Святое Дабравесце (па Беларуску) пераклад Бiблейскай камiсii БПЦ МП

Святое Дабравесце паводле Марка

◄◄ | ◄ | Глава ⚫ | ► | ►►

¹ І прыплылі на другі бераг мора ў краіну Гадарынскую.

² І калі выйшаў Ён з лодкі, адразу ж сустрэў Яго чалавек з магільных пячораў у духу нячыстым,

³ які меў жытло ў магілах, і нават ланцугом ніхто не мог звязаць яго;

⁴ бо шмат разоў яго звязвалі аковамі і ланцугамі, але ён разрываў ланцугі і разбіваў аковы, і ніхто не мог яго ўтаймаваць;

⁵ і заўсёды, ноччу і днём, у магільных пячорах і ў гарах крычаў ён і біўся аб каменне.

⁶ А ўбачыўшы здалёк Іісуса, прыбег і пакланіўся Яму.

⁷ І, закрычаўшы моцным голасам, сказаў: што Табе да мяне, Іісусе, Сыне Бога Ўсявышняга? заклінаю Цябе Богам, не муч мяне!

⁸ Бо Іісус сказаў яму: выйдзі, дух нячысты, з чалавека.

⁹ І пытаўся ў яго: як імя тваё? І той адказаў: легіён маё імя, бо многа нас.

¹⁰ І вельмі прасілі Яго, каб не адсылаў іх прэч з краіны той.

¹¹ А там пры гары пасвіўся вялікі статак свіней.

¹² І прасілі Яго ўсе дэманы, кажучы: пашлі нас у свіней, каб нам увайсці ў іх.

¹³ І адразу дазволіў ім Іісус. І, выйшаўшы, нячыстыя духі ўвайшлі ў свіней; і рынуўся статак з кручы ў мора, а іх было каля дзвюх тысяч; і патанулі ў моры.

¹⁴ А іх пастухі пабеглі ды абвясцілі ў горадзе і ў вёсках. І людзі выйшлі пабачыць, што здарылася.

¹⁵ Прыходзяць да Іісуса і бачаць, што апантаны, у якім быў легіён, сядзіць адзеты і пры розуме; і спалохаліся.

¹⁶ Тыя, хто бачыў, расказалі ім: як гэта адбылося з апантаным, і пра свіней.

¹⁷ І пачалі прасіць Яго адыйсці з межаў іх.

¹⁸ І калі Ён увайшоў у лодку, той, што быў апантаны, прасіў Яго, каб быць з Ім.

¹⁹ А Іісус не дазволіў яму і кажа да яго: ідзі ў дом твой да сваіх і раскажы ім, што зрабіў табе Гасподзь і як памілаваў цябе.

²⁰ І пайшоў, і пачаў абвяшчаць у Дзесяцігароддзі, што зрабіў яму Іісус. І ўсе здзіўляліся.

²¹ І калі пераправіўся Іісус у лодцы зноў на другі бераг, сабралася народу мноства да Яго. І быў Ён каля мора.

²² І вось прыходзіць адзін са старэйшын сінагогі, імем Іаір, і, ўбачыўшы Яго, падае ў ногі Яму

²³ і вельмі просіць Яго, кажучы: дачушка мая пры смерці, прыйдзі і ўскладзі на яе рукі, каб яна ўратавалася і жыла.

²⁴ І пайшоў за ім Іісус. І ўслед Яму ішоў вялікі натоўп, і напіралі на Яго.

²⁵ І жанчына нейкая, што мела кровацячэнне дванаццаць гадоў,

²⁶ і шмат нацярпелася ад многіх лекараў, і патраціла ўсё, што мела і ніякай палёгкі не атрымала, а стала ёй яшчэ горш;

²⁷ пачуўшы пра Іісуса, прыйшла ў натоўпе ззаду і дакранулася да вопраткі Яго;

²⁸ бо казала: калі дакрануся хоць да вопраткі Яго, уратаваная буду.

²⁹ І адразу спынілася кровацячэнне ў яе, і адчула яна целам, што вызвалілася ад хваробы.

³⁰ І адразу Іісус, адчуў у Сабе, што сіла выйшла з Яго, павярнуўся ў натоўпе і сказаў: хто дакрануўся да вопраткі Маёй?

³¹ І казалі Яму вучні Яго: Ты бачыш, натоўп напірае на Цябе, а кажаш: хто дакрануўся да Мяне?

³² І аглядаўся Ён, каб бачыць тую, што зрабіла гэта.

³³ А жанчына спалохалася і дрыжала, ведаючы, што з ёю адбылося, падыйшла, упала перад Ім і сказала Яму ўсю праўду.

³⁴ Ён жа сказаў ёй: дачка! вера твая ўратавала цябе; ідзі з мірам і здароваю будзь ад хваробы тваёй.

³⁵ Яшчэ калі Ён гаварыў, прыходзяць з дому старэйшыны сінагогі і кажуць: дачка твая памерла, навошта яшчэ турбуеш Настаўніка?

³⁶ Але Іісус, адразу пачуўшы гэтыя словы, кажа старэйшыне сінагогі: не бойся, толькі веруй.

³⁷ І не дазволіў нікому ісці за Сабою, акрамя Пятра, Іакава і Іаана, брата Іакавага.

³⁸ Прыходзяць у дом старэйшыны сінагогі, і бачыць Ён сумятню і тых, што плачуць і галосяць моцна.

³⁹ І, увайшоўшы, кажа ім: чаго вы хвалюецеся і плачаце. Дзяўчынка не памерла, а спіць.

⁴⁰ І насміхаліся з Яго. Але Ён, выправадзіўшы ўсіх, бярэ з Сабою бацьку дзяўчынкі і маці, і тых, што былі з Ім, і ўваходзіць туды, дзе ляжала дзяўчынка.

⁴¹ І, узяўшы дзяўчынку за руку, кажа ёй: таліфа кумі, што значыць: дзяўчына, табе кажу, устань.

⁴² І адразу паднялася дзяўчына і пачала хадзіць, а было ёй гадоў дванаццаць. І ўразіліся ўражаннем вялікім.

⁴³ І загадаў ім строга, каб ніхто не даведаўся пра гэта, і сказаў даць ёй есці.