Бiблiя беларуская - пераклад Василя Сёмухи
(1995, Минск)

Паводле Лукаша

◄◄ | ◄ | Глава ⚫ | ► | ►►

¹ У адзін з тых дзён, калі Ён вучыў людзей у храме і зьвеставаў, падступіліся першасьвятары і кніжнікі з старэйшынамі

² і сказалі Яму: скажы нам, якою ўладаю Ты гэта робіш, альбо хто Табе даў уладу такую?

³ Ён сказаў ім у адказ: і Я ў вас пра адно папытаюся, і скажэце Мне:

⁴ хрышчэньне Янава зь нябёсаў было, ці ад людзей?

⁵ А яны, разважаючы паміж сабою, казалі: калі скажам: зь нябёсаў, дык скажа: "чаму ж вы не паверылі яму?",

⁶ а калі скажам: "ад людзей", дык увесь люд паб'е нас камянямі, бо ён упэўнены, што Ян ёсьць прарок.

⁷ І адказвалі: ня ведаем адкуль.

⁸ Ісус сказаў ім: і Я не скажу вам, якою ўладаю гэта раблю.

⁹ І пачаў Ён гаварыць народу прытчу такую: адзін чалавек насадзіў вінаграднік і аддаў яго вінаградарам, і адлучыўся на доўгі час;

¹⁰ і ў свой час паслаў да вінаградараў раба, каб яны далі яму пладоў зь вінаградніка; але вінаградары, прыбіўшы яго, адаслалі ні з чым.

¹¹ Яшчэ паслаў другога раба; але яны і гэтага, прыбіўшы і зганіўшы, адаслалі ні з чым.

¹² І яшчэ паслаў трэйцяга; але яны і таго, пакалечыўшы, выгналі.

¹³ Тады сказаў гаспадар вінаградніка: што мне рабіць? пашлю сына майго любаснага; можа, убачыўшы яго, пасаромеюцца.

¹⁴ Але вінаградары, убачыўшы яго, разважалі паміж сабою, кажучы: гэта спадчыньнік; хадзем, заб'ём яго, і спадчына ягоная будзе наша.

¹⁵ І, вывеўшы яго вонкі зь вінаградніка, забілі. Што ж зробіць зь імі гаспадар вінаградніка?

¹⁶ Прыйдзе і загубіць вінаградараў тых і аддасьць вінаграднік іншым. Тыя, што чулі гэта, сказалі: хай ня будзе!

¹⁷ Але Ён, зірнуўшы на іх, сказаў: што азначае гэта, напісанае: "камень, які адкінулі будаўнікі, той самы зрабіўся каменем кутнім"?

¹⁸ Кожны, хто ўпадзе на той камень, разаб'ецца; а на каго ён упадзе, таго раздушыць.

¹⁹ І намышлялі тым часам першасьвятары і кніжнікі, каб накласьці на Яго рукі, але пабаяліся народу, бо зразумелі, што пра іх сказаў Ён гэтую прытчу.

²⁰ І сочачы за Ім, падаслалі падступных людзей, якія прыкінуўшыся пабожнымі, падлавілі б Яго на якім-небудзь слове, каб перадаць Яго начальству і ўладзе правіцеля.

²¹ І яны спыталіся ў Яго: Настаўнік! мы ведаем, што Ты праўдзіва гаворыш і вучыш, і не зважаеш на аблічча, а праўдзіва шляху Божаму вучыш;

²² ці дазваляецца нам даваць падатак кесару, ці не?

²³ А Ён, разгадаўшы злахітрасьць іхную, сказаў ім: што вы Мяне спакушаеце?

²⁴ пакажэце Мне дынар: чыя на ім выява і надпіс? Яны адказвалі: кесаравыя.

²⁵ Ён ім сказаў: дык аддайце кесару кесаравае, а Божае Богу.

²⁶ І не маглі падлавіць Яго ў слове перад людзьмі і, зьдзівіўшыся з адказу Ягонага, замоўклі.

²⁷ Тады падыйшлі некаторыя з садукеяў, што адмаўляюць уваскрэсеньне, і спыталіся ў Яго:

²⁸ Настаўнік! Майсей напісаў нам, што калі ў каго памрэ брат, які меў жонку, і памрэ бязьдетны, дык брат ягоны павінен узяць ягоную жонку і адрадзіць семя брату свайму.

²⁹ Было сем братоў: першы, узяўшы жонку, памёр бязьдзетны;

³⁰ узяў тую жонку другі, і той памёр бязьдетны;

³¹ узяў яе трэйці, таксама і ўсе сямёра, і памерлі, не пакінуўшы дзяцей;

³² пасьля ўсіх памерла і жонка.

³³ Дык вось, ва ўваскрэсеньні, катораму зь іх яна будзе жонкаю? бо сямёра яе мелі за жонку.

³⁴ Ісус сказаў ім у адказ: дзеці веку гэтага жэняцца і выходзяць замуж;

³⁵ а тыя, што спадобіліся дасягнуць таго веку і ўваскрэсеньня зь мёртвых, ні жэняцца, ні замуж ня выходзяць,

³⁶ і памерці ўжо ня могуць, бо яны роўныя анёлам і ёсьць сыны Божыя, будучы сынамі ўваскрэсеньня;

³⁷ а што мёртвыя ўваскрэснуць, і Майсей паказаў пры купіне, калі назваў Госпада Богам Абрагама і Богам Ісака і Богам Якава.

³⁸ Бог жа ня ёсьць Бог мёртвых, а жывых, бо ў Яго ўсе жывыя.

³⁹ На гэта некаторыя з кніжнікаў сказалі: Настаўнік! Ты добра сказаў.

⁴⁰ І ўжо не адважваліся распытваць Яго ні пра што. А Ён сказаў ім:

⁴¹ як кажуць, Хрыстос ёсьць сын Давідаў?

⁴² А сам Давід кажа ў кнізе Псальмаў: "сказаў Гасподзь Госпаду майму: сядзі праваруч ад Мяне,

⁴³ пакуль пакладу ворагаў Тваіх у падножжа ног Тваіх".

⁴⁴ Дык вось, Давід Госпадам называе Яго: як жа Ён сын яму?

⁴⁵ І калі слухаў увесь народ, Ён сказаў вучням Сваім:

⁴⁶ Асьцерагайцеся кніжнікаў, якія любяць хадзіць у доўгім адзеньні і любяць вітаньні на сходах народных, сядзець наперадзе ў сынагогах, і ўзьляжаць наперадзе на гасьцінах,

⁴⁷ якія паядаюць дамы ўдоваў і крывадушна доўга моляцца; яны прымуць тым большую асуду.