Бiблiя беларуская - пераклад Василя Сёмухи
(1995, Минск)

Паводле Марка

◄◄ | ◄ | Глава ⚫ | ► | ►►

¹ Прыйшлі на другі бераг мора, у краіну Гадарынскую.

² І калі выйшаў Ён з лодкі, адразу сустрэў Яго чалавек, які выйшаў з магілаў, апанаваны нячыстым духам;

³ у яго было жытло ў магілах, і ніхто ня мог зьвязаць яго нават ланцугамі;

⁴ бо колькі разоў яго ні кавалі ў ланцугі і путы, але разрываў ланцугі і разьбіваў путы, і ніхто ня меў сілы ўтаймаваць яго;

⁵ заўсёды, уночы і ўдзень, у горах і магілах, крычаў ён і біўся аб каменьне.

⁶ А ўбачыўшы Ісуса здалёк, прыбег і пакланіўся Яму,

⁷ і, закрычаўшы моцным голасам, сказаў: што Табе да мяне? Ісусе, Сыне Бога Усявышняга! заклінаю Цябе Богам, ня муч мяне!

⁸ Бо Ісус сказаў яму: выйдзі, дух нячысты, з гэтага чалавека.

⁹ І спытаўся ў яго: як тваё імя? І той сказаў у адказ: легіён імя мне, бо нас многа.

¹⁰ І вельмі прасілі Яго, каб ня высылаў іх прэч з краіны той.

¹¹ А пасьвіўся там пад гарою вялікі гурт сьвіней.

¹² І прасіліся ў Яго ўсе дэманы, кажучы: пашлі нас у сьвіней, каб нам увайсьці ў іх.

¹³ Ісус адразу дазволіў ім. І нячыстыя духі, выйшаўшы, увайшлі ў сьвіней; і памкнуўся гурт з урвішча ў мора, а іх было каля дзьвюх тысяч; і патанулі ў моры.

¹⁴ А сьвінапасы паўцякалі і расказалі ў горадзе і ў вёсках. І жыхары выйшлі паглядзець, што сталася.

¹⁵ Прыходзяць да Ісуса і бачаць, што апантаны, у якім быў легіён, сядзіць і апрануты, і ў здаровым розуме; і спалохаліся.

¹⁶ А тыя, што бачылі, расказалі ім пра тое, як гэта здарылася з апантаным, і пра сьвіней.

¹⁷ І пачалі прасіць Яго, каб адышоў ад межаў іхніх.

¹⁸ І калі Ён увайшоў у лодку, апантаны прасіў Яго, каб быць зь Ім.

¹⁹ Але Ісус не дазволіў яму, а сказаў: ідзі дамоў да сваіх і раскажы ім, што ўчыніў з табою Гасподзь і як зь цябе ўмілажаліўся.

²⁰ І пайшоў і пачаў зьвеставаць у Дзесяцігародзьдзі, што ўчыніў зь ім Ісус. І ўсе дзіваваліся.

²¹ Калі Ісус зноў пераправіўся ў лодцы на другі бераг, сабралася да Яго мноства людзей. Ён быў каля мора.

²² І вось, прыходзіць адзін з начальнікаў сынагогі, якога звалі Яір, і, убачыўшы Яго, падае ў ногі Яму

²³ і ўмольна просіць Яго, кажучы: дачка мая пры сьмерці; прыйдзі і ўскладзі на яе рукі, каб яна ачуняла і засталася жывая.

²⁴ Ісус пайшоў зь ім. За Ім сьледам ішло мноства людзей, і націскалі на Яго.

²⁵ Адна жанчына, якая пакутавала ад крывацечы дванаццаць гадоў,

²⁶ шмат нацярпелася ад многіх лекараў, патраціла ўсё, што было ў яе, і ня зыскала ніякай палёгкі, а самой толькі пагоршала,

²⁷ дачуўшыся пра Ісуса, падышла ззаду ў натоўпе і кранулася вопраткі Ягонай;

²⁸ бо казала: калі хоць да вопраткі Ягонай дакрануся, дык выздаравею.

²⁹ І перастала адразу ў яе крывацеча, і яна адчула ў целе, што ачуняла ад хваробы.

³⁰ А ў той самы час Ісус, адчуўшы Сам у Сабе, што выйшла зь Яго сіла, абярнуўся ў народзе і сказаў: хто крануўся Маёй вопраткі?

³¹ Вучні сказалі Яму: Ты бачыш, што людзі націскаюць на Цябе, і кажаш: "хто крануўся Мяне?".

³² Але Ён глядзеў навокал, каб убачыць тую, якая зрабіла гэта.

³³ Жанчына ў страху і трымценьні, ведаючы, што зь ёю сталася, падышла, упала перад Ім і сказала Яму ўсю праўду.

³⁴ А Ён сказаў ёй: дачка! вера твая ўратавала цябе; ідзі ў міры і будзь здаровая ад хваробы тваёй.

³⁵ Калі Ён яшчэ гаварыў гэта, прыходзяць ад начальніка сынагогі і кажуць: дачка твая памерла; чаго яшчэ дакучаеш Настаўніку?

³⁶ Але Ісус, пачуўшы гэтыя словы, адразу кажа начальніку сынагогі; ня бойся, толькі веруй.

³⁷ І не дазволіў нікому ісьці сьледам за Ім, акрамя як Пятру, Якаву і Яну, брату Якава.

³⁸ Прыходзяць у дом начальніка сынагогі і бачаць перапалох, і плачуць і голасам галосяць.

³⁹ І ўвайшоўшы, кажа ім: чаго сумеліся і плачаце? дзяўчына не памерла, а сьпіць.

⁴⁰ І сьмяяліся зь Яго. Але Ён, выслаўшы ўсіх, бярэ з Сабою бацьку і маці дзяўчыны і тых, што былі зь Ім, і ўваходзіць туды, дзе дзяўчына ляжала.

⁴¹ І ўзяўшы дзяўчыну за руку, кажа ёй: таліфа-кумі, што азначае: "Дзяўчына, табе кажу, устань".

⁴² І дзяўчына адразу ўстала і пачала хадзіць, бо была гадоў дванаццаці. І вялікаму дзіву даліся.

⁴³ І Ён строга загадаў ім, каб ніхто пра гэта ня ведаў, і сказаў, каб ёй далі есьці.