Бiблiя беларуская - пераклад Василя Сёмухи
(1995, Минск)

Паводле Лукаша

◄◄ | ◄ | Глава ⚫ | ► | ►►

¹ Сказаў Ісус таксама вучням Сваім: немагчыма ня прыйсьці звадам, але гора таму, праз каго яны прыходзяць:

² лепш было б яму, калі б мельны жарон павесілі яму на шыю і кінулі яго ў мора, чым калі б ён спакусіў аднаго з малых гэтых.

³ Глядзеце на сябе. Калі ж згрэшыць супроць цябе брат твой, ушчуй яго, і калі пакаецца, даруй яму.

⁴ і калі сем разоў на дзень згрэшыць супроць цябе і сем разоў на дзень навернецца, і скажа: каюся, - даруй яму.

⁵ І сказалі апосталы Госпаду: памнож у нас веру.

⁶ Гасподзь сказаў: калі б вы мелі веру зь зерне гарчычнае і сказалі смакоўніцы гэтай: вырвіся і перасадзіся ў мора, - дык яна паслухалася б вас.

⁷ Хто з вас, маючы раба, які арэ альбо пасьвіць, калі вернецца ён з поля, скажа яму: хадзі хутчэй, сядай за стол?

⁸ Наадварот, ці ня скажа яму: прыгатуй мне павячэраць і, падперазаўшыся, служы мне, пакуль буду есьці і піць, і потым еж і пі сам?

⁹ Ці будзе ён дзякаваць рабу гэтаму за тое, што ён выканаў загад? ня думаю.

¹⁰ Гэтак сама і вы, калі выканаеце ўсё загаданае вам, кажэце: мы рабы нічога ня вартыя, бо зрабілі, што павінны былі зрабіць.

¹¹ Ідучы ў Ерусалім, Ён праходзіў паміж Самарыяй і Галілеяю.

¹² І калі ўваходзіў Ён у адно селішча, сустрэлі Яго дзесяць чалавек пракажоных, якія спыніліся зводдаль,

¹³ і моцным голасам казалі: Ісусе Настаўнік, памілуй нас.

¹⁴ Убачыўшы іх, Ён сказаў ім: ідзеце, пакажэцеся сьвятарам. І пакуль яны ішлі, ачысьціліся.

¹⁵ А адзін зь іх, бачачы, што ацалёны, вярнуўся, моцным голасам услаўляючы Бога,

¹⁶ і ўпаў ніцма да ног Ягоных, дзякуючы Яму; і гэта быў Самаранін.

¹⁷ Тады Ісус сказаў: ці ня дзесяць ачысьціліся? дзе ж дзевяць?

¹⁸ як яны не вярнуліся ўзьнесьці славу Богу, апрача гэтага іншапляменца?

¹⁹ І сказаў яму: устань, ідзі; вера твая ўратавала цябе.

²⁰ А як спыталіся ў Яго фарысэі, калі прыйдзе Царства Божае, адказваў ім: ня прыйдзе Царства Божае ўвачавідкі,

²¹ і ня скажуць: вось, яно тут, альбо: вось, там. Бо вось, Царства Божае ўнутры ў вас ёсьць.

²² Сказаў таксама вучням: прыйдуць дні, калі захочаце бачыць хоць адзін зь дзён Сына Чалавечага, і ня ўбачыце;

²³ і скажуць вам: вось, тут, альбо: вось, там, - ня ідзеце і ня гневайцеся:

²⁴ бо як маланка, што бліснула з аднаго краю неба, бліскае да другога краю неба, так будзе Сын Чалавечы ў дзень Свой.

²⁵ Але сьпярша належыць Яму шмат адпакутаваць і быць адкінутым родам гэтым.

²⁶ І як было ў дні Ноя, так будзе і ў дні Сына Чалавечага:

²⁷ елі, пілі, жаніліся, выходзілі замуж, да таго дня, як увайшоў Ной у каўчэг, і прыйшоў патоп і зьнішчыў усіх.

²⁸ Гэтак сама было і ў дні Лота: елі, пілі, куплялі, прадавалі, садзілі, будавалі;

²⁹ але ў дзень, калі Лот выйшаў з Садомы, праліўся зь неба дождж агнявы і серны і вынішчыў усіх:

³⁰ так будзе і ў той дзень, калі Сын Чалавечы адкрыецца.

³¹ У той дзень, хто будзе на даху, а рэчы ягоныя ў доме, той ня сыходзь узяць іх; і хто будзе на полі, таксама не вяртайся назад;

³² успамінайце жонку Лотаву.

³³ Хто будзе ашчаджаць душу сваю, той загубіць яе; а хто загубіць яе, той ажывіць яе.

³⁴ Маўляю вам: у тую ноч будуць двое на адной пасьцелі: адзін возьмецца, а другі пакінецца;

³⁵ дзьве будуць малоць разам: адна возьмецца, а другая пакінецца:

³⁶ двое будуць на полі: адзін возьмецца, а другі пакінецца.

³⁷ На гэта сказалі Яму: дзе, Госпадзе? А Ён сказаў ім: дзе труп, там зьбяруцца і арлы.