Святое Дабравесце (па Беларуску) пераклад Бiблейскай камiсii БПЦ МП

Святое Дабравесце паводле Марка

◄◄ | ◄ | Глава ⚫ | ► | ►►

¹ І прыйшоў Ён зноў у Капернаум праз некалькі дзён, і чутна стала, што Ён у доме.

² І адразу сабраліся многія, так што не ўмяшчаліся ўжо і пры дзвярах, і Ён казаў ім слова.

³ І прыйшлі, несучы да Яго паралізаванага, якога трымалі на руках чацвёра;

⁴ і, не маючы як наблізіцца да Яго з-за натоўпу, яны раскрылі дах над тым месцам, дзе Ён быў, і, пракапаўшы, апусцілі пасцель, на якой ляжаў паралізаваны.

⁵ І, убачыўшы веру іх, Іісус кажа паралізаванаму: сыне, адпускаюцца твае грахі.

⁶ Сядзелі ж тут некаторыя з кніжнікаў і разважалі ў сэрцах сваіх:

⁷ Што ён гэтак Бога зневажае? Хто можа адпускаць грахі, акрамя аднаго Бога?

⁸ І адразу Іісус, спазнаўшы духам Сваім, што яны так разважаюць у сабе, кажа ім: што гэта вы разважаеце ў сэрцах вашых?

⁹ Што лягчэй? Сказаць паралізаванаму: "адпускаюцца твае грахі" ці сказаць: "устань, і вазьмі пасцель тваю, і хадзі"?

¹⁰ Але каб вы ведалі, што мае ўладу Сын Чалавечы на зямлі адпускаць грахі, - кажа паралізаванаму:

¹¹ табе кажу: устань, і вазьмі пасцель тваю, і ідзі ў дом твой.

¹² І адразу ўстаў той, і ўзяўшы пасцель, выйшаў перад усімі, так што здзіўляліся ўсе і славілі Бога, кажучы: ніколі такога мы не бачылі.

¹³ І выйшаў Іісус зноў да мора; і ўвесь народ ішоў да Яго, і Ён вучыў іх.

¹⁴ І, праходзячы, ўбачыў Ён Левія Алфеевага, які сядзеў на мытні, і кажа яму: ідзі ўслед за Мною. І той, устаўшы, пайшоў услед за Ім.

¹⁵ І калі Іісус узляжаў у доме яго, многія мытнікі і грэшнікі ўзляжалі з Іісусам і з вучнямі Яго; бо многа было іх, якія ішлі ўслед за Ім.

¹⁶ І кніжнікі і фарысеі, убачыўшы, што Ён есць з мытнікамі і грэшнікамі, казалі вучням Яго: як гэта з мытнікамі і грэшнікамі Ён есць і п’е?

¹⁷ І, пачуўшы, Іісус кажа ім: не здаровыя маюць патрэбу ў лекары, а хворыя; Я прыйшоў заклікаць не праведнікаў, а грэшнікаў да пакаяння.

¹⁸ Вучні Іаанавы і фарысейскія пасцілі. І прыходзяць і кажуць Яму: чаму вучні Іаанавы і фарысейскія посцяць, а Твае вучні не посцяць?

¹⁹ І сказаў ім Іісус: хіба могуць пасціць сыны харомаў вясельных, калі з імі жаніх? Дакуль жаніх з імі, не могуць пасціць.

²⁰ Але прыйдуць дні, калі будзе ўзяты ад іх жаніх, і тады будуць пасціць у тыя дні.

²¹ Ніхто латкі з палатна нябеленага не прышывае да адзежыны старой, інакш прышытым парвецца старое, і дзірка будзе яшчэ горшая.

²² І ніхто не ўлівае віно маладое ў мяхі старыя: інакш прарве віно маладое мяхі, і віно выцеча, і мяхі прападуць; а віно малодае ў мяхі новыя ўліваць трэба.

²³ І давялося Яму ў суботу праходзіць пасевамі, і пачалі вучні Яго дарогаю зрываць калоссе.

²⁴ І фарысеі казалі Яму: паглядзі, чаму яны робяць у суботу, што не дазволена?

²⁵ І Ён кажа ім: ці ж вы ніколі не чыталі, што зрабіў Давід, калі патрэбу меў і згаладаўся сам і тыя, што былі з ім?

²⁶ як ён увайшоў у дом Божы пры Авіафары-першасвятары і з’еў ахвярныя хлябы, якіх не дазволена было есці нікому, акрамя святароў, і даў таксама тым, што былі з ім.

²⁷ І казаў ім: субота ўзнікла дзеля чалавека, а не чалавек дзеля суботы.

²⁸ Таму Сын Чалавечы ёсць гаспадар і суботы.