Библия на церковно-славянском языке - транслитерация современным русским алфавитом
(1751)

Вторая книга Маккавейская

◄◄ | ◄ | Глава ⚫ | ► | ►►

¹ Лета сто четыредесять девятаго, позна Иуда, яко Антиох Евпатор грядет со множеством на Иудею,

² и с ним Лисиа наместник ему и над делами старейший, кийждо имуща (с собою) силу Еллинску пешцев сто десять тысящ и конник пять тысящ и триста, и слонов двадесять два и колесниц с косами триста.

³ Примесися же к ним и Менелай, и с великою лестию моляше Антиоха, не ради отечеству спасения но надеяся в началство поставлен быти.

⁴ Царь же царей воздвиже ярость Антиохову на нечестиваго, и Лисии показавшу сего быти виновна всех злых, повеле, якоже обычай есть, на месте убити, приведшым его в Вирсавию.

⁵ Бе же на том месте столп пятидесяти лакот полн пепела, сей же имеяше орудие окрест вращающееся устремителное в пепел.

⁶ Тамо священнотатству повинна суща, или и иных некиих злоб превосходство сотворшаго, вси вреяют в погибель.

⁷ Сицевою смертию законопреступнику случися умрети, ниже погребения получившему Менелаю

⁸ зело праведне: понеже бо многа согрешения на олтарь Божий соверши, егоже огнь и пепел бе свят, (и он) в пепеле смерть восприя.

⁹ Но царь умом необуздан грядяше, горшая при отце его бывших показати хотящь Иудеом.

¹⁰ Уведав же Иуда о сих, повеле людем день и нощь молити Господа, негли, якоже иногда, и ныне поможет

¹¹ имущым закона и отечества и святаго храма лишитися, и мало прежде почивших людий не оставит злохульным языком подручных быти.

¹² Всем же тожде вкупе сотворшым и просившым от Господа милосердия с плачем и постами и простертием (на землю) по три дни непрестанно, укрепив их Иуда повеле ити.

¹³ Особь же быв Иуда со старейшины, советова, прежде нежели внидут вои царстии во Иудею и одержат град, изшедше сразитися (за вещы святыя) Господнею помощию.

¹⁴ Вдав же попечение Создателю мира и умолив своих мужественне подвизатися даже до смерти за законы, за святилище, за град, за отечество, за гражданство, окрест Модина воинство постави.

¹⁵ Дав же сущым с ним знамение Божия победы, с юношами крепчайшими избранными напад нощию на царский двор, во стану уби четыре тысящы мужей и болшаго слона с сущими на нем порази:

¹⁶ и на конец весь полк страха и смятения исполниша и изыдоша благополучно.

¹⁷ Являющуся же уже дню, сие содеяся, помогающу ему Господню покровению.

¹⁸ Царь же приемь вкус храбрости Иудейския, испытова хитростию места.

¹⁹ И ко Вефсуре крепцейи твердыни Иудейстей прииде, и отгонимь бе, ударяшеся, умаляшеся.

²⁰ Сущым же внутрь, Иуда потребная посла.

²¹ Возвести же тайная супостатом Родок от Иудейских воинов: взыскан же бысть и ят и заключен.

²² Повтори же царь слово со Вефсуряны, десницу даде, прия, отиде,

²³ состави брань со Иудою и преможен бысть: егда же позна отмещущася Филиппа во Антиохии поставленнаго над делами, смятеся и моли Иудеов, повинуся и кляся о всех праведных, примирися и жертву принесе, почте храм и ущедри место.

²⁴ И Маккавеа прият, постави стратига от Птолемаиды даже до Герринов князем,

²⁵ прииде во Птолемаиду: скорбяху Птолемаидяне о заветех, негодоваху бо о примирениих, яже хотеша отринути.

²⁶ Взыде на судище Лисиа, отвеща по возможности, увеща, (люди) утиши, благоприятны сотвори, возвратися во Антиохию. Сице бысть царско исхождение и возвращение.