Святое Дабравесце (па Беларуску) пераклад Бiблейскай камiсii БПЦ МП

Святое Дабравесце паводле Лукi

◄◄ | ◄ | Глава ⚫ | ► | ►►

¹ Сказаў жа Ён вучням Сваім: немагчыма, каб не прыйшлі спакусы, але гора таму, праз каго яны прыходзяць;

² лепш было б яму, калі б жарон млыновы павесілі на шыю яму ды ўкінулі ў мора, чым каб ён спакусіў аднаго з малых гэтых.

³ Будзьце ўважлівымі да сябе. Калі саграшыць супраць цябе брат твой, выгавары яму, і калі пакаецца, даруй яму;

⁴ і калі сем разоў на дзень саграшыць супраць цябе, і сем разоў на дзень звернецца, кажучы: каюся, - даруй яму.

⁵ І сказалі Апосталы Госпаду: прымнож нам веру.

⁶ Гасподзь жа сказаў: калі б вы мелі веру з гарчычнае зерне і сказалі шаўкоўніцы гэтай: вырвіся з коранем і перасадзіся ў мора, - і яна паслухалася б вас.

⁷ Хто з вас, маючы раба, які арэ ці пасе, пасля вяртання яго з поля, скажа яму: адразу ж ідзі за стол?

⁸ А хіба не скажа яму: прыгатуй мне павячэраць і, падперазаўшыся, служы мне, пакуль буду есці і піць, а потым еж і пі сам?

⁹ Ці падзякуе ён рабу гэтаму, што зрабіў загаданае? Не думаю.

¹⁰ Так і вы, калі зробіце ўсё загаданае вам, кажыце: мы нічога не вартыя рабы, бо зрабілі тое, што павінны зрабіць.

¹¹ І сталася: ідучы ў Іерусалім, Ён праходзіў паміж Самарыяй і Галілеяй.

¹² І калі ўваходзіў Ён у нейкае паселішча, сустрэлі Яго дзесяць чалавек пракажоных, якія спыніліся воддаль;

¹³ і яны голасна казалі: Іісусе Настаўнік, памілуй нас.

¹⁴ І, убачыўшы, Ён сказаў ім: ідзіце, пакажыцеся святарам. І сталася: калі яны ішлі - ачысціліся.

¹⁵ Адзін жа з іх, убачыўшы, што ацаліўся, вярнуўся, голасна славячы Бога,

¹⁶ і ўпаў ніц да ног Яго, дзякуючы Яму, і гэта быў Самаранін.

¹⁷ І ў адказ Іісус сказаў: ці не дзесяць ачысціліся? а дзе ж дзевяць?

¹⁸ хіба не знайшлося з іх нікога, хто б вярнуўся аддаць хвалу Богу, акрамя гэтага іншародца?

¹⁹ І сказаў яму: устань і ідзі, вера твая ўратавала цябе.

²⁰ А як спыталіся фарысеі, калі прыйдзе Царства Божае, Ён, адказваючы ім, сказаў: не прыйдзе Царства Божае прыкметна,

²¹ і не скажуць: вось, яно тут, ці: вось, там. Бо вось, Царства Божае ўнутры вас.

²² Сказаў жа вучням Сваім: прыйдуць дні, калі пажадаеце ўбачыць хоць бы адзін з дзён Сына Чалавечага, і не ўбачыце;

²³ і скажуць вам: вось, тут, ці: вось, там, - не выходзьце і не ганяйцеся;

²⁴ бо як маланка, бліскаючы, ад аднаго краю нябёс да другога свеціць, так будзе Сын Чалавечы ў дзень Свой.

²⁵ Але перш належыць Яму многа адпакутаваць і быць адрынутым родам гэтым.

²⁶ І як было ў дні Ноя, так будзе і ў дні Сына Чалавечага:

²⁷ елі, пілі, жаніліся, выходзілі замуж да таго дня, як увайшоў Ной у каўчэг; і прыйшоў патоп і вынішчыў усіх.

²⁸ Таксама, як было і ў дні Лота: елі, пілі, куплялі, прадавалі, садзілі, будавалі;

²⁹ а ў той дзень, калі выйшаў Лот з Садома, праліліся дажджом з неба агонь і сера і вынішчылі ўсіх;

³⁰ так будзе і ў той дзень, калі Сын Чалавечы явіцца.

³¹ У той дзень хто будзе на даху, а рэчы яго ў доме, няхай не сыходзіць узяць іх; і хто будзе на полі, таксама няхай не вяртаецца назад.

³² Памятайце пра жонку Лотаву.

³³ Хто будзе старацца ўратаваць душу сваю, той загубіць яе, а хто загубіць яе, той ажывіць яе.

³⁴ Кажу вам: у тую ноч будуць двое на адной пасцелі: адзін будзе ўзяты, а другі пакінуты;

³⁵ будуць дзве разам малоць: адна будзе ўзята, а другая пакінута;

³⁶ двое будуць на полі: адзін будзе ўзяты, а другі пакінуты.

³⁷ І ў адказ сказалі Яму: дзе, Госпадзі? Ён жа сказаў ім: дзе цела, там збяруцца і арлы.