Библия на церковно-славянском языке - транслитерация современным русским алфавитом
(1751)

Первая книга Маккавейская

◄◄ | ◄ | Глава ⚫ | ► | ►►

¹ И взя Горгиа пять тысящ мужей и тысящу конник избранных, и подвигоша полк нощию,

² еже напасти на полк Иудейский и побити их внезапу, и сынове краеградия быша ему вождеве.

³ И услыша Иуда, и воста сам и сильнии, побити силу цареву, яже в Еммауме:

⁴ еще бо силы расточены быша от полка.

⁵ И прииде Горгиа в полк Иудин нощию и ни единаго обрете: и искаше их в горах, понеже рече: бежат сии от нас.

⁶ И вкупе со днем явися Иуда на поли со тремя тысящами мужей: обаче щитов и мечей не имяху, якоже хотяху.

⁷ И видеша полк языческий крепок вооружен и конники окрест его, и сии научени брани.

⁸ И рече Иуда мужем, иже с ним бяху: не убойтеся множества их и устремления их не ужасайтеся:

⁹ помяните, како спасени быша отцы наши в мори Чермнем, егда гоняше их фараон с вои многими:

¹⁰ и ныне возопиим на небо, негли како умилосердится на ны и помянет завет отцев наших и сокрушит полк сей пред лицем нашим днесь:

¹¹ и уведят вси языцы, яко есть Избавляяй и Спасаяй Израиля.

¹² И возведоша иноплеменницы очи свои и видеша их грядущих сопротиву,

¹³ и изыдоша из полка на брань и вострубиша иже со Иудою.

¹⁴ И сразишася: и сотрени быша языцы и побегоша в поле,

¹⁵ последнии же вси падоша мечем: и прогнаша их даже до Ассаримофа и даже до поль Идумейских и Азотских и Иамнийских, и падоша от них до триех тысящ мужей.

¹⁶ И возвратися Иуда и вои его от гонения вслед их,

¹⁷ и рече к людем: не вожделейте корыстей, понеже брань противу нас:

¹⁸ и Горгиа и вои его близ нас на горе: но стойте ныне противу врагов наших и поборите их, и по сих возмете корысти без боязни.

¹⁹ И еще глаголющу Иуде сия, се, явися часть некая приницающая с горы.

²⁰ И виде, яко в бег обратишася, и зажгоша полк, иже суть со Иудою, дым бо зримый являше бывшее.

²¹ Смотрящии же сия убояшася зело: видяще же ополчение Иудино в поли готово на брань, бежаша вси в землю иноплеменников.

²² И обратися Иуда на корысти ополчения:

²³ и взя злата много и сребра, и иакинфа и порфиры морския, и богатства велика.

²⁴ И возвращающеся песнь пояху и благословляху Бога небеснаго, яко благ есть, яко в век милость Его.

²⁵ И бысть спасение велико Израилю в день он.

²⁶ Елицы же от иноплеменников уцелеша, пришедше возвестиша Лисии вся случившаяся.

²⁷ Он же слышав уны душею и опечалися, яко не яже хотяше, такова быша Израилю, и не какова заповеда ему царь, сицевая сбышася.

²⁸ И во грядущее лето собра Лисиа мужей избранных шестьдесят тысящ и конников пять тысящ, да побиет Иерусалим.

²⁹ И приидоша во Идумею и ополчишася во Вефсурех, и срете их Иуда с десятию тысящьми мужей.

³⁰ И виде полк крепок, и помолися, и рече: благословен еси, Спасе Израилев, сокрушивый стремление сильнаго рукою раба Твоего Давида, и предал еси полк иноплеменных в руки Ионафана сына Сауля и носящаго оружие его:

³¹ заключи полк сей рукою людий Твоих Израиля, и да постыдятся о силе и коннице своей:

³² даждь им боязнь и растай дерзость силы их, и да поколеблются сотрением своим:

³³ низложи их мечем любящих Тя, и да восхвалят Тебе вси ведущии имя Твое в песнех.

³⁴ И составиша брань, и падоша от полка Лисии до пяти тысящ мужей, и падоша пред ними.

³⁵ Видя же Лисиа своего ополчения бывшее бежание, а Иудину бывшую дерзость, и яко готови суть или жити, или умрети храбро, отиде во Антиохию и собираше чуждих воев: и умножив бывшее воинство, умысли паки приити на Иудею.

³⁶ Рече же Иуда и братия его: се, сотрени суть врази наши, взыдем ныне очистити святая и обновити.

³⁷ И собрася весь полк и взыдоша на гору Сион:

³⁸ и видеша святыню опустошену, и жертвенник осквернен, и врата сожжена, и в притворех возрастоша древие аки в дубраве, или аки во единей от гор, и пастофориа разбиена.

³⁹ И растерзаша ризы своя и плакаша плачем велиим, и возложиша пепел на главы своя,

⁴⁰ и падоша лицем на землю, и вострубиша трубным знамением, и возопиша на небо.

⁴¹ Тогда повеле Иуда мужем ратовати сущих в краеградии, дондеже очистит святая.

⁴² И избра священники непорочны волители закона Божия:

⁴³ и очистиша святая и отвергоша камение осквернения в место нечисто:

⁴⁴ и советоваша о жертвеннице всесожжения оскверненем, что ему сотворят:

⁴⁵ и нападе им совет благ разорити его, да не когда будет им в поношение, яко оскверниша его языцы. И разориша жертвенник,

⁴⁶ и положиша камение на горе храма на месте приличнем, дондеже приидет пророк отвещати о них:

⁴⁷ и взяша камение цело по закону и создаша жертвенник нов по прежнему.

⁴⁸ И создаша святая и вся яже внутрь храма, и притворы освятиша,

⁴⁹ и сотвориша сосуды святыя новы, и внесоша светилник и жертвенник всесожжений и фимиамов и трапезу во храм,

⁵⁰ и кадиша на жертвеннице, и возжгоша светилники, яже на подсвещнице, и светяху во храме,

⁵¹ и положиша на трапезе хлебы и простроша катапетасмы, и скончаша вся дела, яже творяху.

⁵² И зело рано восташа в пятый и двадесятый день месяца девятаго: сей месяц Хаслев, сто четыредесять осмаго лета.

⁵³ И принесоша жертву по закону на олтарь всесожжений новый, егоже сотвориша:

⁵⁴ по времени и по дни, в оньже оскверниша его языцы, во он обновися в песнех и гуслех и кинирех и в кимвалех.

⁵⁵ И падоша вси людие на лице свое и поклонишася, и благословиша на небо Благопоспешившаго им:

⁵⁶ и сотвориша обновление олтаря дний осмь, и принесоша всесожжения с веселием, и пожроша жертву спасения и хваления,

⁵⁷ и украсиша сущее пред лицем храма венцы златыми и щитами, и обновиша врата и пастофориа, и поставиша двери.

⁵⁸ И бысть веселие в людех велико зело, и отвращено бысть поношение языков.

⁵⁹ И устави Иуда и братия его и весь собор Израилев, да празднуются дние обновления олтаря во времена своя на всяко лето дний осмь, от двадесять пятаго дне месяца Хаслев с веселием и радостию.

⁶⁰ И создаша во время оно гору Сион, окрест стены высокия и пирги крепки, да не когда пришедше языцы поперут я, якоже прежде сотвориша.

⁶¹ И посади ту воев хранити ю, и утвердиша ю хранити Вефсуру, еже имети людем в твердыню противу лица Идумеи.