Святое Дабравесце (па Беларуску) пераклад Бiблейскай камiсii БПЦ МП

Святое Дабравесце паводле Матфея

◄◄ | ◄ | Глава ⚫ | ► | ►►

¹ І паклікаўшы дванаццаць вучняў Сваіх, Ён даў ім уладу над нячыстымі духамі, каб выганяць іх, і ацаляць усякую хваробу і ўсякую немач.

² А дванаццаці Апосталаў імёны вось такія: першы Сіман, якога называюць Пятром, і Андрэй, брат ягоны, Іакаў Зевядзееў і Іаан, брат яго.

³ Філіп і Варфаламей, Фама і Матфей мытнік, Іакаў Алфееў і Леўвей, празваны Фадзеем,

⁴ Сіман Кананіт і Іуда Іскарыёт, які і здрадзіў Яму.

⁵ Гэтых дванаццаць паслаў Іісус і запавядаў ім, кажучы: на шлях язычнікаў не хадзіце і ў горад Самаранскі не ўваходзьце;

⁶ а ідзіце найболей да пагіблых авечак дому Ізраілевага;

⁷ і ходзячы, прапаведуўце, што наблізілася Царства Нябеснае;

⁸ хворых ацаляйце, пракажоных ачышчайце, мёртвых уваскрашайце, дэманаў выганяйце; задарам атрымалі, задарам давайце.

⁹ Не бярыце з сабою ні золата, ні срэбра, ні медзі ў паясы свае,

¹⁰ ні торбы ў дарогу, ні дзве вопраткі, ні абутку, ні посаха. Бо хто працуе, той варты пракорму.

¹¹ У які горад ці селішча вы ні ўвайшлі б, даведайцеся, хто ў ім годны, і там заставайцеся, пакуль не выйдзеце;

¹² а ўваходзячы ў дом, вітайце яго, кажучы: "мір дому гэтаму";

¹³ і калі дом будзе годны, дык сыдзе мір ваш на яго; калі ж не будзе годны, дык мір ваш да вас вернецца.

¹⁴ А калі хто не прыме вас і не паслухаецца слоў вашых, дык, выходзячы з дому, альбо з горада таго, абтрасіце пыл з ног вашых;

¹⁵ праўду кажу вам: лягчэй будзе зямлі Садомскай і Гаморскай у дзень судны, чым гораду таму.

¹⁶ Вось, я пасылаю вас, як авечак сярод ваўкоў: дык вось, будзьце мудрыя, як змеі, і простыя, як галубы.

¹⁷ Сцеражыцеся ж людзей: бо яны аддаваць будуць вас на судзілішчы і ў сінагогах сваіх біць будуць вас,

¹⁸ і павядуць вас да правіцеляў і да цароў за Мяне, на сведчанне перад імі і язычнікамі.

¹⁹ Калі ж будуць выдаваць вас, не турбуйцеся, як або што сказаць; бо дадзена будзе вам у той час, што сказаць;

²⁰ бо не вы будзеце гаварыць, а Дух Айца вашага гаварыць будзе ў вас.

²¹ І выдасць брат брата на смерть, і бацька - дзіця; і паўстануць дзеці на бацькоў і заб'юць іх;

²² і будзеце зненавіджаныя ўсімі за імя Маё; а хто вытрывае да канца, уратаваны будзе.

²³ Калі ж будуць вас гнаць у адным горадзе, уцякайце ў другі, Бо праўду кажу вам: не паспееце абысці гарадоў Ізраілевых, як прыйдзе Сын Чалавечы.

²⁴ Вучань не вышэйшы за настаўніка, і слуга не вышэйшы за гаспадара свайго.

²⁵ Даволі вучню, каб ён быў, як настаўнік ягоны, і слузе, каб ён быў, як гаспадар ягоны. Калі гаспадара дома назвалі вельзевулам, дык ці не тым болей дамашніх яго?

²⁶ Дык вось, не бойцеся іх: бо няма нічога схаванага, што не адкрылася б, і таемнага, што не было б уведана.

²⁷ Што кажу вам у цемры, кажыце пры святле; і што на вуха чуеце, прапаведуйце з дахаў.

²⁸ І не бойцеся тых, што забіваюць цела, але ж душы забіць не могуць; а бойцеся болей таго, хто можа і душу, і цела загубіць у геене.

²⁹ Ці ж не два вараб’і прадаюцца за асарый? І ніводны з іх не ўпадзе на зямлю без волі Айца вашага;

³⁰ а ў вас і валасы на галаве ўсе палічаны;

³¹ дык не бойцеся: вы больш вартыя, чым мноства вераб’ёў.

³² Дык вось, кожнага, хто вызнае Мяне перад людзьмі, таго вызнаю і Я перад Айцом Маім, Які ёсць у нябёсах;

³³ а хто адрачэцца ад Мяне перад людзьмі, ад таго адракуся і Я перад Айцом Маім, Які ёсць у нябёсах.

³⁴ Не думайце, што Я прыйшоў прынесці мір на зямлю; не мір прыйшоў Я прынесці, а меч;

³⁵ бо Я прыйшоў падзяліць чалавека з бацькам ягоным, і дачку з маці яе, і нявестку са свякрухай яе.

³⁶ І ворагі чалавеку - дамашнія яго.

³⁷ Хто любіць бацьку ці маці больш за Мяне, не варты Мяне; і хто любіць сына ці дачку больш за Мяне, не варты Мяне;

³⁸ і хто не бярэ крыжа свайго і не ідзе следам за Мною, той не варты Мяне.

³⁹ Хто зберагае душу сваю, страціць яе; а хто страціў душу сваю за Мяне, зберажэ яе.

⁴⁰ Хто прымае вас, Мяне прымае; а хто Мяне прымае, прымае Таго, Хто паслаў Мяне;

⁴¹ хто прымае прарока ў імя прарока, узнагароду прарокаву атрымае; і хто прымае праведніка ў імя праведніка, узнагароду праведнікаву атрымае.

⁴² І хто напоіць аднаго з малых гэтых толькі чашай халоднай вады ў імя вучня, праўду кажу вам, не страціць узнагароды сваёй.