Святое Дабравесце (па Беларуску) пераклад Бiблейскай камiсii БПЦ МП

Святое Дабравесце паводле Лукi

◄◄ | ◄ | Глава ⚫ | ► | ►►

¹ Іісус жа, поўны Духа Святога, вярнуўся ад Іардана; і паведзены быў Духам у пустыню,

² дзе сорак дзён спакушаў Яго дыявал; і не еў нічога ў тыя дні; а як скончыліся яны, урэшце адчуў голад.

³ І сказаў Яму дыявал: калі Ты Сын Божы, скажы каменю гэтаму, каб стаў хлебам.

⁴ І сказаў Іісус яму ў адказ: напісана, што "не хлебам адным будзе жыць чалавек, а ўсякім словам Божым".

⁵ І, узвёўшы Яго на высокую гару, паказаў Яму дыявал усе царствы свету ў імгненне часу,

⁶ і сказаў Яму дыявал: Табе дам усю ўладу гэтую і славу іх, бо мне яна перададзена, і я, каму хачу, даю яе;

⁷ і вось, калі Ты паклонішся перада мною, будзе ўсё Тваё.

⁸ І ў адказ Іісус сказаў яму: адыдзі ад Мяне, сатана; бо напісана: "Госпаду Богу твайму пакланяйся і Яму аднаму служы".

⁹ І павёў Яго ў Іерусалім, і паставіў Яго на крыле храма, і сказаў Яму: калі Ты Сын Божы, кінься адсюль уніз;

¹⁰ бо напісана: "Ангелам Сваім Ён накажа пра Цябе ахаваць Цябе;

¹¹ і на руках панясуць Цябе, каб не спатыкнуўся Ты аб камень нагою Тваёю".

¹² І ў адказ Іісус сказаў яму: сказана: "не спакушай Госпада Бога твайго".

¹³ І, скончыўшы ўсё спакушэнне, дыявал адышоў ад Яго да пэўнага часу.

¹⁴ І вярнуўся Іісус у сіле Духа ў Галілею; і вестка пра Яго разышлася па ўсім наваколлі.

¹⁵ І Ён вучыў у іх сінагогах, і ўсімі быў слаўлены.

¹⁶ І прыйшоў у Назарэт, дзе быў узгадаваны, і ўвайшоў, па звычаю Свайму, у дзень суботні ў сінагогу, і ўстаў, каб чытаць.

¹⁷ І падалі Яму кнігу Ісаіі прарока; і, разгарнуўшы кнігу, Ён знайшоў месца, дзе было напісана:

¹⁸ "Дух Гасподні на Мне, бо Ён памазаў Мяне дабравесціць убогім, паслаў Мяне ацаліць скрушаных у сэрцы, абвясціць палонным вызваленне і сляпым відушчасць, адпусціць прыгнечаных на волю,

¹⁹ абвясціць год Гасподні спрыяльны.

²⁰ І, згарнуўшы кнігу, аддаў служыцелю і сеў; і вочы ўсіх у сінагозе былі звернуты да Яго.

²¹ І Ён пачаў гаварыць ім: сёння споўнілася пісанне гэтае, пачутае вамі.

²² І ўсе засведчылі Яму гэта, І дзівіліся словам благадаці, якія выходзілі з вуснаў Яго, і гаварылі: ці не Іосіфаў гэта Сын?

²³ Ён жа сказаў ім: вы, пэўна, скажаце Мне гэтае выслоўе: "лекару! ацалі самога сябе"; тое, што, як мы чулі, адбылося ў Капернауме, зрабі і тут, на бацькаўшчыне Тваёй.

²⁴ І сказаў: праўду кажу вам, што ніякага прарока не прымаюць на бацькаўшчыне яго.

²⁵ Па праўдзе кажу вам: многа было ўдоў у Ізраілі ў дні Іліі, калі зачынена было неба на тры гады і шэсць месяцаў, так што настаў голад вялікі па ўсёй зямлі;

²⁶ і ні адной з іх не быў пасланы Ілія, толькі ў Сарэпту Сідонскую, да жанчыны-ўдавы;

²⁷ і шмат было пракажоных у Ізраілі пры Елісеі прароку, і ніводзін з іх не быў ачышчаны, акрамя Неемана Сірыяніна.

²⁸ І напоўніліся ярасцю ўсе ў сінагозе, пачуўшы гэта;

²⁹ і, падняўшыся, выгналі Яго прэч з горада, і павялі Яго на верх гары, на якой горад іх быў пабудаваны, каб скінуць Яго;

³⁰ Ён жа, прайшоўшы паміж імі, адышоў.

³¹ І спусціўся ў Капернаум, горад Галілейскі; і вучыў іх па суботах.

³² І здзіўляліся вельмі вучэнню Яго, бо з уладаю было слова Яго.

³³ І быў у сінагозе чалавек, які меў духа дэмана нячыстага, і закрычаў моцным голасам,

³⁴ кажучы: пакінь; што Табе да нас, Іісусе Назараніне? Ты прыйшоў загубіць нас; ведаю Цябе, хто Ты, Святы Божы.

³⁵ Але Іісус забараніў яму, кажучы: змоўкні і выйдзі з яго. І дэман, кінуўшы яго на сярэдзіну, выйшаў з яго, зусім не пашкодзіўшы яму.

³⁶ І жах ахапіў усіх, і размаўлялі паміж сабою, гаворачы: што гэта за слова, што Ён з уладаю і сілаю загадвае духам нячыстым, і яны выходзяць?

³⁷ І разнеслася погаласка пра Яго па ўсіх навакольных мясцінах.

³⁸ [Выйшаўшы з сінагогі, Ён увайшоў у дом Сімана;] а цешча Сіманава была ахоплена моцнай гарачкай; і прасілі Яго за яе.

³⁹ І, стаўшы над ёю, Ён забараніў гарачцы; і пакінула яе; і адразу ўстаўшы, яна прыслужвала ім.

⁴⁰ А як заходзіла сонца, усе, хто меў хворых на розныя хваробы, прыводзілі іх да Яго; Ён жа, ускладаючы рукі на кожнага з іх, ацаляў іх.

⁴¹ Выходзілі таксама з многіх і дэманы, якія крычалі і казалі: Ты Хрыстос, Сын Божы. І, забараняючы, не дазваляў ім гаварыць, бо яны ведалі, што Ён Хрыстос.

⁴² А як настаў дзень, Ён, выйшаўшы, адправіўся ў пустэльнае месца; і людзі шукалі Яго, і прыйшлі да Яго, і затрымлівалі Яго, каб не адыходзіў ад іх.

⁴³ Але Ён сказаў ім: і іншым гарадам павінен дабравесціць Я Царства Божае, бо на тое Я пасланы.

⁴⁴ І прапаведаваў у сінагогах Галілейскіх.