Святое Дабравесце (па Беларуску) пераклад Бiблейскай камiсii БПЦ МП

Святое Дабравесце паводле Лукi

◄◄ | ◄ | Глава ⚫ | ► | ►►

¹ А ў першы дзень тыдня, вельмі рана, несучы падрыхтаваныя духмянасці, яны прыйшлі да магілы, і іншыя з імі;

² але знайшлі, што камень адвалены ад магілы,

³ і, увайшоўшы, не знайшлі цела Госпада Іісуса.

⁴ І сталася: калі яны былі ў недаўменні ад гэтага, вось з’явіліся перад імі два мужы ў бліскучым адзенні.

⁵ Калі ж яны спалохаліся і схілілі твары да зямлі, тыя сказалі ім: што вы шукаеце жывога сярод мёртвых?

⁶ Яго няма тут, Ён уваскрэс; успомніце, як Ён гаварыў вам, калі быў яшчэ ў Галілеі,

⁷ кажучы, што Сын Чалавечы мае быць аддадзены ў рукі людзей грэшных, і быць распяты, і на трэці дзень ўваскрэснуць.

⁸ І ўспомнілі яны словы Яго,

⁹ і, вярнуўшыся ад магілы, паведамілі ўсё гэта адзінаццаці і ўсім іншым.

¹⁰ Былі ж гэта Магдаліна Марыя, і Іаанна, і Марыя, маці Іакава, і іншыя з імі, якія сказалі пра гэта Апосталам.

¹¹ І здаліся ім пустымі словы гэтыя, і не паверылі ім.

¹² Але Петр, устаўшы, пабег да магілы і, нахіліўшыся, убачыў, што толькі палотны ляжаць; і пайшоў назад, здзіўляючыся ў сабе таму, што адбылося.

¹³ І вось двое з іх у той жа дзень ішлі ў паселішча, якое знаходзілася стадыях у шасцідзесяці ад Іерусаліма і называлася Эмаус;

¹⁴ і яны размаўлялі між сабою пра ўсё тое, што адбылося.

¹⁵ І сталася: калі яны размаўлялі і разважалі, Сам Іісус, наблізіўшыся, пайшоў з імі,

¹⁶ але вочы іх былі стрыманы, так што яны не пазналі Яго.

¹⁷ Ён жа сказаў ім: пра што гэта вы, ідучы, разважаеце між сабою і чаму такія засмучаныя?

¹⁸ У адказ адзін, імя якога Клеопа, сказаў Яму: Ты адзіны з падарожных у Іерусаліме не ведаеш пра тое, што адбылося ў ім у гэтыя дні?

¹⁹ І сказаў ім: пра што? Яны ж сказалі Яму: пра тое, што адбылося з Іісусам Назаранінам, Які быў прарок, моцны ў справе і слове перад Богам і ўсім народам,

²⁰ і як выдалі Яго першасвятары і начальнікі нашы для асуджэння на смерць і распялі Яго;

²¹ а мы спадзяваліся, што Ён Той, Хто павінен выбавіць Ізраіля, але пры ўсім гэтым, сёння трэці дзень, як гэта сталася;

²² але і некаторыя жанчыны з нашых уразілі нас: пабываўшы рана каля магілы

²³ і не знайшоўшы цела Яго, яны прыйшлі і казалі, што бачылі і яўленне Ангелаў, якія кажуць, што Ён жывы;

²⁴ і пайшлі некаторыя з нашых да магілы і знайшлі ўсё так, як і жанчыны сказалі, але Яго не бачылі.

²⁵ І Ён сказаў ім: о неразважлівыя і марудлівыя сэрцам, каб верыць усяму, што гаварылі прарокі!

²⁶ ці не так належала адпакутаваць Хрысту і ўвайсці ў славу Сваю?

²⁷ І, пачаўшы ад Маісея і ад прарокаў, тлумачыў ім ва ўсім Пісанні тое, што сказана пра Яго.

²⁸ І наблізіліся яны да паселішча, у якое ішлі; і Ён рабіў выгляд, што пойдзе далей;

²⁹ а яны затрымлівалі Яго, кажучы: застанься з намі, бо вечарэе і дзень на зыходзе. І Ён увайшоў, каб застацца з імі.

³⁰ І сталася: калі Ён узляжаў з імі, то, узяўшы хлеб, благаславіў і, пераламіўшы, даваў ім.

³¹ І адкрыліся ў іх вочы, і яны пазналі Яго, ды Ён стаў нябачны для іх.

³² І сказалі яны адзін аднаму: хіба не гарэла наша сэрца ў нас, калі гаварыў Ён з намі па дарозе і калі тлумачыў нам Пісанне?

³³ І, устаўшы ў той жа час, яны вярнуліся ў Іерусалім і знайшлі сабраных разам адзінаццаць і тых, што былі з імі,

³⁴ якія гаварылі, што Гасподзь сапраўды ўваскрэс і явіўся Сіману.

³⁵ А яны расказвалі, што было ў дарозе і як яны пазналі Яго пры пераламленні хлеба.

³⁶ Калі ж яны гаварылі пра гэта, Сам Іісус стаў пасярод іх і сказаў: мір вам.

³⁷ Яны ж, сумеўшыся і спалохаўшыся, думалі, што бачаць духа;

³⁸ а Ён сказаў ім: чаго вы збянтэжаныя і чаму сумненні ўваходзяць у сэрцы вашы?

³⁹ паглядзіце на рукі Мае і на ногі Мае: гэта Я Сам; дакраніцеся да Мяне і паглядзіце: дух не мае плоці і касцей, што, як бачыце, Я маю.

⁴⁰ І, сказаўшы гэта, паказаў ім рукі і ногі.

⁴¹ Калі ж яны яшчэ не верылі ад радасці і здзіўляліся, Ён сказаў ім: ці ёсць у вас тут якая ежа?

⁴² Яны ж падалі Яму кавалак печанай рыбы і мёду ў сотах.

⁴³ І, узяўшы, Ён перад імі з’еў

⁴⁴ і сказаў ім: вось словы, якія Я гаварыў вам, калі яшчэ быў з вамі, што павінна здзейсніцца ўсё, напісанае ў законе Маісеевым і ў прарокаў, і ў псалмах пра Мяне.

⁴⁵ Тады Ён адкрыў ім розум для разумення Пісанняў

⁴⁶ і сказаў ім: так напісана і так належала адпакутаваць Хрысту і ўваскрэснуць з мёртвых на трэці дзень,

⁴⁷ і каб было прапаведана ў імя Яго пакаянне і адпушчэнне грахоў ва ўсіх народах, пачынаючы з Іерусаліма;

⁴⁸ вы ж сведкі гэтага;

⁴⁹ і вось Я пашлю абяцанае Айцом Маім на вас; а вы заставайцеся ў горадзе Іерусаліме, пакуль не апранецеся сілаю з вышыні.

⁵⁰ І Ён вывеў іх да Віфаніі і, узняўшы рукі Свае, благаславіў іх.

⁵¹ І сталася: калі Ён благаслаўляў іх, то пачаў аддаляцца ад іх і ўзносіцца на неба.

⁵² І яны пакланіліся Яму і вярнуліся ў Іерусалім з радасцю вялікаю,

⁵³ і былі заўсёды ў храме, хвалячы і благаслаўляючы Бога. Амінь.