Библия на церковно-славянском языке - транслитерация современным русским алфавитом
(1751)

Третья книга Моисеева Левит

◄◄ | ◄ | Глава ⚫ | ► | ►►

¹ И рече Господь к Моисею, глаголя:

² сей закон прокаженному, в оньже день аще очистится, и приведется к жерцу:

³ и да изыдет жрец вне полка, и узрит жрец, и се, исцеле язва прокажения от прокаженнаго:

⁴ и повелит жрец, да возмутся очищенному два птичища жива чиста и древо кедрово, и соскана червленица и иссоп:

⁵ и повелит жрец, да заколют птичище едино в сосуд глинян, над водою живою,

⁶ и живое птичище да возмет, и древо кедрово и соскану червленицу и иссоп, и да омочит их и птичище живое в крови закланаго птичища над водою живою:

⁷ и да воскропит на очистившагося от прокажения седмижды, и чист будет: и да отпустит птичище живое на поле:

⁸ и да исперет очистивыйся ризы своя и да острижет вся власы своя и да измыется водою, и чист будет: и по сих да внидет в полк и да пребудет вне дому своего седмь дний.

⁹ И будет в день седмый, обриются вси власы его, глава его и брада и брови, и всяк влас его да обриется: и да измыет ризы своя, и да омыется тело его водою, и чист будет.

¹⁰ И в день осмый да возмет два агнца единолетна непорочна и овцу едину единолетну непорочну, и три десятины муки пшеничны на жертву смешаныя с елеем и меру елеа едину:

¹¹ и да поставит жрец очищаяй человека очищаемаго и сия пред Господем, у дверий скинии свидения:

¹² и возмет жрец агнца единаго и приведет его преступления ради, и чашу елеа, и отлучит я жрец во отлучение пред Господем:

¹³ и заколют агнца на месте идеже закалают всесожжения и яже греха ради, на месте святе: есть бо еже греха ради, якоже и преступления ради есть жерцу: святая святых суть:

¹⁴ и возмет жрец от крове яже преступления ради, и возложит жрец на обушие уха очищаемаго деснаго, и на край руки его десныя, и на край ноги его десныя:

¹⁵ и взем жрец от чаши елеа, возлиет на руку левую свою:

¹⁶ и да омочит жрец перст свой десный в елей, иже есть в руце его левей, и да воскропит от елеа перстом седмижды пред Господем:

¹⁷ оставшийся же елей, иже в руце его, да возложит жрец на обушие уха очищаемаго деснаго, и на край руки его десныя, и на край ноги его десныя, на место крове яже преступления ради:

¹⁸ оставшийся же елей, иже в руце жерца, да возложит жрец на главу очищенному: и помолится о нем жрец пред Господем:

¹⁹ и сотворит жрец еже греха ради, и помолится жрец от очищающемся от греха своего: и по сем заколет жрец всесожжение:

²⁰ и вознесет жрец всесожжение и жертву на олтарь пред Господем, и помолится о нем жрец, и очистится.

²¹ Аще же убог есть, и рука его не достигнет, да возмет агнца единолетнаго единаго, в оньже преступил на отлучение, яко помолитися о нем, и десятину муки пшеничны смешаны с елеем в жертву, и чашу елеа едину,

²² и два горличища, или два птенца голубина, елика обрете рука его, и да будет един греха ради, и другий во всесожжение:

²³ и да принесет я в день осмый, во еже очистити его, к жерцу, пред двери скинии свидения пред Господа:

²⁴ и взем жрец агнца иже преступления ради, и чашу елеа, возложит я возложение пред Господем,

²⁵ и заколет агнца иже преступления ради, и возмет жрец от крове яже преступления ради, и возложит на обушие уха очищаемаго деснаго, и на край руки его десныя, и на край ноги его десныя:

²⁶ и от елеа возлиет жрец на руку свою левую,

²⁷ и воскропит жрец перстом своим десным от елеа, иже в руце его левей, седмижды пред Господем:

²⁸ и возложит жрец от елеа сущаго в руце его на обушие уха очищаемаго деснаго, и на краи руки его десныя, и на край ноги его десныя, на месте крове яже преступления ради:

²⁹ оставшееся же от елеа, еже есть в руце жерца, да возложит на главу очистившемуся: и помолится о нем жрец пред Господем,

³⁰ и сотворит едину от горлиц, или от птенцев голубиных, якоже обрете рука его,

³¹ едину греха ради, и другую во всесожжение с жертвою: и помолится жрец о очищаемем пред Господем.

³² Сей закон в немже есть язва прокажения, и не обретающему рукою во очищение свое.

³³ И рече Господь к Моисею и Аарону, глаголя:

³⁴ егда внидете в землю Ханаанску, юже Аз даю вам в притяжание, и дам язву прокажения в домех земли притяжанныя вам:

³⁵ и приидет, егоже дом, и повесть жерцу глаголя: аки язва является в дому моем.

³⁶ И повелит жрец испразднити сосуды дому, прежде неже внити жерцу видети язву, и да не будут нечиста вся яже в дому. По сих же внидет жрец соглядати дом:

³⁷ и узрит жрец язву, и се, язва на стенах дому удолия зеленеющаяся или червленеющаяся, и обличие их худее стен:

³⁸ изшед жрец из дому к дверем дому, и отлучит жрец дом на седмь дний.

³⁹ И возвратится жрец в седмый день, и узрит дом, и се, разсыпася язва по стенам дому:

⁴⁰ и повелит жрец, да изимут камение, на нихже есть язва, и да изнесут е вон из града на место нечисто:

⁴¹ и да постружут извнутри дом окрест, и изсыплют персть состроганую вне града на место нечисто:

⁴² и да возмут камение ино острогано, и вложат я вместо камения: и персть ину да возмут, и помажут дом.

⁴³ Аще же паки найдет язва, и явится в дому но изнесении камения и по острогании дому и по помазании,

⁴⁴ и внидет жрец, и узрит аще разсыпася язва в дому, прокажение пребывающее есть в дому, нечист есть:

⁴⁵ и разорят дом, и древа его и камение его и всю персть дому изнесут вне града, на место нечисто.

⁴⁶ И входяй в дом вся дни, в няже есть отлучен, нечист будет до вечера:

⁴⁷ и спяй в дому да исперет ризы своя и нечист будет до вечера: и ядый в дому да исперет ризы своя и нечист будет до вечера.

⁴⁸ Аще же пришедый внидет жрец, и увидит: и се, разсыпанием не разсыпася язва в дому но помазании дому, да очистит жрец дом, яко исцеле язва:

⁴⁹ и возмет очистити дом, два птичища жива чиста и древо кедрово, и соскану червленицу и иссоп:

⁵⁰ и да заколет птичище едино в сосуд глинян над водою живою:

⁵¹ и возмет древо кедрово и соскание червленое, и иссоп и птичище живое, и да омочит е в кровь птичища закланаго над водою живою, и да окропит ими в дому седмижды:

⁵² и очистит дом кровию птичищною и водою живою, и птичищем живым и древом кедровым, и иссопом и сосканою червленицею:

⁵³ и да отпустит птичище живое вне града на поле и помолится о доме, и чист будет.

⁵⁴ Сей закон о всякой язве прокажения и вреда,

⁵⁵ и прокажения ризы и дому,

⁵⁶ и струпа, и знамения, и блещащагося,

⁵⁷ и поведати в оньже день нечисто, и в оньже день очистится: сей закон прокажения.