Библия на церковно-славянском языке - транслитерация современным русским алфавитом
(1751)

Третья книга Моисеева Левит

◄◄ | ◄ | Глава ⚫ | ► | ►►

¹ Аще же жертва спасения дар его Господу, аще убо от говяд е принесет, аще мужеск пол или женск, непорочен да принесет и пред Господа:

² и возложит руце свои на главу дара, и да заколет и пред Господем у дверий скинии свидения: и да возлиют сынове Аарони жерцы кровь на олтарь всесожжений окрест,

³ и да принесут от жертвы спасения принос Господу, тук покрывающий утробу, и весь тук иже на утробе,

⁴ и обе почки, и тук иже на них и иже на стегнах, и препонку, яже на печени, с почками отимет:

⁵ и да вознесут я сынове Аарони жерцы, на олтарь во всесожжения на дрова сущая на огни, яже на олтари: принос воня благовония Господу.

⁶ Аще же от овец дар его жертва спасения Господу, мужеск пол или женск, непорочен да принесет,

⁷ аше агнца принесет дар свой, да приведет его пред Господа,

⁸ и да возложит руку на главу дара своего, и да заколет его у дверий скинии свидения: и да пролиют сынове Аарони жерцы кровь на олтарь окрест,

⁹ и да принесет от жертвы спасения принос Господу, тук и чресла чиста с лядвиями да отлучит и: и весь тук покрывающий утробу, и весь тук иже на утробе,

¹⁰ и обе почки, и тук иже на них, иже на стегнах: и препонку, яже на печени, с почками отемь,

¹¹ да вознесет жрец на олтарь: воня благоухания, принос Господви.

¹² Аще же от козлов дар его Господу, да принесет пред Господа:

¹³ и возложит руце на главу его, и да заколют е пред Господем у дверий скинии свидения: и да пролиют сынове Аарони жерцы кровь на олтарь около:

¹⁴ и да вознесет от него принос Господу тук покрывающий утробу, и весь тук иже на утробе,

¹⁵ и обе почки, и весь тук, иже на них, иже на стегнах, и препонку, яже на печени, с почками отлучит:

¹⁶ и да вознесет жрец на олтарь, принос воня благовония Господу: весь тук Господу.

¹⁷ Законное в веки в роды вашя, во всяком обитании вашем: всякаго тука и всякия крове да не ясте.