Библия на церковно-славянском языке - транслитерация современным русским алфавитом
(1751)

Вторая книга Маккавейская

◄◄ | ◄ | Глава ⚫ | ► | ►►

¹ Обретается же во описаниих Иеремии пророка, яко повеле огня взяти преселяющымся, якоже знаменовася,

² и якоже заповеда преселяющымся пророк, дав им закон, да не забывают повелений Господних и да не прельстятся умы, видяще идолы златы и сребряны и сущую окрест их утварь.

³ И ина такова глаголя, моляше, да не отступит закон от сердца их.

⁴ Бе же в писании, яко скинии и кивоту повеле пророк по Божественному ответу бывшему ему последствовати, дондеже взыде в гору на нюже Моисей возшед, виде Божие наследие.

⁵ И пришед Иеремиа обрете пещеру и жилище, и скинию и кивот, и олтарь фимиама внесе тамо, и двери загради.

⁶ И приступиша нецыи от последствующих, да назнаменают себе путь, и не могоша обрести.

⁷ Егда же позна Иеремиа, укорив их, рече: яко неведомо будет место, дондеже соберет Бог собрание людий и милостив будет:

⁸ и тогда Господь покажет сия, и явится слава Господня и облак, якоже и при Моисеи являшеся, якоже и Соломон моли, да место освятится вельми.

⁹ Являшеся же, и яко премудрость имея вознесе жертву обновления и совершения церкве.

¹⁰ Якоже и Моисей моляшеся ко Господу, и сниде огнь с небесе и пояде жертвы: такожде и Соломон молися, и сниде огнь с небесе и пожже всесожжения.

¹¹ И рече Моисей: понеже не снедено бысть сущее за грех, попалися.

¹² Такожде и Соломон осмь дний празднова.

¹³ Поведашася же и в написаниих и в памятописаниих бывших при Неемии таяжде: и како строящь книгоположницу собра книги, яже о царех и о пророцех и о Давиде, и епистолии царей о приношениих.

¹⁴ Такожде и Иуда, падшая бранию бывшею нам, собра вся, и суть при нас.

¹⁵ Сих убо аще требуете, приносящих вам послите.

¹⁶ Хотяще убо праздновати очищение, писахом вам: благо убо сотворите празднующе дни.

¹⁷ Бог же спасый вся люди Своя и воздавый наследие всем и царствие, и священство и освящение,

¹⁸ якоже обеща в законе: уповаем бо на Бога, яко скоро нас помилует и соберет от поднебесныя в место святое:

¹⁹ изят бо нас от великих бед и место очисти.

²⁰ Дела же Иуды Маккавеа и братий его, и церкве великия очищение, и обновление жертвенника:

²¹ еще же и о бранех на Антиоха Епифана и сына его Евпатора:

²² и о явлениих с небесе бывших благомужествовавшым Иудейства ради любочестно, яко всю страну мали суще опустошаху, и варваров множество прогоняху,

²³ и преславную во всей вселенней церковь возсоздаша, и град избавиша, и хотящыя разоритися законы исправляху, Господу со всякою кротостию милостиву бывающу им:

²⁴ яже от Иасона Киринеа извещена пятию книгами, покусимся единым сочинением сократити.

²⁵ Созерцающе бо многое число (вещей) и сущее неудобство хотящым приступити к повести истории множества ради вещества,

²⁶ попекохомся, дабы хотящии читати имели души утешение, любомудрствующии же удобее приимали на память, вси же чтущии пользу.

²⁷ И нам убо приявшым труд сокращения неудобно, пота же и бдения дело (творим):

²⁸ якоже уготовляющему пир и ищущему иных пользы не легко убо, обаче за благодарение многих сладце труд потерпим.

²⁹ Испытность убо о киихждо списателю попустивше, последовати примеру сокращения потщимся.

³⁰ Якоже бо новыя храмины архитектону о всем здании пещися подобает, и живописати начинающему приличных ко украшению искати, тако мню и о нас.

³¹ Еже убо глубочае испытовати и о всех творити слово и любопытствовати о коемждо подробну, повести сочинителю достоит.

³² Сокращению же речений последовати и тонкаго испытания вещей бегати, сокращение творящему попущати должно.

³³ Отсюду убо начним повесть предреченным толико присовокупивше: неразумно бо предисловие истории умножати, самую историю сокращати.