Библия на церковно-славянском языке - транслитерация современным русским алфавитом
(1751)

Первая книга Маккавейская

◄◄ | ◄ | Глава ⚫ | ► | ►►

¹ И бысть егда услышаша языцы окрест, яко создася олтарь и обновися святыня якоже прежде, и разгневашася зело:

² и совещашася погубити род Иаковль, иже беху посреде их, и начаша убивати в людех и истребляти.

³ И ратоваше Иуда на сыны Исавовы во Идумеи, яже во Акраватине, понеже обседяху Израиля: и порази их язвою великою, и утесни их, и взя корысти их.

⁴ И помяну злобу сынов Веаних, иже беху людем в сеть и в соблазн, во еже ловити им на путех.

⁵ И затворишася от него в пиргех, и наступи на них, и прокля их, и зажже пирги их огнем, со всеми яже в них бяху.

⁶ И пройде на сыны Аммони, и обрете руку крепку и люди многи, и Тимофеа вожда их.

⁷ И состави на них брани многи, и сотрени суть пред лицем его, и поби их,

⁸ и взя Иазира и дщери его, и возвратися во Иудею.

⁹ И собрашася языцы иже в Галаадитиде противу Израилтяном сущым в пределех их, да избиют их. И побегоша в Дафему твердыню.

¹⁰ И послаша писание ко Иуде и братии его, рекуще: собрашася на ны языцы, иже окрест нас, избити нас,

¹¹ и готовятся приити и взяти твердыню, в нюже вбегохом, и Тимофей есть воевода сил их:

¹² ныне убо пришед избави нас от руки их, яко паде множество от нас:

¹³ и вси братия наша сущии в местех Тувииних убиени суть, и плениша жен их и чад их и имения их, и погубиша тамо яко тысящу мужей.

¹⁴ И еще писания чтяхуся, и се, инии вестницы приидоша от Галилеи в раздраных ризах, возвещающе по словесем сим, рекуще:

¹⁵ собрашася на нас от Птолемаиды и Тира, и Сидона и всея Галилеи иноплеменник, еже искоренити нас.

¹⁶ Егда же услыша Иуда и людие словеса сия, собрася собор велик усоветовати, что сотворят братиям своим сущым в скорби и воюемым от них.

¹⁷ И рече Иуда Симону и брату своему: избери себе мужы и иди, и избави братию твою сущую в Галилеи: аз же и брат мой Ионафан пойдем в Галаадит.

¹⁸ И остави Иосифа сына Захариина и Азарию воеводы людем с прочими воины во Иудеи на хранение,

¹⁹ и заповеда им, глаголя: прилежите людем сим и не сотворите брани на языки, дондеже мы возвратимся.

²⁰ И отделиша Симону мужей три тысящы, да идет в Галилею, Иуде же осмь тысящ мужей в Галаадит.

²¹ И иде Симон в Галилею и состави брани многи на языки, и сотрошася языцы от лица его,

²² и погна вслед их даже до врат Птолемаиды: и падоша от язык яко три тысящы мужей, и взя корысти их,

²³ и поят сущих в Галилеи и во Арваттисех с женами и чады, и вся елика бяху им, и приведе во Иудею с веселием велиим.

²⁴ И Иуда Маккавей и Ионафан брат его преидоша Иордан, и идоша путь триех дний в пустыни,

²⁵ и сретоша Наватеев, и прияша их мирно, и поведаша им вся, яже случишася братии их в Галаадитиде,

²⁶ и яко мнози от них заключени суть в Восоре и Восор, во Алемисех, Хасфоре, Македе и Карнаине: сии вси гради тверди и велицы:

²⁷ и в прочиих градех Галаадитиды суть затворени, и во утрие строятся ополчитися на твердыни и яти и избити всех сих во един день.

²⁸ И возвратися Иуда и вои его в путь в пустыню в Восор внезапу: и взя град, и уби всяк мужеск пол усты меча, и взя вся корысти их, и сожже его огнем:

²⁹ и воста оттуду нощию и иде даже до твердыни.

³⁰ И бысть пред зарею, и воздвигоша очи свои, и се, людие мнози, имже не бе числа, несуще лествицы и миханы взяти твердыню, и ратоваху их.

³¹ И виде Иуда, яко начася брань, и вопль града взыде даже до небесе трубами и гласом велиим,

³² и рече мужем силы: бийтеся днесь за братию вашу.

³³ И изыде тремя началы созади их: и вострубиша трубами и возопиша в молитве.

³⁴ И позна полк Тимофеов, яко Маккавей есть, и отбежа от лица его, и поби их язвою велиею, и падоша от них в день он яко осмь тысящ мужей.

³⁵ И обратися (Иуда) в Масфу и повоева ю и взя ю, и уби весь мужеск пол ея и взя корысти ея, и сожже ю огнем:

³⁶ оттуду пойде и взя Хасфор, Макед и Восор и прочыя грады Галаадитиды.

³⁷ И по сих словесех собра Тимофей полк ин и ополчися к лицу Рафона об ону страну потока.

³⁸ И посла Иуда соглядати полк. И возвестиша ему глаголюще: собрани суть к нему вси языцы, иже окрест нас, сила велия зело:

³⁹ и Аравлян наяша в помощь себе, и ополчаются об ону страну потока, готови приити на тя на брань. И иде Иуда во сретение их.

⁴⁰ И рече Тимофей началником воев своих: егда приближится Иуда и полк его к потоку водному, аще приидет к нам прежде, не можем постояти противу его, яко могий возможет противу нас:

⁴¹ аще же устрашится и ополчится об ону страну реки, прейдем к нему и возможем противу его.

⁴² Егда же приближися Иуда к потоку водному, постави книжники людий при потоце и повеле им глаголя: не оставляйте всякаго человека остатися в полце, но да грядут вси на брань.

⁴³ И прейде на них прежде, и вси людие вслед его. И сотрени суть вси языцы пред лицем его, и повергоша оружия своя, и бежаша в капище, еже к Карнаине.

⁴⁴ И взяша град, и капище сожгоша огнем со всеми, яже в нем: и побежден бысть Карнаин и не возможе ктому стати противу лица Иудина.

⁴⁵ И собра Иуда всех Израилтян, иже беху в Галаадитиде, от мала даже до велика, и жены их и чада их и имения, полк велик зело, приити в землю Иудину.

⁴⁶ И приидоша даже до Ефрона, и сей град велий на входе тверд зело: и не бе уклонитися от него на десно или шуее, но токмо сквозе его проити.

⁴⁷ И заключишася, иже бяху в граде, и заградиша врата камением. И посла к ним Иуда со словесы мирными, глаголя:

⁴⁸ пройдем по земли вашей, еже отити в землю нашу, и никтоже вас изобидит, токмо ногами пройдем. И не восхотеша отверсти ему.

⁴⁹ И повеле Иуда проповедати в полце ополчитися коемуждо, в немже кто есть месте.

⁵⁰ И ополчишася мужие силы и ратоваша град той весь день и всю нощь. И предадеся град в руки его.

⁵¹ И поби всяк мужеск пол усты меча и искорени его, и взя корысти его и пройде сквозе град по убиеным.

⁵² И преидоша Иордан в поле великое противу лицу Вефсана.

⁵³ И бе Иуда собирая дальнейших и увещаваше людий по всему пути, дондеже приидут в землю Иудину.

⁵⁴ И взыдоша на гору Сион с веселием и радостию и принесоша всесожжения, яко не паде от них ни един, дондеже возвратишася в мире.

⁵⁵ И во дни, в няже бысть Иуда и Ионафан в Галааде, и Симон брат его в Галилеи противу лицу Птолемаиды,

⁵⁶ слыша Иосиф Захариин сын и Азариа, началницы силы, о вещех благосодеянных и о бранех, яже сотвориша,

⁵⁷ и реша: сотворим и мы себе имя и пойдем ратовати на языки, иже окрест нас.

⁵⁸ И возвестиша сущым от силы яже с ними и идоша на Иамнию.

⁵⁹ И изыде Горгиа из града и мужие его во сретение им на брань.

⁶⁰ И побежден бысть Иосиф и Азариа, и гнани быша даже до предел Иудиных: и падоша в день он от людий Израилевых яко две тысящы мужей. И бысть язва велика в людех Израилевых,

⁶¹ понеже не послушаша Иуды и братий его, мнящеся храбри быти:

⁶² тии же не бяху от семене мужей онех, имиже дадеся спасение Израилю рукою их.

⁶³ И муж Иуда и братия его прославишася зело пред всем Израилем и языки всеми, идеже слышашеся имя их.

⁶⁴ И совокупишася к ним благо глаголющии.

⁶⁵ И изыде Иуда и братия его, и ратоваху сынов Исавлих в земли яже к югу, и порази Хеврона и дщери его, и разори твердыни его, и столпы его пожже окрест.

⁶⁶ И воздвижеся ити в землю иноплеменников и прохождаше Самарию.

⁶⁷ В день он падоша священницы на брани, хотящии храбрее быти, внегда изыти им на брань без совета (его).

⁶⁸ И уклонися Иуда во Азот в землю иноплеменников, и разори капища их, и изваяния богов их сожже огнем, и взя корысти от градов, и возвратися в землю Иудину.