Библия на церковно-славянском языке - транслитерация современным русским алфавитом
(1751)

Вторая книга Маккавейская

◄◄ | ◄ | Глава ⚫ | ► | ►►

¹ В сие же время вторый поход уготова Антиох во Египет.

² Случися же по всему граду, едва не чрез четыредесять дний являтися на воздусе ристающих конников златыя одежды имущих и копиями по полком вооруженных,

³ и собрания коней чинно устроенных, исхождения творимая и сражения от обоих стран, и щитов движения и сулиц множество, и мечей исторжения и стрел метания, и златых одежд блистания и всякия брони.

⁴ Темже вси моляхуся, да явление во благо будет.

⁵ Бывши же вести лживей, акибы Антиох от жития отшел, взем Иасон не менши тыящи мужей, внезапу на град сотвори нападение гражданом же на стену востекшым, и наконец уже вземлему сущу граду, Менелай во краеградие убеже.

⁶ Иасон же творяше заклания граждан своих нещадно, не помышляя, яко благовременство, еже на ужики, злополучие есть превелие: мня над врагами, а не над единоязычными победителная прияти,

⁷ началства убо не одержа, кончину же навета студ приемь, беглец паки во Аманитиду отиде.

⁸ Конец убо злаго жития получи, заключен у Ареты Аравскаго мучителя, бегая от града во град, гонимь от всех и ненавидимь аки законов отступник, и огнушаемь, яко отечеству и гражданом враг, во Египет изгнан бысть.

⁹ И иже многих от отечества изгнавый, странствуя погибе к Лакедемоняном отшед, аки сродства ради прибежище хотящь имети.

¹⁰ И иже множество непогребенных изверже, (сам) не оплакан бысть, и погребения ни какова сподобися, ниже отеческому гробу приобщися.

¹¹ Возвестившым же царю о бывших, усумнеся (царь), да не отступит Иудеа: и того ради пришед из Египта разярен душею, взя град оружием

¹² и повеле воином сещи нещадно сретающихся и в домы входящих закалати.

¹³ Быша же убиения юнош и старцев, мужей и жен и чад истребления, дев же и отроков заклания.

¹⁴ Осмьдесят же тысящ во всех триех днех избиени: и четыредесять убо тысящ пленени, не менши же убиеных продани быша.

¹⁵ Не доволен же быв и сими, дерзну внити в церковь всея земли святейшую, имеяй Менелаа предводителя, бывша законов и отечества предателя.

¹⁶ И скверныма рукама вземля священныя сосуды и яже от иных царей положенная на умножение и славу места и честь, скверныма рукама прикасаяся подаяше.

¹⁷ И вознесеся мыслию Антиох, не помышляя, яко грех ради обитающих во граде мало прогневася Владыка, того ради бысть о месте презрение:

¹⁸ аще же бы не случилося им многими грехи быти объятым, якоже бе Илиодор посланный от Селевка царя ко осмотрению сокровищнаго хранилища, сей пришед внезапу биен быв отвратился бы от дерзости.

¹⁹ Но не ради места язык, но языка ради место Господь избра.

²⁰ Темже убо и сие место сопричастно бысть людских зол случивишихся, последи же благодеянием от Господа приобщися, и оставленое во гневе Вседержителя, паки в примирении великаго Владыки со всякою славою исправися.

²¹ Убо Антиох из церкве взем тысящу осмь сот талантов, скоро во Антиохию возвратися, чая от гордыни землю убо плавателну, а море пешеходно положити от возвышения сердца.

²² Остави же и приставники ко озлоблению людий, во Иерусалиме убо Филиппа родом Фригеанина, нрав жесточайший имущаго неже поставльший (его),

²³ в Гаризине же Андроника: и к сим Менелаа, иже злее иных озлобляше граждан,

²⁴ ненавистное же ко гражданом Иудейским имеяй сердце, посла ненавистнаго началника Аполлониа со двадесятию двема тысящьми воинства, повелев ему всех в возрасте сущих погубити, жены же и юношы продаяти.

²⁵ Сей же пришед во Иерусалим и аки мир себе притворив, удержася даже до дне святыя субботы: и улучив празднующих Иудеов, вооружитися своим повеле,

²⁶ и изшедших всех на позор закла, и во град со оружии вскочив, людий многое множество погуби.

²⁷ Иуда же Маккавей, иже десятый быв, и отшед в пусто место, звериным образом в горах живяше с сущими с ним, и травную пищу ядуще пребываху, еже бы не причастися осквернению.