Библия на церковно-славянском языке - транслитерация современным русским алфавитом
(1751)

Первая книга Маккавейская

◄◄ | ◄ | Глава ⚫ | ► | ►►

¹ И воста Иуда нарицаемый Маккавей сын его вместо его.

² И помогаху ему вси братия его и вси елицы прилепишася ко отцу его, и ополчахуся ополчением Израиль с веселием.

³ И распространи славу людем своим: и облечеся в броня яко исполин и препоясася оружием своим бранным, и состави рати, защищая ополчения мечем своим,

⁴ и уподобися льву в делех своих, и яко скимен рыкающь в ловитве:

⁵ и погна беззаконныя изследуяй, и смущающих люди его пожже пламенем.

⁶ И слякошася беззаконнии от страха его, и вси делателе беззакония смятошася, и благопоспешно быти спасение рукою его.

⁷ И огорчи цари многи и возвесели Иакова в делех своих, и даже до века память его во благословение:

⁸ и пройде грады Иудины, и погуби нечестивых от них, и отврати гнев от Израиля,

⁹ и именит бысть даже до последних земли, и собра погибающих.

¹⁰ Аполлоний же собра языки и от Самарии силу велию, еже ратовати на Израиля.

¹¹ И уведа Иуда и изыде во сретение ему, и порази его и уби того: и падоша язвении мнози, а прочии убегоша.

¹² И взя корысти их, и мечь Аполлониев отя Иуда, и бысть воюя им вся дни.

¹³ И услыша Сирон началник воев Сирских, яко собра Иуда совокупление и церковь верных с ним исходящих на брань,

¹⁴ и рече: сотворю себе имя, и прославлюся в царствии, и поборю Иуду и сущих с ним и уничижающих слово царево.

¹⁵ (И уготовася) и приложи еже взыти: и взыде с ним полк нечестивых крепок помощи ему и сотворити отмщение на сынех Израилевых.

¹⁶ И приближися даже до восхода Вефоронска: и изыде Иуда во сретение ему в мале.

¹⁷ Егда же увидеша полк грядущий во сретение им, реша Иуде: како можем в мале суще ополчатися противу множества толикаго крепкаго? И мы утруждени есмы постом днесь.

¹⁸ И рече Иуда: удобь есть объяти многих рукою малых: и несть разнствия пред Богом небесным спасти во многих или в малых:

¹⁹ яко не во множестве воев одоление брани есть, токмо от небесе крепость:

²⁰ сии грядут к нам во множестве укоризны и беззакония, еже исторгнути нас и жены нашя и чада наша, еже взяти корысти нашя,

²¹ мы же ополчаемся за душы нашя и законы нашя:

²² и Сам Господь сокрушит их пред лицем нашим, вы же не устрашитеся их.

²³ Якоже преста глаголати, и наскочи на них внезапу, и сотреся Сирон и вои его пред ним:

²⁴ и погна его в низхождение Вефорона даже до поля: и падоша от них яко осмь сот мужей, прочии же побегоша в землю Филистимлю.

²⁵ И нападе страх Иудин и братии его и боязнь на вся языки, яже окрест их.

²⁶ И дойде до царя имя его, и о ополчениих Иудиных поведаху вси языцы.

²⁷ Егда же услыша царь Антиох словеса сия, разгневася яростию, и послав собра силы вся царства своего, полк крепок зело:

²⁸ и отверзе сокровище свое, и даде оброки воином своим на лето, и заповеда им в лето быти готовым на всяку потребу.

²⁹ И виде, яко оскуде сребро от сокровищ, и дани от стран малы, ради несогласия и язвы, яже сотвори на земли, да возмет законная, яже бяху от первых дний.

³⁰ И устрашися, да не вознеимеет единою и дважды в росходы и даяния, яже даяше прежде пространною рукою, и избыточествова паче царей бывших прежде.

³¹ И смятеся душею своею зело, и умысли ити в Персиду и прияти дани от стран и собрати сребра много.

³² И остави Лисию человека славна и от рода царска над вещьми царскими, от реки Евфрата даже до предел Египетских:

³³ и питати Антиоха сына своего, дондеже возвратится сам.

³⁴ И предаде ему пол силы и слонов и заповеда ему о всех, ихже совеща, и о обитающих во Иудеи и Иерусалиме,

³⁵ послати на них силу, еже сокрушити и исторгнути крепость Израилеву и останок Иерусалима, и отяти память их от места,

³⁶ и вселити сынов инородных во всех пределех их, и по жребию разделити землю их.

³⁷ И царь взя пол силы оставших и изыде от Антиохии от града царства своего, лета сто четыредесять седмаго: и прейде Евфрат реку и прохождаше в вышния страны.

³⁸ И избра Лисиа Птоломеа сына Дорименова, и Никанора, и Горгию мужы сильныя от другов царевых.

³⁹ И посла с ними четыредесять тысящ мужей и седмь тысящ конников, еже ити в землю Иудину и растлити ю по словеси царску.

⁴⁰ И отидоша со всею силою своею, и приидоша, и ополчишася близ Аммаума на земли полевой.

⁴¹ И слышаша купцы страны тоя имя их, и взяша сребро и злато много зело и отроки: и приидоша в станы, да возмут сынов Израилевых в рабы, и приложишася к ним вои Сирския и земли иноплеменников.

⁴² И виде Иуда и братия его, яко умножишася злая, и вои ополчахуся в пределех их: и познаша словеса царева, яже повеле людем сотворити в погубление и скончание.

⁴³ И рече кийждо ко искреннему своему: востанем за истребление людий наших и ополчимся за люди нашя и святыя.

⁴⁴ И собрася сонм еже быти готовым на брань и еже молитися и просити милости и щедрот.

⁴⁵ И Иерусалим бе необитаемь аки пустыня: не бе входяй и исходяй от порождений его, и святыня попрана, и сынове инородных в краеградии, бысть обиталище языком: и взяся веселие от Иакова, и оскуде (ту) сопель и гусли.

⁴⁶ И собрашася и приидоша в Массифу прямо Иерусалиму, понеже место молитвы в Массифе первее Израилю.

⁴⁷ И постишася того дне, и облекошася во вретища, и пепел посыпаша на главы своя, и растерзаша одеяния своя,

⁴⁸ и распростроша книгу закона, о нихже испытаху языцы написати на них подобия идол своих,

⁴⁹ и принесоша ризы святителския и первородная и десятины: и воздвигнуша назиреев, иже наполниша дни,

⁵⁰ и возопиша гласом (велиим) на небо, рекуще: что сотворим сим и камо их отведем?

⁵¹ И Святая Твоя попрашася и осквернишася, и священницы Твои в скорби и в смирении:

⁵² и се, языцы собрашася на ны, да расторгнут нас: Ты веси, яже помышляют на нас:

⁵³ како возможем стати пред лицем их, аще не Ты поможеши нам?

⁵⁴ И вострубиша трубами и возопиша гласом велиим.

⁵⁵ И посем постави Иуда воеводы людий, тысящники и сотники, и пятьдесятники и десятоначалники.

⁵⁶ И рекоша созидающым домы и обручающым жены, и насаждающым винограды и боязливым возвратитися комуждо в дом свой по закону.

⁵⁷ И воздвижеся полк и ополчися на юг Аммаума.

⁵⁸ И рече Иуда: препояшитеся, и будите в сыны сильны, и будите готови в заутрие ополчитися на языки сия, иже собрашася на ны растерзати нас и святая наша:

⁵⁹ яко лучше есть нам умрети в брани, неже видети злая людий наших и святых:

⁶⁰ и якоже воля будет на небеси, тако сотворит.