Библия на церковно-славянском языке - транслитерация современным русским алфавитом
(1751)

Третья книга Моисеева Левит

◄◄ | ◄ | Глава ⚫ | ► | ►►

¹ И рече Господь к Моисею, глаголя:

² заповеждь сыном Израилевым, да возмут ти елей от масличия чист исцежен в светение, да горит светило всегда,

³ вне завесы в скинии свидения, и возжигати будут его Аарон и сынове его от вечера до заутра пред Господем непрестанно, законно вечно в роды вашя:

⁴ на светилнице чистем возжигати будете светила пред Господем даже до утра.

⁵ И возмете муки пшеничны, и сотворите от нея дванадесять хлебов: дву десятин да будет хлеб един:

⁶ и возложите их на два положения, по шести хлебов едино положение на трапезе чисте пред Господем:

⁷ и возложите на едино положение ливан чист и соль, и да будут хлебы в память предлежащыя пред Господем:

⁸ в день субботы да предлагаются пред Господем всегда от сынов Израилевых, завет вечный:

⁹ и да будут Аарону и сыном его, и да снедят я на месте святе, суть бо святая святых: сие им от жертв Господу в закон вечный.

¹⁰ И изыде сын жены Израилтяныни, и сей бе сын Египтянина в сынех Израилевых: и пряхуся в полце иже от Израилтяныни и муж Израилтянин:

¹¹ и нарек сын жены Израилтяныни имя (Господне) прокля. И приведоша его к Моисею. Имя же матере его Саломииф, дщерь Давриина, от племене Данова.

¹² И ввергоша его в темницу, разсудити о нем повелением Господним.

¹³ И рече Господь к Моисею, глаголя:

¹⁴ изведи клявшаго вне полка, и да возложат вси слышавшии руце свои на главу его, и да побиют его камением весь сонм:

¹⁵ и сыном Израилевым глаголи и речеши к ним: человек человек, иже аще прокленет Бога своего, грех приимет:

¹⁶ нарицаяй же имя Господне смертию да умрет: камением да побиют его весь сонм израильский: аще туземец, или пришлец, егда наречет имя Господне, да умрет:

¹⁷ и человек, иже аще поразит всяку душу человечу, и умрет, смертию да умрет:

¹⁸ и иже аще ударит скота, и умрет, да воздаст душу вместо души:

¹⁹ и аще кто сотворит порок ближнему, якоже сотвори ему, такожде и ему да сотворят:

²⁰ изломление за изломление, око за око, зуб за зуб: якоже сотворил порок человеку, такожде да сотворят и ему:

²¹ иже аше ударит человека, и умрет смертию да умрет:

²² оправдание едино будет пришелцу и туземцу, яко Аз есмь Господь Бог ваш.

²³ И глагола Моисей к сыном Израилевым, и изведоша клявшаго вне полка, и побиша его камением весь сонм: и сынове Израилевы сотвориша, якоже заповеда Господь Моисею.