Перевод блаженного Иеронима Стридонского книг Священного Писания на латынь - Vulgata (Вульгата)
(386-405)

Machabaeorum I

◄◄ | ◄ | Глава ⚫ | ► | ►►

¹ et facta est ira magna super populum valde

² in illis diebus surrexit Matthathias filius Iohannis filii Simeonis sacerdos ex filiis Ioarim ab Hierusalem et consedit in monte Modin

³ et habebat filios quinque Iohannan qui cognominabatur Gaddis

⁴ et Simeon qui cognominabatur Thasi

⁵ et Iudas qui vocabatur Macchabeus

⁶ et Eleazarus qui cognominabatur Abaron et Ionathas qui cognominabatur Apphus

⁷ hii viderunt mala quae fiebant in populo Iuda et in Hierusalem

⁸ et dixit Matthathias vae mihi ut quid natus sum videre contritionem populi mei et contritionem civitatis sanctae et sedere illic cum datur in manibus inimicorum

⁹ sancta in manu extraneorum facta sunt templum eius sicut homo ignobilis

¹⁰ vasa gloriae eius captiva abducta sunt trucidati sunt iuvenes eius in plateis et iuvenes eius ceciderunt gladio inimicorum

¹¹ quae gens non hereditavit regnum eius et non obtinuit spolia eius

¹² omnis conpositio eius ablata est quae erat libera facta est ancilla

¹³ et ecce sancta nostra et pulchritudo nostra et claritas nostra desolata est et coinquinaverunt eam gentes

¹⁴ quo ergo nobis adhuc vivere

¹⁵ et scidit Matthathias et filii eius vestimenta sua et operuerunt se ciliciis et planxerunt valde

¹⁶ et venerunt illuc qui missi erant a rege Antiocho ut cogerent eos qui confugerant in civitate Modin immolare et accendere et a lege Dei discedere

¹⁷ et multi de populo Israhel consentientes accesserunt ad eos sed Matthathias et filii eius constanter steterunt

¹⁸ et respondentes qui missi erant ab Antiocho dixerunt Matthathiae princeps et clarissimus et magnus es in hac civitate et ornatus filiis et fratribus

¹⁹ ergo accede prior et fac iussum regis sicut fecerunt omnes gentes et viri Iuda et qui remanserunt in Hierusalem et eris tu et filii tui inter amicos regis et amplificatus argento et auro et muneribus multis

²⁰ et respondit Matthathias et dixit magna voce et si omnes gentes regi Antiocho oboediunt ut discedat unusquisque a servitute patrum suorum et consentiunt mandatis eius

²¹ ego et filii mei et fratres mei oboediemus legi patrum nostrorum

²² propitius sit nobis Deus non est nobis utile relinquere legem et iustitias Dei

²³ non audibimus verba regis Antiochi nec sacrificabimus transgredientes legis nostrae mandata ut eamus altera via

²⁴ et ut cessavit loqui verba haec accessit quidam Iudaeus in omnium oculis sacrificare idolis super aram in civitate Modin secundum iussum regis

²⁵ et vidit Matthathias et doluit et contremuerunt renes eius et ascendit furor eius secundum iudicium legis et insiliens trucidavit eum super aram

²⁶ sed et virum quem miserat rex Antiochus qui cogebat immolari occidit in ipso tempore et aram destruxit

²⁷ et zelatus est legem sicut fecit Finees Zambri filio Salomi

²⁸ et exclamavit Matthathias voce magna dicens omnis qui zelum habet legis statuens testamentum exeat post me

²⁹ et fugit ipse et filii eius in montes et reliquerunt quaecumque habebant in civitate

³⁰ tunc descenderunt multi quaerentes iudicium et iustitiam in desertum

³¹ ut sederent ibi ipsi et filii eorum et mulieres eorum et pecora eorum quoniam induraverunt super eos mala

³² et renuntiatum est viris regis et exercitui qui erat in Hierusalem civitate David quoniam discessissent viri quidam qui dissipaverunt mandatum regis in loca occulta in deserto et abissent post illos multi

³³ et statim perrexerunt ad eos et constituerunt adversus eos proelium in die sabbatorum

³⁴ et dixerunt ad eos resistitis et nunc adhuc exite et facite secundum verbum regis et vivetis

³⁵ et dixerunt non exibimus neque faciemus verbum regis ut polluamus diem sabbatorum

³⁶ et concitaverunt adversus eos proelium

³⁷ et non responderunt eis nec oppilaverunt loca occulta

³⁸ dicentes moriamur omnes in simplicitate nostra et testes erunt super nos caelum et terra quod iniuste perditis nos

³⁹ et intulerunt eis bellum sabbatis et mortui sunt ipsi et uxores eorum et filii eorum et pecora eorum usque ad mille animas hominum

⁴⁰ et cognovit Matthathias et amici eius et luctum habuerunt super eos valde

⁴¹ et dixit vir proximo suo si omnes fecerimus sicut fratres nostri fecerunt et non pugnaverimus adversus gentes pro animabus nostris et iustificationibus nostris citius disperdent nos a terra

⁴² et cogitaverunt in illa die dicentes omnis homo quicumque venerit ad nos in bello die sabbatorum pugnemus adversus eum et non moriemur omnes sicut mortui sunt fratres nostri in occultis

⁴³ tunc congregata est ad eos synagoga Asideorum fortis viribus ex Israhel omnis voluntarius in lege

⁴⁴ et omnes qui fugiebant a malis additi sunt ad eos et facti sunt illis ad firmamentum

⁴⁵ et collegerunt exercitum et percusserunt peccatores in ira sua et viros iniquos in indignatione sua et ceteri fugerunt ad nationes ut evaderent

⁴⁶ et circuivit Matthathias et amici eius et destruxerunt aras

⁴⁷ et circumciderunt pueros incircumcisos quotquot invenerunt in finibus Israhel in fortitudine

⁴⁸ et persecuti sunt filios superbiae et prosperatum est opus in manu eorum

⁴⁹ et obtinuerunt legem de manibus gentium et de manibus regum et non dederunt cornu peccatori

⁵⁰ et adpropinquaverunt dies Matthathiae moriendi et dixit filiis suis nunc confortata est superbia et castigatio et tempus eversionis et ira indignationis

⁵¹ nunc ergo o filii aemulatores estote legis et date animas vestras pro testamento patrum

⁵² et mementote operum patrum quae fecerunt in generationibus suis et accipietis gloriam magnam et nomen aeternum

⁵³ Abraham nonne in temptatione inventus est fidelis et reputatum est ei ad iustitiam

⁵⁴ Ioseph in tempore angustiae suae custodivit mandatum et factus est dominus Aegypti

⁵⁵ Finees pater noster zelando zelum Dei accepit testamentum sacerdotii aeterni

⁵⁶ Iesus dum implet verbum factus est dux Israhel

⁵⁷ Chaleb dum testificatur in ecclesia accepit hereditatem

⁵⁸ David in sua misericordia consecutus est sedem regni in saecula

⁵⁹ Helias dum zelat zelum legis receptus est in caelum

⁶⁰ Ananias Azarias Misahel credentes liberati sunt de flamma

⁶¹ Danihel in sua simplicitate liberatus est de ore leonum

⁶² et ita cogitate per generationem et generationem quia omnes qui sperant in eum non infirmantur

⁶³ et a verbis viri peccatoris non timueritis quia gloria eius stercus et vermis est

⁶⁴ hodie extollitur et cras non invenietur quia conversus est in terram suam et cogitatio eius periet

⁶⁵ vos ergo filii confortamini et viriliter agite in lege quia in ipsa gloriosi eritis

⁶⁶ et ecce Simeon frater vester scio quod vir consilii est ipsum audite semper et ipse vobis erit pater

⁶⁷ et Iudas Macchabeus fortis viribus a iuventute sua sit vobis princeps militiae et ipse aget bellum populi

⁶⁸ et vos adducetis ad vos omnes factores legis et vindicate vindictam populi vestri

⁶⁹ et retribuite retributionem gentibus et intendite in praeceptum legis

⁷⁰ et benedixit eos et adpositus est ad patres suos

⁷¹ et defunctus est centesimo et quadragesimo et sexto anno et sepultus est a filiis suis in sepulchris patrum suorum in Modin et planxerunt eum omnis Israhel planctu magno