Библия на церковно-славянском языке - транслитерация современным русским алфавитом
(1751)

Вторая книга Маккавейская

◄◄ | ◄ | Глава ⚫ | ► | ►►

¹ По триех же летех увебда Иуда, яко Димитрий Селевков сын вплыве сквозе пристанище, еже при Триполи, со множеством крепким и кораблями,

² и одержа страну и уби Антиоха и его наместника Лисию.

³ Алким же некто бывый прежде архиерей, волею же осквернивыйся во времена смешения, помыслив, яко ни киим образом небсть ему спасения, ниже прихождения ко святому олтарю,

⁴ прииде ко царю Димитрию сто пятьдесят перваго лета, принося ему венец злат и финик, к сим же и цветы, иже мняхуся церковнии быти: и в день оный молчаше.

⁵ Получив же время безумию своему содействующее, призван бысть Димитрием на собор и вопрошен, в коем состоянии и совете стоят Иудее?

⁶ К сим рече: глаголемии от Иудей Асидее, ихже вождь Иуда Маккавей, брани строят и распри воздвизают, не допускающе царству благостояния получити:

⁷ сего ради отлучен прародителския славы, сиречь священноначалства, семо ныне приидох,

⁸ первое убо о надлежащих царю верность содержащь, второе же и о своих гражданех промышляя: предреченных бо безсловесием весьма род наш не мало страждет:

⁹ каяждо же сих познав, ты, царю, о стране и о обстоянии рода нашего проуразумей по человеколюбию, еже имаши ко всем благопреклонное:

¹⁰ донележе бо Иуда жив есть, невозможно мира получити вещем.

¹¹ Сицевым же реченным бывшым от него, абие прочии друзи, вражду имущии на Иуду, разжегоша Димитриа.

¹² Призвав же скоро Никанора старейшину над слонами и воеводою поставив Иудеею, посла,

¹³ дав заповедь, самаго убо Иуду убити, сущих же с ним расточити, поставити же Алкима архиереем превеликаго храма.

¹⁴ Тогда языцы убегшии из Иудеи от Иуды, стадами прихождаху к Никанору, Иудейская злополучия и бедства себе благополучия мняще быти.

¹⁵ Слышавще же (Иудее) Никанорово пришествие и нападение языков, посыпавшеся землею, моляху Поставившаго даже до века люди Своя и присно с явлением Защищающаго Свою часть.

¹⁶ Повелевшу же воеводу, скоро оттуду двигнушася и смесишася с ними при градце Десавли.

¹⁷ Симон же брат Иудин сразився с Никанором, мало же устрашився внезапнаго ради нахождения супостатов.

¹⁸ Обаче же слышав Никанор мужесто при Иуде сущих и благодушие, имже подвизаются за отечество, убояся суд кровию сотворити:

¹⁹ сего ради посла Посидониа и Феодота и Маттафию дати и взяти десницу.

²⁰ Многу же о сем бывшу совету и воеводе людем возвестившу и бывшу единогласному всех изволению, соизволиша на мирная

²¹ и нарекоша день, в оньже особно снидутся купно. И прииде. И поставиша различная седалища.

²² Повеле же Иуда вооруженным быти готовым в местех приличных, да не когда от супостат внезапу злодеяние будет, и подобающую беседу обще сотвориша.

²³ Пребываше же Никанор во Иерусалиме и ни коегоже зла сотвори, стада же народов собранных отпусти.

²⁴ Имеяше же Иуду всегда в лицы, душевно к мужу преклонися:

²⁵ моли же его оженитися и чада сотворити. Оженися, благо поживе, общежителствоваше.

²⁶ Алким же видя между ими благоприятство и бывшая совещания познав, иде к Димитрию и глаголаше, яко Никанор о вещех чуждая мудрствует: Иуду бо, наветника царству, преемника восприя себе.

²⁷ Царь же возярився и прелукавыми оклеветании его разсверепев, писа Никанору глаголя: о совещаниих сих тяжко (ми есть) носити: повелеваю ти Маккавеа связана послати скоро во Антиохию.

²⁸ Уведав же о сих Никанор, смятеся и тяжко терпяше завещанная отринути, ни чимже его мужу обидевшу.

²⁹ Но понеже царю сопротивитися не бе возможно, благовременства наблюдаше хитростию военною сие совершити.

³⁰ Маккавей же видя над собою грознее деюща Никанора и обыкновенное сретение свирепее имуща, уразумев не от блага быти суровству сему, собрав не мало сущих окрест себе, скрыся от Никанора.

³¹ Познав же другий, яко добльственно от мужа хитростию предварен, пришед к великому и святому храму, священником подобающыя жертвы приносящым повеле предати мужа.

³² Сим же с клятвою рекшым, яко не ведят, где есть искомый, простер десницу на церковь, сими клятся:

³³ аще не предадите ми связана Иуду, то Божий храм равен со землею сотворю, и олтарь раскопаю, и капище Дионису славное возставлю зде.

³⁴ И сия рек отиде. Жерцы же воздеюще руце на небо, призываху Сущаго всегда Споборника языку Своему, сия рекуще:

³⁵ Ты, Господи всех, не требуяй ничтоже, благоволил еси храму обитания Твоего быти в нас:

³⁶ и ныне, о, Святе, всякаго освящения Господи, сохрани во век несквернен сей храм недавно очищенный, загради же всяка уста неправедна.

³⁷ Разий же некто от старейшин Иерусалимских оклеветан бысть Никанору, муж любитель граждан и зело добре словущь и по благопамятству отец Иудеом именуемый:

³⁸ бяше бо внесый в прежних временех несмешения суд во Иудействе, и тело и душу за Иудейство предаяше со всяким усердием.

³⁹ Хотящь же Никанор явну сотворити ненависть, юже име на Иудеи, посла воинов более пяти сот яти его.

⁴⁰ Мняше бо, яко онаго поимав, сим соделает беду.

⁴¹ Множеству же народа хотящу столп обдержати и дворовыя двери разрушающу, и повелевшу огнь принести и двери зажещи, объят отвсюду быв, мечем поразися,

⁴² лучше добльственно хотящь умрети, нежели беззаконником подручник быти и свое благородство недостойне обезчестити.

⁴³ Скорости же ради подвига несмертна язва бысть, и народом внутрь дверий вреявшымся, востек дерзостно на стену, сверже сам себе мужественно на народы.

⁴⁴ Оным же скоро разбегшымся и бывшу разстоянию, паде срединою чрева посреде их:

⁴⁵ еще же дышущь и разжжен душею, востав, крови его потоком текущей и тяжчайшым ранам сущым, бежащь сквозе народы пройде,

⁴⁶ и став на некоем камени стремниннем, весьма уже без крови быв, исторгнув внутренняя (своя) и взем обема рукама верже на народы: и призвав Владеющаго животом и духом, да сия ему паки воздаст, и сим образом живот сконча.