Библия на церковно-славянском языке - транслитерация современным русским алфавитом
(1751)

Третья книга Моисеева Левит

◄◄ | ◄ | Глава ⚫ | ► | ►►

¹ И бысть в день осмый, призва Моисей Аарона и сыны его и старцы Израилевы,

² и рече Моисей ко Аарону: возми себе телца от говяд греха ради и овна на всесожжение, непорочны, и принеси я пред Господа:

³ и старцем Израилевым речеши, глаголя: возмите козла от коз единаго от гресе, и овна, и телца и агнца единолетна, в приношение, непорочны:

⁴ и телца от говяд, и овна на жертву спасения пред Господа, и муку пшеничну спряжену с елеем: зане днесь Господь явится в вас.

⁵ И взяша, якоже заповеда Моисей пред скиниею свидения: и прииде весь сонм, и сташа пред Господем.

⁶ И рече Моисей: сие слово, еже рече Господь, сотворите, и явится в вас слава Господня.

⁷ И рече Моисей Аарону: приступи ко олтарю и сотвори еже греха ради твоего, и всесожжение твое, и помолися о себе и о доме твоем: и сотвори дары людския, и помолися о них, якоже заповеда Господь Моисею.

⁸ И приступи Аарон ко олтарю, и закла телца, иже греха ради его.

⁹ И принесоша сынове Аарони кровь к нему: и омочи перст свой в кровь, и возложи на роги олтаря, и кровь излия у стояла олтаря:

¹⁰ и тук, и обе почки, и препонку печени, яже греха ради, возложи на олтарь, якоже заповеда Господь Моисею:

¹¹ мяса же и кожу сожже на огни вне полка,

¹² и закла всесожжение. И принесоша сынове Аарони кровь к нему: и пролия на олтарь окрест.

¹³ И всесожжение принесоша к нему по удам: сия и главу возложи на олтарь,

¹⁴ и измы утробу и ноги водою, и возложи во всесожжение на олтарь.

¹⁵ И принесе дар людский: и взя козла, иже греха ради людска, и закла его, и очисти его, якоже и перваго,

¹⁶ и принесе всесожжение, и сотвори е, якоже достоит.

¹⁷ И принесе жертву, и наполни руце от нея, и возложи на олтарь кроме всесожжения утренняго,

¹⁸ и закла телца и овна жертвы спасения людска. И принесоша сынове Аарони кровь к нему: и пролия на олтарь окрест.

¹⁹ И тук телчий, и овняя чресла, и тук покрывающий утробу, и обе почки, и тук иже на них, и препонку печени:

²⁰ и возложи туки на груди, и вознесе туки на олтарь:

²¹ и груди и рамо десное отя Аарон участие пред Господем, якоже повеле Господь Моисею.

²² И воздвиг Аарон руце к людем, благослови я: и сниде сотворив приношение греха ради, и всесожжение, и яже о спасении.

²³ И вниде Моисей и Аарон в скинию свидения, и изшедше благословиста вся люди. И явися слава Господня всем людем:

²⁴ и изыде огнь от Господа, и пояде яже на олтари, и всесожжения и туки. И видеша вси людие, и ужасошася, и падоша на лице.