Библия на церковно-славянском языке - транслитерация современным русским алфавитом
(1751)

Третья книга Моисеева Левит

◄◄ | ◄ | Глава ⚫ | ► | ►►

¹ И рече Господь к Моисею, глаголя:

² глаголи сыном Израилевым и речеши к ним: праздницы Господни, яже наречете нарочитыя святыя, сии суть праздницы Мои:

³ в шесть дний да сотвориши дела, и в день седмый суббота, покой нареченный свят Господви, всякаго дела да не сотворите: суббота есть Господви во всем обитании вашем.

⁴ Сии праздницы Господу наречены святи, яже наречете сия во времена их:

⁵ в первем месяце в четвертыйнадесять день месяца, между вечерними, Пасха Господу:

⁶ и в пятыйнадесять день месяца перваго праздник опресноков Господу: седмь дний опресноки да ясте.

⁷ И день первый наречен свят будет вам: всякаго дела работня не сотворите:

⁸ и да принесете всесожжения Господу седмь дний, и день седмый наречен свят будет вам: всякаго дела работня не сотворите.

⁹ И рече Господь к Моисею, глаголя:

¹⁰ глаголи сыном Израилевым и речеши к ним: егда внидете в землю, юже Аз даю вам, и пожнете жатву ея, и принесете снопы начаток жатвы вашея к жерцу,

¹¹ и вознесет сноп пред Господа приятен вам: на утрие перваго дне субботы да вознесет его жрец.

¹² И сотворите в день, в оньже аще принесете сноп, овча непорочно единолетно во всесожжение Господу:

¹³ и жертву его две десятины муки пшеничны спряжены в елеи: жертва Господу, в воню благовония Господу: и возлияние его вина четвертую часть ина.

¹⁴ И хлеба, и пряженых класов новых да не снесте, даже до того дне самаго, дондеже принесете вы дары Богу вашему: законно вечно в роды ваша во всем населении вашем.

¹⁵ И сочтите себе от наутрия суббот, от дне, в оньже аще принесете снопы возложения, седмь седмиц целых

¹⁶ даже до наутрия последния седмицы да сочтете пятьдесят дний, и да принесете жертву нову Господу.

¹⁷ От вселения вашего да принесете хлебы возложение, два хлеба: от двух десятин муки пшеничны да будут, квашены да испекутся от первых плодов Господу:

¹⁸ и да принесете со хлебами седмь агнцев непорочных единолетных, и телца единаго от стад, и овна два непорочна: и будут во всесожжение Господу, и жертвы их, и возлияния их, жертва воня благовония Господу.

¹⁹ И сотворите козла от коз единаго о гресе, и два агнца единолетна в жертву спасения с хлебами первых жит.

²⁰ И да возложит я жрец с хлебами первых жит, возложение пред Господем со обема агнцы: свята будут Господу, жерцу иже приносит я, тому да будут.

²¹ И прозовете сей день, нарочит свят будет вам: всякаго дела работня не сотворите в онь: законно вечно в роды вашя во всем населении вашем.

²² И егда жнете жатву земли вашея, не потребите останка жатвы нивы своея, егда жнете, и от падающих от жатвы вашея да не собереши: нищему и пришелцу оставиши я: Аз Господь Бог ваш.

²³ И рече Господь к Моисею, глаголя:

²⁴ рцы сыном Израилевым, глаголя: месяца седмаго, в первый день месяца, да будет вам покой, память труб: наречен свят будет вам:

²⁵ всякаго дела работня не сотворите, и принесете всесожжение Господу.

²⁶ И рече Господь к Моисею, глаголя:

²⁷ и в десятый день седмаго месяца сего день очищения, наречен свят да будет вам: и смирите душы вашя, и принесите всесожжение Господу:

²⁸ всякаго дела не сотворите в самый день сей: есть бо день очищения сей вам, Їмолити о вас пред Господем Богом вашим:

²⁹ всяка бо душа, яже не покорится в день той, потребится от людий своих:

³⁰ и всяка душа, яже сотворит дело в самый день сей, погибнет душа та от людий своих:

³¹ всякаго дела не сотворите, законно вечно в роды вашя, во всех селениих ваших.

³² Субботы суббот будут вам: и смирите душы вашя, от девятаго дне месяца от вечера, даже до десятаго дне месяца, до вечера, субботствуйте субботы вашя.

³³ И рече Господь к Моисею, глаголя:

³⁴ рцы сыном Израилевым, глаголя: в пятыйнадесять день месяца седмаго сего, праздник кущей седмь дний Господу:

³⁵ и день первый наречен свят будет: всякаго дела работня не сотворите:

³⁶ седмь дний да принесете всесожжения Господу: и день осмый наречен свят будет вам, и принесете всесожжения Господу: исходное есть, всякаго дела работня не сотворите.

³⁷ Сии праздницы Господни, яже наречете нарочиты святы, еже приносити приносы Господу: всесожжения и жертвы их, и возлияния их от дне до дне,

³⁸ кроме суббот Господних и кроме даров ваших, и кроме всех обетов ваших и кроме благовольных ваших, яже аще дадите Господу.

³⁹ И в пятыйнадесять день месяца седмаго сего, егда скончаете жита земли, празднуйте Господу седмь дний: в день первый покой, и в день осмый покой:

⁴⁰ и да возмете себе в день первый плод древа красен, и ветвь финическую, и ветви древа частыя, и вербы, и агновы ветви от потока, и возвеселитеся пред Господем Богом вашим седмь дний в лето:

⁴¹ законно вечно в роды вашя, в месяц седмый празднуйте его:

⁴² в кущах да пребудете седмь дний: всяк туземец во Израили да пребудет в кущах:

⁴³ яко да уведят роды вашя, яко в кущах вселих сыны Израилевы, внегда извести мне их из земли Египетския: Аз Господь Бог ваш.

⁴⁴ И поведа Моисей праздники Господни сыном Израилевым.