Библия на церковно-славянском языке - транслитерация современным русским алфавитом
(1751)

Вторая книга Маккавейская

◄◄ | ◄ | Глава ⚫ | ► | ►►

¹ Не по мнозе же времени посла царь старца (некоего) Афинеанина понуждати Иудей, дабы отступили от отеческих преданий и по Божетвенным законом не жителствовали,

² осквернити же и во Иерусалиме храм и нарещи Диа Олимпийскаго, и сущий в Гаризине, якоже обитающии бяху на месте онем, Диа Странноприимца.

³ Люто же и всему народу бе и тяжко нападение злобы,

⁴ ибо церковь любодеяния и козлогласования бе полна от язык живущих со блудницами и во священных притворех к женам приближающихся и неподобающая внутрь вносящих.

⁵ Олтарь такожде полн бе возбраненными от законов.

⁶ Бяше же не возможно суббот хранити, ни праздников отеческих содержати, ниже весьма кому себе Иудеанином именовати.

⁷ Ведяхужеся с горькою нуждею на всяк месяц в день рождения царева в жертве: бывшу же Дионосову празднику, понуждахуся Иудее киссы имуще хвалити Диониса.

⁸ Повеление же изыде в ближния грады Еллинския, Птоломею подустившу, да тогожде уставления противу Иудеев употребляют, и жертву приносят,

⁹ не изволяющих же прейти на Еллинския уставы да убивают: бе убо видети настоящую бедность.

¹⁰ Две бо жены оклеветаны бысте обрезавшыя чада своя: сих привесивше има к сосцам младенцы и пред народом обводивше их по граду, со стены свергоша.

¹¹ Инии же в ближния стекшеся пещеры, тайно день субботный праздновати, егда возвещено бысть Филиппу, сожжени быша, зане ради чести праздничнаго дне бояхуся помогати себе.

¹² Молю убо чтущих книгу сию не устрашатися напастей, мнети же мучеия сия не к погублению, но к наказанию рода нашего быти.

¹³ Ибо на много время не попускати злочествующым, но абие впадати им в мучения, великаго благодеяния есть знамение.

¹⁴ Не бо якоже на иных языцех ждет долготерпеливый Владыка, дондеже достигших ко исполнению грехов мучит, тако и на нас суди быти:

¹⁵ да не до конца достигшым грехом нашым, последи нам отмстит.

¹⁶ Сего ради никогдаже от нас милосердие Свое отемлет: наказуяй же бедствами не оставляет людий Своих.

¹⁷ Но сия ко увещанию нам речена суть: малыми же подобает внити в повесть.

¹⁸ Елеазар некий от первенствующих книжников, муж уже состаревся летами и зраком лица благолепен сый, отверстыми усты принуждаемь бяше ясти свиная мяса.

¹⁹ Он же со славою смерть паче, нежели ненавистный живот предизбрав, волею идяше на муку:

²⁰ плюнув же (на тая), имже образом подобаше приходити хотящым терпети мучение, яже не леть бе ясти ради любления живота.

²¹ Ко беззаконней же приставленнии жертве, древняго ради к мужу знания, вземше его на едине моляху, да принесеная мяса, яже ясти ему леть бяше, его ради уготована, притворит себе аки ядуща повеленная от царя жертвенная мяса:

²² да сие соделав избавится от смерти и древния ради к ним дружбы получит человеколюбие.

²³ Он же мысль благу восприемь и достойну возраста и старости преимущества, и пристяжаныя лепотныя седины и издетска предобраго воспитания, паче же святаго и Богоданнаго закона, последовно отвеща, скоро глаголя: изволяю послан быти во ад,

²⁴ не бо возрасту нашему достойно есть лицемерити, да мнози от юных непщующе Елеазара девятидесятилетна прейти к жителству иноплеменных,

²⁵ и они моего ради лицемерия и маловременнаго живота прельстятся мене ради, и ненависть и порок старости моей сотворю:

²⁶ аще бо нынешния муки человеческия и избавлюся, но руки Всемогущаго ни жив, ни умерый избегу:

²⁷ темже мужественне ныне разлучився живота, старости убо достоин явлюся,

²⁸ юным же образ доблий оставлю, еже усердно и добльственно за честныя и святыя законы умирати. И сия рек, со тщанием на муку пойде.

²⁹ Ведущии же его, бывшую мало прежде благоприятность к нему в свирепость премениша предреченных ради словес, яже сии мняху безумство быти.

³⁰ Хотя же ранами скончатися, возстенав рече: Господеви святый разум имущему явно есть, яко от смерти могущь избавитися, жестокия терплю на теле болезни уязвляемь, на души же сладце страха ради Его сия стражду.

³¹ И сей убо сим образом живот сконча, не токмо юношам, но и премногим языка свою смерть во образ доблести и в память добродетели оставив.