Святое Дабравесце (па Беларуску) пераклад Бiблейскай камiсii БПЦ МП

Святое Дабравесце паводле Лукi

◄◄ | ◄ | Глава ⚫ | ► | ►►

¹ У пятнаццаты ж год праўлення кесара Тыверыя, калі Понцій Пілат быў намеснікам у Іудзеі, Ірад быў тэтрархам у Галілеі, а Філіп, брат яго тэтрархам у Ітурэі і Траханіцкай зямлі, а Лісаній тэтрархам у Авілінеі,

² пры першасвятарах Анне і Каіафе, было слова Божае да Іаана, сына Захарыі, у пустыні.

³ І прайшоў ён усё наваколле Іарданскае, прапаведуючы хрышчэнне пакаяння дзеля адпушчэння грахоў,

⁴ як напісана ў кнізе слоў Ісаіі прарока: "голас таго, хто кліча ў пустыні: падрыхтуйце шлях Госпаду, простымі зрабіце сцежкі Яму;

⁵ кожны дол няхай напоўніцца, і кожная гара і ўзгорак няхай панізяцца, і крывое няхай выпрастаецца, і няроўныя дарогі стануць гладкімі,

⁶ і ўбачыць кожная плоць збаўленне Божае".

⁷ І вось сказаў народу, які прыходзіў хрысціцца ад яго: адроддзе яхідніна! хто намовіў вас уцякаць ад будучага гневу?

⁸ Прынясіце ж годныя плады пакаяння і не думайце гаварыць самі сабе: "бацька ў нас Аўраам"; бо кажу вам, што Бог можа з камянёў гэтых узвесці дзяцей Аўрааму.

⁹ Ужо і сякера пры корані дрэў ляжыць: бо ўсякае дрэва, якое не родзіць добрага плоду, ссякаюць і кідаюць у агонь.

¹⁰ І пытаўся ў яго народ, кажучы: што ж рабіць нам?

¹¹ Ён жа гаворыць ім у адказ: хто мае дзве кашулі, няхай дасць таму, хто не мае, і хто мае ежу, няхай зробіць гэтаксама.

¹² Прыйшлі і мытнікі хрысціцца ад яго і сказалі яму: настаўнік! што нам рабіць?

¹³ А ён сказаў ім: нічога больш за вызначанае вам не спаганяйце.

¹⁴ Пыталіся ў яго таксама і воіны, гаворачы: а нам што рабіць? І сказаў ім: не чыніце крыўды нікому, не даносьце і задавальняйцеся платай сваёй.

¹⁵ Калі ж народ быў у чаканні і ўсе разважалі ў сэрцах сваіх пра Іаана, ці не Хрыстос ён, -

¹⁶ адказаў Іаан усім, гаворачы: я вадою хрышчу вас, але ідзе Мацнейшы за мяне, у Якога я няварты развязаць рамень абутку Яго; Ён будзе хрысціць вас Духам Святым і агнём.

¹⁷ Лапата Яго ў руцэ Яго, і Ён ачысціць гумно Сваё, і збярэ пшаніцу ў жытніцу сваю, а мякіну спаліць агнём непагасным.

¹⁸ І многа ў чым іншым настаўляючы, дабравесціў ён народу.

¹⁹ А Ірад тэтрарх, выкрываны ім за Ірадыяду, жонку Філіпа, брата свайго, і за ўсё ліхое, што зрабіў Ірад,

²⁰ дадаў да ўсяго яшчэ і тое, што зачыніў Іаана ў цямніцы.

²¹ І сталася: калі хрысціўся ўвесь народ, і Іісус, ахрысціўшыся, маліўся, раскрылася неба,

²² і сышоў на Яго Дух Святы ў цялесным выглядзе, як голуб, і голас быў з неба, які прамовіў: Ты Сын Мой Узлюблены, Цябе Я ўпадабаў.

²³ А Сам Іісус меў гадоў трыццаць, калі распачынаў, і быў, як думалі, Сын Іосіфаў, Іліеў,

²⁴ Матфатаў, Левіеў, Мелхіеў, Іанаеў, Іосіфаў,

²⁵ Матафіеў, Амосаў, Наумаў, Еслімаў, Наггееў,

²⁶ Маафаў, Матафіеў, Семеіеў, Іосіфаў, Іудаў,

²⁷ Іаананаў, Рысаеў, Зарававелеў, Салафіілеў, Нірыеў,

²⁸ Мелхіеў, Аддзіеў, Касамаў, Елмадамаў, Іраў,

²⁹ Іасіеў, Еліезераў, Іарымаў, Матфатаў, Левіеў,

³⁰ Сімяонаў, Іудаў, Іосіфаў, Іананаў, Еліакімаў,

³¹ Мелеаеў, Маінанаў, Маттафаеў, Нафанаў, Давідаў,

³² Іесееў, Авідаў, Ваозаў, Салмонаў, Наасонаў,

³³ Амінадаваў, Арамаў, Есромаў, Фарэсаў, Іудаў,

³⁴ Іакаваў, Ісаакаў, Аўраамаў, Фараў, Нахораў,

³⁵ Серухаў, Рагаваў, Фалекаў, Евераў, Салаў,

³⁶ Каінанаў, Арфаксадаў, Сімаў, Ноеў, Ламехаў,

³⁷ Мафусалаў, Енохаў, Іарэдаў, Малелеілаў, Каінанаў,

³⁸ Еносаў, Сіфаў, Адамаў, Божы.