Библия на церковно-славянском языке - транслитерация современным русским алфавитом
(1751)

Третья книга Моисеева Левит

◄◄ | ◄ | Глава ⚫ | ► | ►►

¹ Аще же душа принесет дар жертву Господу, мука пшенична да будет дар его, и да возлиет на ню елей, и возложит на ню ливан: жертва есть:

² и да принесет ю к сыном Аароним жерцем, и возмет от нея полну горсть муки пшеничны с елеем и весь ливан ея, и да возложит жрец память ея на олтарь: жертва воня благоухания Господу:

³ и останок от жертвы Аарону и сыном его: святое святых от жертв Господних.

⁴ Аще же принесет дар жертву печену в пещи от муки пшеничны, хлебы пресны спряжены с елеем и опресноки помазаны елеем.

⁵ Аще же жертва от сковрады дар твой, мука пшенична смешена со елеем, пресна да будут:

⁶ и да разломиши я на укрухи, и возлиеши на на елей: жертва есть Господу.

⁷ Аще же жертву от огнища дар твой, мука пшенична с елеем да сотворена будет:

⁸ и принесет жертву, юже аще сотворит от сих Господу, и да принесет к жерцу:

⁹ и приступив ко олтарю, да отимет жрец от жертвы память ея, и да возложит жрец на олтарь: приношение воня благовония Господу:

¹⁰ останок же от жертвы Аарону и сыном его: святая святых от приношений Господу.

¹¹ Всяку жертву, юже аще приносите Господу, не сотворите квасну: всяк бо квас и всяк мед да не принесете от него, еже приносити Господу дар.

¹² От начатков да принесете я Господу: на олтарь же да не вознесутся в воню благовония Господу.

¹³ И всяк дар жертвы вашея солию да осолится: да не отставите соли завета Господня от жертв ваших, во всяком даре вашем да принесете Господу Богу вашему соль.

¹⁴ Аще же принесеши жертву от начатков жит Господу, новы спряжены зелены класы истлачены Господу, и принесеши жертву от начатков жит:

¹⁵ и да возлиеши на ню елей, и да возложиши на ню ливан: жертва есть:

¹⁶ и да вознесет жрец память ея от спряженых с елеем, и весь ливан ея: принос есть Господу.