Библия на церковно-славянском языке - транслитерация современным русским алфавитом
(1751)

Первая книга Маккавейская

◄◄ | ◄ | Глава ⚫ | ► | ►►

¹ И виде Ионафан яко время ему споспешествует, и избра мужы и посла их в Рим составити и обновити с ними дружбу,

² и ко Спартиатом и ко иным местом посла епистолии, по томужде образу.

³ И идоша в Рим и внидоша в советный дом и рекоша: Ионафан архиерей и язык Иудейский послаша нас обновити дружбу с вами и споборение по прежнему.

⁴ И даша епистолии им к ним по месту, да проводят их в землю Иудину с миром.

⁵ И сие списание епистолий, ихже писа Ионафан ко Спартиатом:

⁶ Ионафан архиерей и старейшины людий, и жерцы и прочии людие Иудейстии, Спартиатом братии радоватися:

⁷ еще прежде посланы бяху епистолии ко Онии архиерею от Дариа царствовавшаго в вас, яко есте братия наша, якоже списание содержит:

⁸ и прия Ониа мужа посланаго славно и прият епистолии, в нихже завещано о споборении и дружбе:

⁹ и мы убо не требующе сих, утешение имуще святыя книги, яже в руках наших,

¹⁰ покусихомся послати к вам обновити братство и дружбу, еже бы не отчуждитися вас: многа бо времена проидоша, отнележе посласте к нам:

¹¹ мы убо во всяко время непрестанно и в праздники и в прочих подобающих днех воспоминаем вас в жертвах, яже приносим, и в молитвах, якоже подобает и лепо есть воспоминати братию:

¹² веселимся убо о славе вашей:

¹³ нас же обыдоша многи скорби и многи брани, и ратоваша нас царие, иже окрест нас:

¹⁴ не хотехом убо стужати вам и прочиим споборником и другом нашым во бранех сих,

¹⁵ имеем бо с небесе помощь помогающую нам, и избавихомся от враг наших, и смиришася врази наши:

¹⁶ избрахом убо Нуминиа Антиохова сына и Антипатра Иасонова, и послахом к Римляном обновити с ними дружбу и споборение прежнее:

¹⁷ заповедахом убо им и к вам поити и поздравити вас, и дати вам от нас послания о обновлении и о братстве нашем:

¹⁸ и ныне добре сотворите отвещавающе нам на сия.

¹⁹ И сие списание посланий, ихже посла онии:

²⁰ Дарий царь Спартиатов Онии священнику великому радоватися:

²¹ обретеся в писаниих о Спартиатех и Иудеех, яко суть братия и яко суть от рода Авраамля:

²² и ныне, отнележе сия познахом, добре сотворите пишуще нам о мире вашем:

²³ и мы же восписахом вам: скоти ваши и имение ваше наша суть, и яже наша ваша суть: повелехом убо, да возвестят вам сия.

²⁴ И слыша Ионафан, яко возвратишася началницы Димитриевы с силою многою, паче неже прежде, ратовати нань,

²⁵ и изыде из Иерусалима, и срете их во Амафитстей стране: не бо даде им времене, да внидут во страну его:

²⁶ и посла созиратели в полк их: и возвратишася и возвестиша ему, яко сице устрояются напасти на ня нощию.

²⁷ Егда же зайде солнце, заповеда Ионафан своим бдети и быти во оружии и готовитися на брань всю нощь, и постави стражы окрест полка.

²⁸ И слышаша супостати, яко готов есть Ионафан со своими на брань, и убояшася и ужасошася сердцем своим, и возжгоша огни в полце своем и отидоша.

²⁹ Ионафан же и иже с ним беша, не познаша даже до утра: видяху бо огни горящыя.

³⁰ И погна Ионафан вслед их и не достиже их, преидоша бо Елевферу реку.

³¹ И обратися Ионафан на Аравы, иже нарицахуся Заведее, и порази их, и взя корысти их.

³² И востав иде в Дамаск и прохождаше всю страну ту.

³³ Симон же изыде и прииде даже до Аскалона и ближних твердынь, и уклонися во Июппию и взя ю.

³⁴ Слыша бо, яко совещашася твердыню предати стране Димитриеве, и постави тамо стражу, да стрегут ю.

³⁵ И возвратися Ионафан, и собра старейшины людския, и совещася с ними созидати твердыни во Иудеи

³⁶ и возвысити стены Иерусалимския и воздвигнути высоту велию между краеградием и градом, еже бы отлучити оное от града, да будет сие на уединении, яко да ни купуют, ниже продают.

³⁷ И собрашася созидати град, паде бо стена потока, яже от востока, и уготоваша нарицаемое Хафенафа.

³⁸ И Симон созда Адиду в Сефиле и утверди врата и заворы.

³⁹ И взыска Трифон царствовати во Асии и возложити диадиму и прострети руку на Антиоха царя,

⁴⁰ и убояся, да не когда не попустит ему Ионафан и ратовати будет на него, и взыска пути, еже яти Ионафана и убити его: и востав прииде в Вефсан.

⁴¹ И изыде Ионафан во сретение ему с четыредесятию тысящию мужей избранных на ополчение и прииде в Вефсан.

⁴² И виде Трифон, яко прииде Ионафан с вои многими, и прострети нань руку убояся:

⁴³ и восприят его честно, и постави его пред всеми други своими, и даде ему дары, и заповеда всем силам своим послушати его яко себе.

⁴⁴ И рече Ионафану: вскую утрудил еси вся люди сия, брани не настоящей нам?

⁴⁵ И ныне отпусти их в домы своя, избери же себе мужей мало, иже будут с тобою, и прииди со мною во Птолемаиду, и предам тебе ю и прочыя твердыни и силы прочыя, и всех иже над потребами, и возвращься отиду: сего бо ради приидох.

⁴⁶ И веровав ему, сотвори, якоже рече, и отпусти силы, и отидоша в землю Иудину.

⁴⁷ Остави же с собою три тысящы мужей, ихже две тысящы остави в Галилеи, тысяща же идоша с ним.

⁴⁸ Егда же вниде Ионафан во Птолемаиду, заключиша врата градская во Птолемаиде, и яша его, и всех вшедших с ним убиша мечем.

⁴⁹ И посла Трифон вои и конники в Галилею и на поле великое, еже погубити всех другов Ионафановых.

⁵⁰ И познаша, яко ят бысть Ионафан и убиен и вси иже с ним, и увещаша сами себе и идоша уготовани на брань.

⁵¹ И видеша гонящии, яко о души им есть, и возвратишася.

⁵² И приидоша вси с миром в землю Иудину, и плакашася Ионафана и сущих с ним, и убояшася зело, и плакаше весь Израиль плачем велиим.

⁵³ И взыскаша вси языцы, иже окрест их, сокрушити их, реша бо:

⁵⁴ не имеют началника и помогающаго: ныне убо поратуем их и отимем от человек память их.