Библия на церковно-славянском языке - транслитерация современным русским алфавитом
(1751)

Первая книга Маккавейская

◄◄ | ◄ | Глава ⚫ | ► | ►►

¹ И слыша Димитрий, яко паде Никанор и силы его во брани, и приложи Вакхида и Алкима паки послати во Иудею, и десный рог с ними.

² И идоша путем, иже (ведет) в Галгалы, и ополчишася на Месалоф, иже есть во Арвилех, и взяша его, и побиша душ человеческих много.

³ И в месяц первый лета сто пятьдесят втораго, приступиша воини ко Иерусалиму,

⁴ и восташа и идоша в Верею в двадесяти тысящах мужей и две тысящы конников.

⁵ Иуда же бе ополчен во Елаасе, и три тысящы мужей избранных с ним.

⁶ И видеша множество сил, яко многи суть, и устрашишася зело: и избегоша мнози от полка, и не остася от них токмо осмь сот мужей.

⁷ И виде Иуда, яко расточися полк его, и брань оскорбляше его: и сокрушися сердцем, яко не имеяше времене собрати их,

⁸ и ослабе и рече оставшым: востанем и взыдем на супостаты нашя, аще можем ратовати противу их.

⁹ И отвращаху его рекуще: не можем, но спасем токмо душы своя ныне, и возвратимся со братиею нашею, и ополчимся на них: мы же мали.

¹⁰ И рече Иуда: не буди ми сотворити вещь сию, еже бежати от них: и аще приближися время наше, умрем мужественно ради братии нашея и не оставим вины славе нашей.

¹¹ И воздвижеся сила от полка и ста во сретение им, и разлучишася конницы на две части, и пращницы и стрелцы предидяху силе, и предподвижницы вси сильнии.

¹² Вакхид же бе на деснем розе, и приближися полк от двою страну, и возглашаху трубами.

¹³ И вострубиша, иже бяху от страны Иудины, и тии трубами: и поколебася земля от гласа ополчений. И бысть брань сражена от утра даже до вечера.

¹⁴ И виде Иуда, яко Вакхид и крепость полка в десных: и собрашася к нему вси крепцыи сердцем:

¹⁵ и сотреся десный рог от них, и гнаше вслед их даже до горы Азота.

¹⁶ И сущии в левем розе видеша, яко сотреся десный рог, и обратишася по стопам Иудиным и сущих с ним созади.

¹⁷ И отягчися брань, и падоша язвени мнози от сих и от тех:

¹⁸ и Иуда паде, прочии же бежаша.

¹⁹ И взяста Ионафан и Симон Иуду брата своего и погребоста его во гробе отец его в Модине.

²⁰ И плакашася о нем и рыдаше его весь Израиль плачем велиим, и сетоваху дни многи и рекоша:

²¹ како паде сильный спасаяй Израиля?

²² Прочая же словес и браней Иудиных и благих мужеств, ихже сотвори, и величества его, не суть писана: многа бо бяху зело.

²³ И бысть по преставлении Иудине, проникоша беззаконнии во всех пределех Израилевых, и прозябоша вси делающии беззаконие.

²⁴ Во дни оны бысть глад велик зело, и отступи страна с ними.

²⁵ И избра Вакхид нечестивых мужей и постави их господиями страны.

²⁶ И искаху и испытаху другов Иудиных и привождаху тех к Вакхиду: и мстяше им и посмевашеся им.

²⁷ И бысть скорбь велика во Израили, яже не бысть от дний, в нихже не явися пророк во Израили.

²⁸ И собрашася вси друзи Иудины и рекоша Ионафану:

²⁹ отнележе брат твой Иуда скончася, и муж подобен ему несть изыти противу врагов и Вакхида и враждующих языку нашему:

³⁰ ныне убо тебе днесь избрахом, еже быти вместо его нам в началника и вожда, еже ратовати во брани нашей.

³¹ И прия Ионафан во время оно началство и воста вместо Иуды брата своего.

³² И позна Вакхид и искаше его убити.

³³ И позна Ионафан и Симон брат его и вси иже с ним (бяху), и побегоша в пустыню Фекуе, и ополчишася при воде рва Асфара.

³⁴ И позна Вакхид в день суббот, и прейде сам и вси вои его об ону страну Иордана.

³⁵ И посла Ионафан брата своего вожда народу и моли Наватеов другов своих представити им приготовление их многое.

³⁶ И изыдоша сынове Иамвриины от Мидавы, и яша Иоанна и вся елика име, и отидоша имуще та.

³⁷ По словесех же сих возвестиша Ионафану и Симону брату его, яко сынове Иамвриины творят брак великий и ведут невесту от Надавафа, дщерь единаго от великих вельмож Ханаанских, с гордостию велиею.

³⁸ И помянуша Иоанна брата своего, и взыдоша, и скрышася под сению горы:

³⁹ и воздвигнуша очи свои и видеша, и се, плищь и уготование многое, и жених изыде и друзи его и братия его бо сретение им с тимпаны и мусикиами и оружии многими:

⁴⁰ и восташа на них от засады иже при Ионафане и убиша их, и падоша язвени мнози, прочии же бегоша в гору: и взяша вся корысти их.

⁴¹ И обратися брак в сетование, и глас мусикии их в плачь.

⁴² И отмстиша отмщение крове брата своего и возвратишася на брег Иорданский.

⁴³ И слыша Вакхид и прииде в день субботный даже до брегов Иорданских с силою многою.

⁴⁴ И рече ко своим Ионафан: востанем ныне и ополчимся за душы нашя, несть бо днесь якоже вчера и третияго дне:

⁴⁵ се бо, брань противу нас и созади нас: вода же Иорданская сюду и сюду, и блато и лес, и несть места, еже уклонитися:

⁴⁶ ныне убо возопийте на небо, да избавитеся от рук врагов ваших. И сразися брань.

⁴⁷ И простре Ионафан руку свою убити Вакхида, и уклонися и него вспять.

⁴⁸ И вскочи Ионафан и иже с ним во Иордан, и преплываху на об ону страну, и не преидоша по них Иордана.

⁴⁹ И падоша от страны Вакхидины дне онаго яко тысяща мужей.

⁵⁰ И возвратися во Иерусалим и созда грады тверды во Иудеи, твердыню во Иерихоне и яже во Еммауме и Вефороне, и Вефили и Фемнафе, и Фарафоне и Тефоне, со стенами высокими и вратами и заворами,

⁵¹ и постави стражу в них, еже враждовати Израилю:

⁵² и утверди град иже в Вефсуре, и Газару, и краеградие, и постави в них силы и предложение брашен:

⁵³ и взя сыны вождов страны в залог и посади их в краеградии во Иерусалиме под стражею.

⁵⁴ И в лето сто пятьдесят третие месяца втораго, заповеда Алким разорити стену двора святых внутренняго, и разори дела пророков, и нача разоряти.

⁵⁵ Во время оно поражен бысть Алким, и воспятишася дела его, и заградишася уста его, и разслабе и не можаше ктому глаголати слова и заповедати о доме своем.

⁵⁶ И умре Алким во время оно с мукою велиею.

⁵⁷ И виде Вакхид, яко умре Алким, и возвратися ко царю. И умолча земля Иудина лета два.

⁵⁸ И совещаша вси беззаконницы рекуще: се, Ионафан и иже с ним в покои обитают уповающе: ныне убо наведем Вакхида, и поимает их всех во едину нощь.

⁵⁹ И шедше совещашася с ним.

⁶⁰ И воста ити с силою многою и посла епистолии тай всем споборителем его, иже во Иудеи, да имут Ионафана и сущих с ним. И не возмогоша, яко познася им совет их.

⁶¹ И яша от мужей страны началников злобы пятьдесят мужей и убиша их.

⁶² И отиде Ионафан и Симон и иже с ними в Вефвасию, яже в пустыни, и созда разореная ея и укрепи ю.

⁶³ И позна Вакхид, и собра все множество свое, и сущым от Иудеи возвести.

⁶⁴ И шед ополчися на Вефвасию, и воеваше ю дни многи, и сотвори миханы.

⁶⁵ И остави Ионафан Симона брата своего во граде, и изыде во страну, и изыде в числе.

⁶⁶ И порази Одомира и братию его и сынов Фасироних в жилищих их, и нача избивати и восходити в силах.

⁶⁷ Симон же и иже с ним изыдоша из града и пожгоша миханы,

⁶⁸ и ратоваху противу Вакхида, и сотреся от них, и озлобляху его зело, яко бе совет его и поход его вотще.

⁶⁹ И прогневася яростию на мужей беззаконных, советовавших ему приити во страну, и уби от них многих, и совещася отити в землю свою.

⁷⁰ И позна Ионафан и посла к нему старейшин составити мир с ним и отдати им плен.

⁷¹ И прия, и сотвори по словесем его, и клятся ему не искати ему зла во вся дни живота его.

⁷² И отдаде ему плен, егоже прежде плени от земли Иудины: и возвращься отиде в землю свою и не приложи ктому приити в пределы их.

⁷³ И преста мечь от Израиля. И обита Ионафан в Махмасе: и нача Ионафан судити люди и истреби нечестивых от Израиля.