Бiблiя беларуская - пераклад Василя Сёмухи
(1995, Минск)

Паводле Лукаша

◄◄ | ◄ | Глава ⚫ | ► | ►►

¹ Наблізіліся да Яго ўсе мытнікі і грэшнікі слухаць Яго.

² А фарысэі і кніжнікі наракалі, кажучы: Ён прымае грэшнікаў і есьць зь імі.

³ Але Ён сказаў ім наступную прытчу:

⁴ хто з вас, маючы сто авечак і згубіўшы адну зь іх, не пакіне дзевяноста дзевяцёх ў пустыні і ня пойдзе па прапалую, пакуль ня знойдзе яе?

⁵ А знайшоўшы, возьме яе на плечы свае з радасьцю;

⁶ і прыйшоўшы дамоў, пакліча сяброў і суседзяў і скажа ім; парадуйцеся са мною, я знайшоў маю прапалую авечку.

⁷ Маўляю вам, што так на нябёсах болей радасьці будзе за аднаго грэшніка, які каецца, чым за дзевяноста дзевяцёх праведнікаў, якія ня маюць патрэбы ў каяньні.

⁸ Альбо якая жанчына, маючы дзесяць драхмаў, калі згубіць адну драхму, не запаліць сьвечкі і не пачне месьці пакой і шукаць пільна, пакуль ня знойдзе?

⁹ А знайшоўшы, пакліча сябровак і суседак і скажа: парадуйцеся са мною, я знайшла згубленую драхму,

¹⁰ Так, кажу вам, бывае радасьць у анёлаў Божых і за аднаго грэшніка, які каецца.

¹¹ Яшчэ сказаў: у аднаго чалавека было два сыны;

¹² і сказаў малодшы бацьку: тата! дай мне належную мне долю маёмасьці. І бацька падзяліў ім маёмасьць.

¹³ Праз колькі дзён малодшы сын, сабраўшы ўсё, пайшоў у далёкі край і там распусьціў маёмасьць сваю, жывучы распусна.

¹⁴ А калі ён пражыў усё, настаў вялікі голад у той краіне, і ён апынуўся ў нястачы;

¹⁵ і пайшоў, прыстаў да аднаго жыхара той краіны, а той паслаў яго на палі свае пасьвіць сьвіньні;

¹⁶ і ён рады быў напоўніць чэрава сваё струкамі, якія елі сьвіньні, але ніхто не даваў яму.

¹⁷ Апамятаўшыся, сказаў: колькі парабкаў у бацькі майго маюць лішкі хлеба, а я паміраю з голаду!

¹⁸ Устану, пайду да бацькі майго і скажу яму: тата! я зграшыў супроць неба і перад табою,

¹⁹ і ўжо ня варты называцца сынам тваім; прымі мяне ў лік парабкаў тваіх.

²⁰ Устаў і пайшоў да бацькі свайго. І калі ён быў яшчэ далёка, убачыў яго бацька ягоны і ўмілажаліўся; і пабегшы, упаў яму на шыю і пацалаваў яго.

²¹ А сын сказаў яму: тата! я зграшыў супроць неба і перад табою, і ўжо ня варты называцца сынам тваім.

²² А бацька сказаў рабам сваім: прынясеце найлепшую вопратку і апранеце яго, і дайце пярсьцёнак на руку яму і абутак на ногі;

²³ і прывядзеце ўкормленае цяля і закалеце: будзем есьці і весяліцца,

²⁴ бо гэты сын мой быў мёртвы і ажыў, прападаў і знайшоўся. І пачалі весяліцца.

²⁵ А старэйшы сын ягоны быў на полі; і вяртаючыся, калі наблізіўся да дома, пачуў сьпевы і весялосьць;

²⁶ і паклікаўшы аднаго слугу, спытаўся: што гэта такое?

²⁷ Той сказаў яму: брат твой прыйшоў, і бацька твой закалоў укормленае цяля, бо прыняў яго здаровага.

²⁸ Ён угневаўся і не хацеў увайсьці. А бацька, выйшаўшы, клікаў яго.

²⁹ Але ён сказаў у адказ бацьку: вось, я столькі гадоў служу табе і ніколі не пераступаў загаду твайго, але ты ніколі ня даў мне і казьляняці, каб мне павесяліцца зь сябрамі маімі;

³⁰ а калі сын твой, вось гэты, распусьціўшы маёмасьць сваю з блудніцамі, прыйшоў, ты закалоў яму ўкормленае цяля.

³¹ А ён сказаў яму: сыне мой! ты заўсёды са мною, і ўсё маё ёсьць тваё;

³² а з таго трэба было радавацца і весяліцца, што брат твой гэты быў мёртвы і ажыў, прападаў і знайшоўся.