Библия на церковно-славянском языке - транслитерация современным русским алфавитом
(1751)

Книга Плач Иеремии

◄◄ | ◄ | Глава ⚫ | ► | ►►

¹ Молитва Иеремии пророка. Помяни, Господи, что бысть нам: призри и виждь укоризну нашу:

² достояние наше обратися к чуждим и домы нашя ко иноплеменником:

³ сири быхом, несть отца, матери нашя яко вдовы.

⁴ Воду нашу за сребро пихом, дрова наша за цену куповахом:

⁵ на выя нашя гоними быхом, трудихомся, не почихом.

⁶ Египет даде руку, Ассур в насыщение их.

⁷ Отцы наши согрешиша, и несть их, мы же беззакония их подяхом.

⁸ Раби обладаша нами, избавляющаго несть от руку их.

⁹ В душах наших носихом хлеб наш, от лица меча в пустыни.

¹⁰ Кожа наша аки пещь обгоре, разседошася от лица бурей глада.

¹¹ Жен в Сионе смириша, девиц во градех Иудиных.

¹² Князи в руках их повешени быша, старейшины не прославишася.

¹³ Избраннии плачь подяша, и юноши в кладе изнемогоша.

¹⁴ И старцы от врат оскудеша, избраннии от песней своих умолкоша.

¹⁵ Разсыпася радость сердец наших, обратися в плачь лик наш,

¹⁶ спаде венец со главы нашея: горе нам, яко согрешихом.

¹⁷ О сем смутися сердце наше, о сем померкнуша очи наши.

¹⁸ На горе Сионе, яко погибе, лисицы ходиша.

¹⁹ Ты же, Господи, во веки вселишися, престол Твой в род и род.

²⁰ Вскую во веки забываеши нас, оставиши ли нас в продолжение дний?

²¹ Обрати ны, Господи, к Тебе, и обратимся, и вознови дни нашя якоже прежде.

²² Яко отревая отринул еси нас, разгневался еси на ны зело.