, пра якога напісана: "вось, Я пасылаю Ангела Майго перад абліччам Тваім, які падрыхтуе шлях Твой перад Табою".

¹¹ Праўду кажу вам: сярод народжаных жанчынамі не паўставаў большы за Іаана Хрысціцеля; але меншы ў Царстве Нябесным большы за яго.

¹² Ад дзён жа Іаана Хрысціцеля да сёння Царства Нябеснае дасягаецца сілаю, і тыя, што сілу ўжываюць здабываюць яго;

¹³ бо ўсе прарокі і закон прадвясцілі да Іаана.

¹⁴ І калі хочаце прыняць, ён ёсць Ілія, які мае прыйсці.

¹⁵ Хто мае вушы, каб чуць, няхай чуе.

¹⁶ З кім параўнаю род гэты? Падобны ён да дзяцей, якія сядзяць на рынку і, аклікаючы адны другіх,

¹⁷ кажуць: "мы ігралі вам на дудцы, а вы не танцавалі; мы спявалі вам жалобнае, а вы не галасілі".

¹⁸ Бо прыйшоў Іаан, не есць, не п'е; і кажуць: "у ім дэман".

¹⁹ Прыйшоў Сын Чалавечы, есць і п'е; і кажуць: "вось, чалавек, які любіць есці і віно піць, прыяцель мытнікам і грэшніка". І апраўдана мудрасць дзецьмі яе.

²⁰ Тады пачаў Ён дакараць гарады, у якіх найбольш праявіліся сілы Яго, бо яны не пакаяліся.

²¹ Гора табе, Харазіне! гора табе, Віфсаіда! бо калі б у Тыры і Сідоне явіліся сілы, яўленыя ў вас, яны б даўно ўжо ў валасяніцы і ў попеле пакаяліся;

²² але кажу вам: Тыру і Сідону лягчэй будзе ў дзень судны, чым вам.

²³ І ты, Капернауме, што да неба ўзвысіўся, да пекла будзеш нізрынуты; бо калі б у Садоме явіліся сілы, яўленыя ў табе, дык ён прастаяў бы па сённяшні дзень;

²⁴ але кажу вам, што зямлі Садомскай лягчэй будзе ў дзень судны, чым табе.

²⁵ Тым часам, далей прамаўляючы, Іісус сказаў: слаўлю Цябе, Ойча, Госпадзе неба і зямлі, што Ты ўтаіў гэта ад мудрых і разумных і адкрыў гэта дзецям.

²⁶ Так, Ойча! бо такое было Тваё ўпадабанне.

²⁷ Усё Мне перададзена Айцом Маім, і ніхто не ведае Сына, толькі Айцец; і Айца не ведае ніхто, толькі Сын, і каму Сын хоча адкрыць.

²⁸ Прыйдзіце да Мяне, усе струджаныя і прыгнечаныя, і Я супакою вас;

²⁹ вазьміце ярмо Маё на сябе і навучыцеся ад Мяне, бо Я лагодны і пакорлівы сэрцам; і знойдзеце спакой душам вашым;

³⁰ бо ярмо Маё добрае, і цяжар Мой лёгкі.