Библия на церковно-славянском языке - транслитерация современным русским алфавитом
(1751)

Вторая книга Маккавейская

◄◄ | ◄ | Глава ⚫ | ► | ►►

¹ Маккавей же и иже с ним бяху, Господу их защищающу, храм убо и град восприяша:

² капища же от иноплеменников на торжищи устроенная, еще же и требища раскопаша,

³ и очистивше храм, ин олтарь сотвориша, и разжегше камение и вземше огнь от них, принесоша жертву по двою лету и шести месяцех, и фимиам и свещники, и хлебов предложение сотвориша.

⁴ Сия же сотворше, моляху Господа падше ниц, да не ктому в сицевая злая впадут, но аще когда и согрешат, от Него с кротостию да наказуются, а не варваром и хульным языком предадятся.

⁵ И в оньже день храм от иноплеменник осквернися, случися в той же день очищению быти храма, двадесять пятаго дне месяца, иже есть Хаслев.

⁶ И с веселием праздноваху дний осмь по образу сеней, поминающе, яко прежде малаго времене праздник сенниц в горах и в пещерах звюриным образом бяху провождающе.

⁷ Сего ради фирси и ветви зеленыя, еще же и финики имеюще, песни приношаху Благопоспешившему очестити место Свое.

⁸ И узакониша общим повелением и уставлением всему языку Иудейску по вся лета праздновати дни сия.

⁹ И Антиох убо, иже проименовашеся Епифан, кончину тако име.

¹⁰ Ныне же яже о Евпаторе Антиохе, сыне нечестиваго бывшем, речем, сокращающе злаая, яже во бранех сотворена суть.

¹¹ Сей бо восприяв царствие, постави над делами царскими Лисию некоего, Килисирии же и Финикии воеводу первоначалнаго.

¹² Птоломей бо нарицаемый Макрон правду соблюдати произволив ко Иудеом бывшая ради к ним обиды, покушашеся яже к ним мирно препроводити.

¹³ Темже оклеветан от другов ко Евпатору и часто нарицаемь акибы предатель, понеже Кипр вверенный от Филомитора остави и ко Антиоху Епифану отиде, ниже честныя власти имущь, от печали отравив себе живот сконча.

¹⁴ Горгиа же быв воевода над местами, собираше чуждих воев и непрестанно на Иудеи ратоваше.

¹⁵ С ним же купно и Идумеане обдержаще крепкия твердыни обучаху Иудеов, и изгоняемых из Иерусалима приемлюще, ратовати начинаху.

¹⁶ Сущии же со Маккавеом сотворше молитву и моливше Бога споборника им быти, на Идумейския твердыни устремишася.

¹⁷ К ним же и приступивше мужественно одержаша места, всем же на стене ратующым отмстиша и сретающихся закалаху, убиша же не менше двадесяти тысящ.

¹⁸ Избегшым же иекиим не менши девяти тысящ в две пирги крепки зело и вся, яже противу облежения, имущыя,

¹⁹ Маккавей оставив Симона и Иосифа, еще же и Закхеа и иже с ним доволных ко облежению их, на нуждная места сам отиде.

²⁰ Сущии же с Симоном сребролюбивии от некиих, иже в пиргах, сребром прельщени, и седмьдесят тысящ драхм вземше, оставиша некиих избежати.

²¹ Егда же возвестися Маккавею о бывшем, собрав началники людий, порицаше, яко за сребро продаша братию, супостатов на них отпустивше.

²² Сих убо предателей бывших уби и внезапу две пирги разруши.

²³ Оружием же во всех и руками благоуспевая, погуби в дву твердынех более двадесяти тысящ.

²⁴ Тимофей же, иже прежде от Иудей бысть поражен, собрав воев странных множество, и во Асии бывщих конников собрав не мало, прииде аки оружием Иудею хотящь взяти.

²⁵ Маккавей же и сущии с ним, приближающуся тому, ко молитве Божий обратишася, главы землею посыпавше и чресла вретищами препоясавше,

²⁶ пред олтарным прагом ниц падше, моляху милостива им быти, враждовати же враждующым на них и супостатом противится яко закон глаголет.

²⁷ Бывше же по молитве, восприемше оружия далече из града изыдоша: приближшежеся к супостатом, о себе сташа.

²⁸ Солнцу же возсиявающу, обои сразишася: сии убо споручника имуще благополучия и победы с добродетелию ко Господу прибежище, они же воеводу браней учинища ярость.

²⁹ Пребывающей же крепцейй брани, явишася супостатом от небесе мужие пять на конех златы узды имущих, благолепни, и правяще Иудеов два:

³⁰ и Маккавеа среде себе вземше и защищающе своим всеоружием невредима сохраняху, на супостаты же стрелы и молнии метаху: темже смесившеся невидением сечахуся мятежа исполнени.

³¹ Убиенных же бысть двадесять тысящ и пятсоть сот, конных же шесть сот.

³² Сам же Тимофей побебже в Газару глаголемую твердыню, зело крепкую, воеводствующу тамо Херею.

³³ Маккавей же и сущии с ним весело обседоша крепость дни четыри.

³⁴ Сущии же внутрь на твердость места уповающе, паче меры хуляху и словеса беззаконная изношаху.

³⁵ Явльшужеся пятому дню двадесять юношей, иже с Маккавеем беху, разжегшеся яростию хуления ради, приближившеся ко стене, мужественно и зверообразною яростию прилучившихся разсецаху.

³⁶ Инии же подобне возшедше с нуждею к сущым внутрь, зажигаху пирги, и возжегше огнища, живых хульников сожгоша.

³⁷ Инии же врата разсекоша, и впустивше прочий полк, взяша град, и Тимофеа скрывшагося в некоем рве заклаша, и брата его Хереа и Аполлофана.

³⁸ Сия же сотворше с песньми и исиоведаньми благословляху Господа благодетеля великаго Израилю и победу им давшаго.