Библия на церковно-славянском языке - транслитерация современным русским алфавитом
(1751)

Третья книга Моисеева Левит

◄◄ | ◄ | Глава ⚫ | ► | ►►

¹ И сей закон овна иже о преступлении: святая святых суть:

² на месте, на немже закалают всесожжение, да заколют овна иже о преступлении пред Господем, и кровь да пролиют на стояла олтаря окрест:

³ и весь тук его да принесет от него, и чресла, и весь тук покрывающий утробу, и весь тук иже на утробе,

⁴ и обе почки, и тук иже на них, иже на стегнах, и препонку, яже на печени, с почками да отимет я:

⁵ и вознесет я жрец на олтарь, принос в воню благовония Господу: о преступлении (бо) есть:

⁶ всяк мужеск пол от жрец да снест я, на месте святе да снедят я: святая святых суть:

⁷ якоже греха ради, тако и преступления ради, закон един их: жрец иже помолится о нем, ему да будет:

⁸ и жрец приносяй всесожжение человечо, кожа всесожжения, еже приносит он, ему да будет:

⁹ и всяка жертва, яже сотворится в пещи, и всяка, яже сотворится на огнищи, или на сковраде, жерцу, иже приносит ю, тому да будет:

¹⁰ и всяка жертва спряжена с елеем, и яже не спряжена, всем сыном Аароним комуждо равно да будет.

¹¹ Сей закон жертвы спасения, юже принесут Господу:

¹² аще убо похваления ради принесет ю, и принесет на жертву хваления хлебы от муки пшеничны пряжены в елеи, и опресноки помазаны елеем, и муку пшеничну смешену с елеем:

¹³ с хлебы квасными да принесет дар свой на жертву хваления спасителнаго:

¹⁴ и да принесет един от всех даров своих участие Господу: жерцу возливающему кровь жертвы спасения, тому да будет:

¹⁵ и мяса жертвы хваления спасителнаго тому да будут, и в оньже день принесутся, да снедятся: да не оставят от него на утрие:

¹⁶ и аще обет будет, или вольный пожрет дар свой, в оньже аще день жертву свою принесет, да снестся, и на утрие:

¹⁷ и оставшееся от мяс жертвы до дне третияго на огни да сожжется:

¹⁸ аще же ядый снест от мяс в день третий, не приимется приносящему ю, ниже вменится ему: осквернение есть: душа же, яже аще снест от них, грех приимет:

¹⁹ и мяса, яже аще прикоснутся всякому нечисту, да не снедятся, на огни да сожгутся: всяк чистый да снест мяса:

²⁰ душа же, яже аще снест от мяс жертвы спасения, яже есть Господу, и нечистота его на нем, погибнет душа она от людий своих:

²¹ всякой вещи нечистей, или от нечистоты человечи или от четвероногих нечистых, или всякой мерзости нечистей, и снест от мяс жертвы спасения, яже есть Господня, погибнет душа та от людий своих.

²² И рече Господь к Моисею, глаголя:

²³ рцы сыном Израилевым, глаголя: всякаго тука говяжа и овча и козия да не снесте:

²⁴ и тук мертвечинен и звероядный да сотворится на всяко дело, в ядении же да не снестся:

²⁵ всяк ядый тук от скотов, от нихже принесет дар Господу, погибнет душа та от людий своих:

²⁶ всякия крове да не снесте во всех селениих ваших и от скотов и от птиц:

²⁷ всяка душа, яже аще снест кровь, погибнет душа та от людий своих.

²⁸ И рече Господь к Моисею, глаголя:

²⁹ и сыном Израилевым речеши, глаголя: приносяй жертву спасения Господу да принесет дар свой Господу, и от жертвы спасения:

³⁰ руце его да принесут принос Господу: тук иже на грудех, и препонку печени да принесет я, якоже возложити дар пред Господа:

³¹ и да вознесет жрец тук иже на грудех, на олтарь, и груди да будут Аарону и сыном его,

³² и рамо десное да дастся участие жерцу от жертв спасения вашего:

³³ приносящему кровь спасения и тук от сынов Аароновых, тому да будет рамо десное во участие:

³⁴ грудь бо возложения и рамо участия взях от сынов Израилевых от жертв спасения вашего, и дах я Аарону жерцу и сыном его, законно вечно от сынов Израилевых.

³⁵ Сие помазание Аароне и помазание сынов его от приносов Господних, в оньже день приведе я жрети Господу:

³⁶ якоже заповеда Господь дати им, в оньже день помаза я от сынов Израилевых: законно вечно в роды их.

³⁷ Сей закон всесожжений и жертвы, и о гресе и о преступлении, и совершении и жертве спасения:

³⁸ якоже заповеда Господь Моисею на горе Синайстей, в оньже день заповеда сыном Израилевым приносити дары своя пред Господа, в пустыни Синайстей.