Библия на церковно-славянском языке - транслитерация современным русским алфавитом
(1751)

Вторая книга Маккавейская

◄◄ | ◄ | Глава ⚫ | ► | ►►

¹ Того же времене Антиох с безчестием возвратися от Персиды.

² Вниде бо во град глаголемый Персеполь и покусися расхитити храм и град обдержати: того ради множеству устремившуся, к помощи оружий обратишася: и тако случися прогнаному Антиоху от градожителей со срамом возвратитися.

³ Сущу же ему при Екватане, возвестишася ему содеянная при Никаноре и Тимофеи.

⁴ Вознесся же яростию, мняше и прогнавших его злобу нанести на Иудеи: сего ради повеле вознице непрестанно гонящему совершати шествие, небесному суду понуждающу его, сице бо горделиве рече: гробищное место Иудеем Иерусалим, пришед тамо, сотворю.

⁵ Всевидец же Господь Бог Израилев порази его неизцельною и невидимою язвою: изрекшуся бо его слову, абие объят его утробная неизельная болебзнь и горькия внутренния муки,

⁶ зело праведне, яко многими и странными напастьми иных утробы мучи. Он же никакоже от кичения (своего) преста:

⁷ еще же и гордыни исполняшеся, огнем дышущь ярости на Иудеи и заповедав ускорити шествие: случися же и пасти ему от колесницы со устремлением идущия, и лютым падением падшему вся уды плоти сокрушити.

⁸ Он же, иже мало прежде мняй волнам морским повелевати, от гордости паче человечи, и мерилом высоту гор мняся измерити, до земли смирен на носиле носяшеся, явную Божию силу всем показуя:

⁹ яко и от телесе нечестиваго червию кипети, и живущу в болезнех и в мучениих, плоти его излиятися от смрада же его и гноя вси воини гнушахуся.

¹⁰ И мало прежде небесных звезд касатися мнящаго никтоже можаше носити, смрада ради лютаго.

¹¹ Отсюду убо нача от многия гордыни своея преставати уязвлен и в познание приходити (научен) Божиею язвою повсечастно умножее болезни своея приемля.

¹² И егда ниже сам смрада своего терпети можаше, тако рече: праведно есть повинутися Богови, и смертну сущу равная Богови не мудрствовати горде.

¹³ Моляшеся же скверный ко никогда хотящему помиловати его Владыце, тако глаголя:

¹⁴ святый убо град, егоже тщахся пришед во прах обратити и место гробищное создати, свободен оставлю,

¹⁵ Иудеев же, ихже хотех ниже погребение сподобите, но птицем зверем на растерзание предати со младенцы, всех их равных Афинеом сотворю:

¹⁶ храм же святый, егоже прежде ограбих, предобрыми дары украшу, и священныя сосуды много болше вся воздам, и подобающая к жертвам иждивению от своих доходов подам:

¹⁷ к сим же и Иудеанином быти, и всякое место обитаемо проходити, и проповедати Божию державу имам.

¹⁸ Но никакоже престающым болезнем, найде бо нань праведный Божий суд, о себе отчаявся, писа ко Иудеом ниженаписанное послание, моления чин имущее, содержащее же сия:

¹⁹ предобрым гражданом Иудеом зело радоватися и здравствовати и благоденствовати, царь Антиох и стратиг:

²⁰ аще здравствуете и чада, и (имения) вашя но мысли вам суть, благодарю убо Богу великим благодарением, на небо упование имея:

²¹ аз же в немощи лежащь, вашу честь и благоприятство воспоминах любезно: возвращаяся от Персидских мест и впад в болызнь тяжку, нужно возмнех попечение возимети о общем всех утверждении:

²² не отчаяваяся о себе, но упование много имея избежати недуга,

²³ зря же, яко и отец мой, в няже времена в вышних местех воева, показа имущаго прияти по нем началство,

²⁴ да аще что противно случится или возвестится что бедственно, ведуще сущии по странам, кому власть вверена, не смутятся:

²⁵ к сим же помышляю прилежащих могутников и соседей царствию времене усмотряющих и случая ожидающих, оеявих сына моего Антиоха царем, егоже многаши обходящь вышний сатрапии многим от вас препоручах и представлях, писах же к нему, яже нижае писана суть:

²⁶ молю убо вас и прошу, да помняще благодеяния во обще и особно, кийждо содержите сущее благоприятство ко мне и сыну моему:

²⁷ уповаю бо, яко он кротце и человеколюбне, последующь моему произволению, сообщатися вам будет.

²⁸ Мужеубийца убо и хульник злейшаяе пострадав, якоже иным сотвори, в странстве, на горах бедною смертию изчезе.

²⁹ Пренесе же тело его Филипп сверстник его: иже и убоявся сына Антиохова ко Птоломею Филомитору во Египет отиде.