Святое Дабравесце (па Беларуску) пераклад Бiблейскай камiсii БПЦ МП

Святое Дабравесце паводле Марка

◄◄ | ◄ | Глава ⚫ | ► | ►►

¹ І прыйшоў зноў у сінагогу. І быў там чалавек, які меў усохлую руку.

² І сачылі за Ім, ці не ацаліць яго ў суботу, каб звінаваціць Яго.

³ І кажа Ён чалавеку, што меў усохлую руку: стань пасярэдзіне.

⁴ А ім кажа: ці дазволена ў суботу дабро рабіць, альбо зло рабіць? душу ўратаваць альбо загубіць? Яны ж маўчалі.

⁵ І, паглядзеўшы на іх з гневам, засмучаны жорсткасцю сэрцаў іх, кажа чалавеку: працягні руку тваю. І працягнуў ён, і стала рука яго здаровай, як другая.

⁶ І, выйшаўшы, фарысеі адразу ўчынілі з ірадыянамі змову супраць Яго, як Яго загубіць.

⁷ Іісус жа з вучнямі Сваімі адышоў да мора, і мноства народу з Галілеі пайшло за Ім, і з Іудзеі,

⁸ і з Іерусаліма, і з Ідумеі, і з-за Іардана. І з наваколляў Тыра і Сідона мноства вялікае, пачуўшы, што Ён рабіў, прыйшло да Яго.

⁹ І сказаў вучням Сваім, каб лодка была для Яго напагатове, каб натоўп не цясніў Яго.

¹⁰ Бо многіх Ён ацаліў, так што нядужныя кідаліся да Яго, каб да Яго дакрануцца.

¹¹ І духі нячыстыя, калі бачылі Яго, падалі перад Ім і крычалі, кажучы: Ты - Сын Божы.

¹² І Ён строга забараняў ім, каб не выяўлялі Яго.

¹³ І ўзышоў на гару, і паклікаў, каго Сам хацеў; і прыйшлі да Яго.

¹⁴ І паставіў дванаццаць, каб былі з Ім і каб пасылаць іх прапаведаваць,

¹⁵ і каб яны мелі ўладу ацаляць немачы і выганяць дэманаў.

¹⁶ Паставіў Сімана, даўшы яму імя Пётр,

¹⁷ і Іакава Зевядзеевага і Іаана, брата Іакава, даўшы ім імёны Ваанергес, што азначае "сыны громавы";

¹⁸ і Андрэя, і Філіпа, і Варфаламея, і Матфея, і Фаму, і Іакава Алфеевага, і Фадзея, і Сімана Кананіта,

¹⁹ і Іуду Іскарыёта, які і выдаў Яго.

²⁰ І прыйшлі ў дом, і сабраўся зноў народ, так што яны не маглі нават хлеба паесці.

²¹ І дачуўшыся, блізкія Яго выйшлі забраць Яго; бо казалі, што Ён не ў Сабе.

²² А кніжнікі, якія прыйшлі з Іерусаліма, казалі, што Ён мае ў Сабе вельзевула і што сілай князя дэманскага выганяе дэманаў.

²³ І, паклікаўшы іх, прытчамі казаў ім: як можа сатана сатану выганяць?

²⁴ І калі царства раздзеліцца самое ў сабе, не можа ўстаяць царства тое.

²⁵ І калі дом раздзеліцца сам у сабе, не можа ўстаяць дом той.

²⁶ І калі сатана паўстаў сам на сябе і раздзяліўся, не можа ўстаяць, але прыйшоў канец яму.

²⁷ Ніхто не можа, увайшоўшы ў дом дужага, нарабаваць дабра яго, калі перш не звяжа дужага, і тады абрабуе дом яго.

²⁸ Праўду кажу вам: адпушчаны будуць сынам чалавечым усе грахі і хуленні, якімі б ні хулілі,

²⁹ але хто будзе хуліць Духа Святога, не будзе мець адпушчэння давеку, а падлягае вечнаму асуджэнню.

³⁰ Так казаў Ён, бо гаварылі: Ён духа нячыстага мае ў Сабе.

³¹ І прыйшлі Маці Яго і браты Яго і, стоячы на дварэ, паслалі да Яго паклікаць Яго.

³² І сядзеў народ вакол Яго. І сказалі Яму: вось Маці Твая, і браты Твае, і сёстры Твае на дварэ, шукаюць Цябе.

³³ І адказаў ім, гаворачы: хто Маці Мая і браты Мае?

³⁴ І агледзеўшы тых, што сядзелі вакол Яго, кажа: вось маці Мая і браты Мае;

³⁵ бо хто будзе выконваць волю Божую, той Мне брат, і сястра, і маці.