Святое Дабравесце (па Беларуску) пераклад Бiблейскай камiсii БПЦ МП

Святое Дабравесце паводле Лукi

◄◄ | ◄ | Глава ⚫ | ► | ►►

¹ Глянуўшы, Ён убачыў багатых, што клалі дары свае ў скарбніцу;

² убачыў таксама і адну бедную ўдаву, якая паклала туды дзве лепты,

³ і сказаў: праўду кажу вам, што ўдава гэтая бедная больш за ўсіх паклала;

⁴ бо ўсе гэтыя ад дастатку свайго паклалі ў дар Богу, а яна з нястачы сваёй увесь пражытак, які мела, паклала.

⁵ І калі некаторыя гаварылі пра храм, што ён каштоўнымі камянямі і дарункамі ўпрыгожаны, Ён сказаў:

⁶ прыйдуць дні, калі з таго, што вы тут бачыце, не застанецца каменя на камені, які не будзе зруйнаваны.

⁷ І спыталіся ў Яго, кажучы: Настаўнік! калі ж гэта будзе? і якое знаменне, калі павінна гэта збыцца?

⁸ Ён жа сказаў: сцеражыцеся, каб не ўвялі вас у зман; бо многія прыйдуць пад імем Маім, кажучы, што гэта Я. І гэты час наблізіўся; не ідзіце за імі.

⁹ Калі ж пачуеце пра войны і смуты, не жахайцеся, бо гэта павінна быць спачатку; але не адразу канец.

¹⁰ Тады сказаў ім: паўстане народ на народ і царства на царства,

¹¹ і будуць вялікія землятрусы месцамі, і голад, і мор, будуць і жахі, і знаменні вялікія з неба.

¹² Але перад гэтым усім пакладуць на вас рукі свае і будуць гнаць, аддаючы ў сінагогі і ў цямніцы, і павядуць да цароў і да правіцеляў за імя Маё;

¹³ будзе ж гэта вам дзеля сведчання.

¹⁴ Так што пакладзіце ў сэрцах сваіх не абдумваць загадзя, што адказваць,

¹⁵ бо Я дам вам вусны і мудрасць, якой не змогуць супрацьстаяць або пярэчыць усе праціўнікі вашы.

¹⁶ Выдадзены ж будзеце і бацькамі, і братамі, і сваякамі, і сябрамі; і заб’юць некаторых з вас;

¹⁷ і будзеце зненавіджаныя ўсімі за імя Маё;

¹⁸ але і волас з галавы вашай не прападзе;

¹⁹ цярпеннем вашым здабудзьце душы вашы.

²⁰ Калі ж убачыце акружаны войскам Іерусалім, тады ведайце, што наблізілася спусташэнне яго;

²¹ тады тыя, хто ёсць у Іудзеі, няхай бягуць у горы, а хто ў горадзе, няхай выходзяць, а хто ў ваколіцах, няхай не ўваходзяць у яго,

²² таму што гэта дні пакарання, каб споўнілася ўсё напісанае.

²³ Гора ж цяжарным і тым, што кормяць грудзьмі, у тыя дні, бо вялікае бедства будзе на зямлі і гнеў на народ гэты;

²⁴ і ўпадуць ад вастрыя мяча, і будуць адведзены ў палон ва ўсе народы, і Іерусалім будзе патаптаны язычнікамі, пакуль не скончацца часы язычнікаў.

²⁵ І будуць знаменні на сонцы і месяцы, і зорках, а на зямлі туга народаў у роспачы ад шуму марскога і хвалявання;

²⁶ і людзі будуць мярцвець ад страху і чакання таго, што надыходзіць на сусвет, бо сілы нябесныя зрушацца,

²⁷ і тады ўбачаць Сына Чалавечага, Які прыйдзе на воблаку з сілаю і славаю вялікаю.

²⁸ Калі ж пачне гэта збывацца, то выпрастайцеся і ўзніміце галовы вашы, таму што набліжаецца адкупленне ваша.

²⁹ І сказаў ім прытчу: паглядзіце на смакоўніцу і на ўсе дрэвы:

³⁰ калі яны ўжо распускаюцца, вы, бачачы гэта, самі ведаеце, што блізка лета.

³¹ Так і вы, калі ўбачыце, што гэта збываецца, ведайце, што блізка Царства Божае.

³² Праўду кажу вам: не міне род гэты, як усё гэта будзе;

³³ неба і зямля мінуць, а словы Мае не мінуць.

³⁴ Сцеражыцеся, каб сэрцы вашы не абцяжарваліся абжорствам і п’янствам, і клопатамі жыццёвымі, і каб не прыйшоў да вас неспадзявана дзень той;

³⁵ бо ён, як пастка, прыйдзе на ўсіх, што жывуць на абліччы ўсёй зямлі;

³⁶ дык будзьце пільныя і ўвесь час маліцеся, каб спадобіліся вы пазбегнуць усяго гэтага, што мае адбыцца, і стаць перад Сынам Чалавечым.

³⁷ Удзень Ён вучыў у храме, а ночы, выходзячы, праводзіў на гары, называнай Елеонскаю.

³⁸ І ўвесь народ з раніцы прыходзіў да Яго ў храм слухаць Яго.