Святое Дабравесце (па Беларуску) пераклад Бiблейскай камiсii БПЦ МП

Святое Дабравесце паводле Лукi

◄◄ | ◄ | Глава ⚫ | ► | ►►

¹ Сказаў жа Ён ім і прытчу пра тое, што трэба заўсёды маліцца і не падаць духам,

² кажучы: у адным горадзе быў нейкі суддзя, які Бога не баяўся і людзей не саромеўся.

³ І была ў тым горадзе адна ўдава; і яна прыходзіла да яго і казала: абарані мяне ад праціўніка майго.

⁴ А ён доўга не хацеў. Потым жа сказаў сам сабе: хоць я і Бога не баюся, і людзей не саромеюся,

⁵ але паколькі робіць мне клопат гэтая ўдава, абараню яе, каб яна не прыходзіла бясконца і не дакучала мне.

⁶ І сказаў Гасподзь: чуеце, што гаворыць суддзя няправедны?

⁷ А хіба Бог не стане на абарону выбраных Сваіх, якія клічуць Яго дзень і ноч, і будзе марудзіць у дачыненні да іх?

⁸ Кажу вам, што Ён хутка стане на абарону іх. Аднак, Сын Чалавечы, прыйшоўшы, ці знойдзе веру на зямлі?

⁹ Сказаў жа і да некаторых, што былі ўпэўнены ў сабе, быццам яны праведнікі, а іншых прыніжалі, такую прытчу:

¹⁰ Два чалавекі ўвайшлі ў храм памаліцца: адзін фарысей, а другі мытнік.

¹¹ Фарысей, стаўшы, маліўся сам у сабе так: Божа! дзякую Табе, што я не такі, як іншыя людзі - рабаўнікі, няправедныя, распуснікі, або як гэты мытнік:

¹² пашчу два разы на тыдзень, даю дзесяціну з усяго, што набываю.

¹³ Мытнік жа, стоячы воддаль, не смеў і вачэй узняць да неба, а біў сябе ў грудзі, кажучы: Божа! будзь міласцівы да мяне, грэшнага.

¹⁴ Кажу вам, што гэты пайшоў у дом свой больш апраўданы, чым той: бо кожны, хто ўзвышае сябе, будзе прыніжаны, а хто прыніжае сябе, будзе ўзвышаны.

¹⁵ Прыносілі да Яго і малых дзяцей, каб Ён дакрануўся да іх; убачыўшы гэта, вучні забаранялі ім.

¹⁶ Іісус жа, паклікаўшы іх, сказаў: пусціце дзяцей прыходзіць да Мяне і не перашкаджайце ім, бо такіх ёсць Царства Божае;

¹⁷ праўду кажу вам: хто не прыме Царства Божага, як дзіця, той не ўвойдзе ў яго.

¹⁸ І спытаўся ў Яго нейкі начальнік, кажучы: Настаўнік добры! што мне рабіць, каб унаследаваць жыццё вечнае?

¹⁹ Сказаў жа яму Іісус: што называеш Мяне добрым? Ніхто не добры, толькі адзін Бог;

²⁰ ведаеш запаведзі: "не пралюбадзейнічай, не забівай, не крадзі, не сведчы лжыва, шануй бацьку твайго і маці тваю".

²¹ Ён жа сказаў: усё гэта захаваў я з юнацтва майго.

²² Пачуўшы гэта, Іісус сказаў яму: яшчэ аднаго табе не хапае: усё, што маеш, прадай і раздай убогім, і мець будзеш скарб на небе, і прыходзь, і ідзі за Мною.

²³ Ён жа, пачуўшы гэта, моцна засмуціўся, таму што быў вельмі багаты.

²⁴ Убачыўшы, што той моцна засмуціўся, Іісус сказаў: як цяжка тым, хто мае багацце, увайсці ў Царства Божае!

²⁵ Бо лягчэй вярблюду прайсці праз ігольнае вушка, чым багатаму ўвайсці ў Царства Божае.

²⁶ І сказалі тыя, што чулі: хто ж тады можа быць збаўлены?

²⁷ Ён жа сказаў: немагчымае людзям магчыма Богу.

²⁸ І сказаў Пётр: вось, мы ўсё пакінулі і пайшлі ўслед за Табою.

²⁹ Ён жа сказаў ім: праўду кажу вам: няма нікога, хто пакінуў дом, ці бацькоў, ці братоў, ці сясцёр, ці жонку, ці дзяцей дзеля Царства Божага,

³⁰ і не атрымае ў шмат разоў больш у час гэты, а ў веку будучым жыцця вечнага.

³¹ І, узяўшы дванаццаць вучняў, сказаў ім: вось, мы ўзыходзім у Іерусалім, і збудзецца ўсё напісанае прарокамі пра Сына Чалавечага:

³² бо Ён выдадзены будзе язычнікам і абсмяяны, і зняважаны, і апляваны,

³³ і пасля бічавання заб’юць Яго; і на трэці дзень уваскрэсне.

³⁴ Але яны нічога з гэтага не зразумелі; і было слова гэтае скрыта ад іх, і яны не ўсведамлялі сказанага.

³⁵ І сталася: калі Ён набліжаўся да Іерыхона, нейкі сляпы сядзеў пры дарозе, жабруючы;

³⁶ і пачуўшы, што міма праходзіць натоўп, пытаўся: што гэта такое?

³⁷ Паведамілі яму, што Іісус Назаранін праходзіць.

³⁸ І закрычаў ён, кажучы: Іісусе, Сыне Давідаў, памілуй мяне!

³⁹ І тыя, што ішлі спераду, патрабавалі ад яго, каб замоўк, але ён яшчэ мацней крычаў: Сыне Давідаў, памілуй мяне!

⁴⁰ Спыніўшыся, Іісус загадаў прывесці яго да Сябе. Калі ж той наблізіўся да Яго, спытаў яго,

⁴¹ кажучы: што хочаш, каб Я зрабіў табе? Ён жа сказаў: Госпадзі! каб я стаў бачыць.

⁴² Іісус сказаў яму: стань відушчым! вера твая ўратавала цябе.

⁴³ І ён адразу стаў бачыць і пайшоў услед за Ім, славячы Бога. І ўсе людзі, пабачыўшы гэта, узнеслі хвалу Богу.