Святое Дабравесце (па Беларуску) пераклад Бiблейскай камiсii БПЦ МП

Святое Дабравесце паводле Лукi

◄◄ | ◄ | Глава ⚫ | ► | ►►

¹ І сталася ў тыя дні: выйшаў указ ад кесара Аўгуста зрабіць перапіс па ўсёй зямлі.

² Гэта быў першы перапіс, калі Сірыяй правіў Квірыній.

³ І ўсе ішлі запісвацца, кожны ў свой горад.

⁴ Пайшоў таксама і Іосіф з Галілеі, з горада Назарэта, у Іудзею, у горад Давідаў, які называецца Віфлеем, бо ён быў з дому і роду Давідавага,

⁵ запісацца з Марыяй, заручонай з ім Жонкай, Якая была цяжарная.

⁶ І сталася: калі яны былі там, споўніліся дні, каб радзіць Ёй;

⁷ і нарадзіла Сына Свайго Першынца, і спавіла Яго, і паклала Яго ў яслях, бо не было ім месца ў гасцініцы.

⁸ У той краіне былі пастухі, што пільнавалі і неслі начную варту каля статку свайго.

⁹ І вось Ангел Гасподні стаў перад імі, і слава Гасподня азарыла іх; і напоўніліся страхам вялікім.

¹⁰ І сказаў ім Ангел: не бойцеся, бо вось абвяшчаю вам радасць вялікую, якая будзе ўсяму народу:

¹¹ нарадзіўся вам сёння ў горадзе Давідавым Збавіцель, Які ёсць Хрыстос Гасподзь;

¹² і вось вам знак: вы знойдзеце Дзіцятка спавітае, што ляжыць у яслях.

¹³ І раптам з‘явілася з Ангелам шматлікае воінства нябеснае, усхваляючы Госпада і прамаўляючы:

¹⁴ слава ў вышніх Богу і на зямлі мір, у людзях добрая воля.

¹⁵ І сталася: калі адышлі ад іх Ангелы на неба, людзі-пастухі казалі адзін аднаму: пойдзем у Віфлеем і паглядзім тое, што адбылося, пра што Гасподзь абвясціў нам.

¹⁶ І, спяшаючыся, прыйшлі, і знайшлі Марыю і Іосіфа, і Дзіцятка, што ляжала ў яслях.

¹⁷ Убачыўшы ж, абвясцілі тое, што было сказана ім пра гэтае Дзіця.

¹⁸ І ўсе, хто чуў, здзіўляліся таму, што казалі ім пастухі.

¹⁹ А Марыя захоўвала ўсе словы гэтыя, складаючы ў сэрцы Сваім.

²⁰ І вярнуліся пастухі, славячы і хвалячы Бога за ўсё, што пачулі і ўбачылі, як было сказана ім.

²¹ І калі споўнілася восем дзён, каб абрэзаць Дзіця, далі імя Яму Іісус, названае Ангелам перш, чым Ён зачаты быў ва ўлонні.

²² І калі споўніліся дні ачышчэння іх паводле закону Маісеевага, прынеслі Яго ў Іерусалім, каб прадставіць Яго Госпаду, -

²³ як напісана ў законе Гасподнім: каб кожнае дзіця мужчынскага полу, што раскрывае ўлонне, было пасвячона Госпаду, -

²⁴ і каб прынесці ахвяру паводле сказанага ў законе Гасподнім: пару горліц або дваіх птушанят галубіных.

²⁵ І вось, быў у Іерусаліме чалавек, імя якому Сімяон. І чалавек гэты, праведны і богабаязны, чакаў суцяшэння Ізраіля, і Дух Святы быў на ім.

²⁶ І было яму прадвешчана Духам Святым, што ён не ўбачыць смерці, пакуль не ўбачыць Хрыста Гасподняга.

²⁷ І прыйшоў ён у Духу ў храм. І калі бацькі прынеслі Дзіця Іісуса, каб выканаць над Ім устаноўленае па закону,

²⁸ ён узяў Яго на рукі, благаславіў Бога і сказаў:

²⁹ цяпер адпускаеш раба Твайго, Уладыка, паводле слова Твайго, з мірам;

³⁰ бо бачылі вочы мае збаўленне Тваё,

³¹ якое Ты ўгатаваў перад абліччам усіх народаў,

³² святло для асветы язычнікаў і славу народа Твайго Ізраіля.

³³ Іосіф жа і Маці Яго здзіўляліся сказанаму пра Яго.

³⁴ І благаславіў іх Сімяон і сказаў Марыі, Маці Яго: вось, Ён ляжыць для падзення і паўстання многіх у Ізраілі і на знаменне супярэчання, -

³⁵ і Табе Самой душу пратне меч, - каб адкрыліся многіх сэрцаў помыслы.

³⁶ І была Анна прарочыца, дачка Фануілава, з калена Асіравага, якая дасягнула глыбокай старасці, пражыўшы з мужам сем год ад дзявоцтва свайго,

³⁷ удава гадоў васьмідзесяці чатырох, якая не адыходзіла ад храма, пастамі і малітвамі служачы Богу дзень і ноч.

³⁸ І яна ў той самы час падышоўшы, славіла Госпада і гаварыла пра Яго ўсім, хто чакаў збаўлення ў Іерусаліме.

³⁹ І калі выканалі яны ўсё паводле Закону Гасподняга, вярнуліся ў Галілею, у горад свой Назарэт.

⁴⁰ Дзіця ж расло і ўмацоўвалася духам, напаўняючыся мудрасцю, і благадаць Божая была на Ім.

⁴¹ І хадзілі бацькі Яго штогод у Іерусалім на свята Пасхі.

⁴² І калі Яму было дванаццаць гадоў, узышлі яны ў Іерусалім, паводле звычаю свята,

⁴³ і правялі тыя дні; і калі вярталіся яны, застаўся Хлопчык Іісус у Іерусаліме; і не ведалі Іосіф і Маці Яго;

⁴⁴ думаючы, што Ён разам са спадарожнымі, прайшлі яны дзённы шлях; і сталі шукаць Яго сярод сваякоў і знаёмых;

⁴⁵ і не знайшоўшы Яго, вярнуліся ў Іерусалім, шукаючы Яго.

⁴⁶ І сталася: праз тры дні знайшлі Яго ў храме, калі сядзеў Ён сярод настаўнікаў, слухаў іх і пытаўся ў іх;

⁴⁷ і дзівіліся ўсе, хто слухаў Яго, розуму і адказам Яго.

⁴⁸ І ўбачыўшы Яго, яны вельмі здзівіліся, і Маці Яго сказала Яму: Дзіця! чаму Ты зрабіў нам так? Вось, бацька Твой і Я, пакутуючы, шукалі Цябе.

⁴⁹ І сказаў Ён ім: чаго ж вы шукалі Мяне? хіба вы не ведалі, што Я павінен быць у тым, што належыць Айцу Майму?

⁵⁰ Але яны не зразумелі слова, якое Ён казаў ім.

⁵¹ І Ён пайшоў з імі, і прыйшоў у Назарэт; і быў паслухмяны ім. І Маці Яго захоўвала ўсе словы гэтыя ў сэрцы Сваім.

⁵² А Іісус узрастаў у мудрасці і гадах, і ў любві ў Бога і ў людзей.