Библия на церковно-славянском языке - транслитерация современным русским алфавитом
(1751)

Четвёртая книга Царств

◄◄ | ◄ | Глава ⚫ | ► | ►►

¹ В лето седмое Ииуа воцарися Иоас, и четыредесять лет царствова во Иерусалиме. Имя же матере его Савиа от Вирсавеи.

² И сотвори Иоас правое пред Господем во вся дни, в няже просвети его Иодай иерей:

³ обаче высоких не преставиша, и тамо еще людие жряху и кадяху на высоких.

⁴ И рече Иоас к жерцем: все сребро святых вносимое в дом Господень, сребро оценения, муж сребро взявый оценения, все сребро, еже аще взыдет на сердце мужа внести в дом Господень,

⁵ да возмут себе жерцы, муж от продания своего, и тии да укрепят ведек дому во всех, идеже аще обрящется ведек.

⁶ И бысть в двадесять третие лето царя Иоаса, не укрепиша жерцы ведека храма:

⁷ и призва царь Иоас Иодая жерца и жерцы, и рече к ним: что яко не укреписте ведека храма? И ныне не приимайте сребра от продажей ваших, яко на ведек храма дасте е.

⁸ И совещашася жерцы не приимати сребра от людий и не укрепляти ведека храма.

⁹ И взя Иодай жрец кивот един, и сотвори в нем скважню, и положи его при олтари одесную входящих мужей в дом Господень: и влагаху тамо жерцы хранящии дверь все сребро приносимое в дом Господень.

¹⁰ И бысть егда увидеша, яко много сребра в ковчезе, и взыде писчий царев, и жрец великий, и сребросечцы и открыша, и сочтоша сребро обретшееся в дому Господни:

¹¹ и даша сребро уготованное в руце творящих дела на сосуды дому Господня: и раздаша древоделем и делателем зиждущым в дому Господни,

¹² и стеноделателем, и художником, и секущым камения на купление древес, и камения тесанаго на строение ведека дому Господня, на вся елика иждивена быша на утверждение храма.

¹³ Обаче не творишася храму Господню двери сребряны, гвоздие, фиалы и трубы, ни вси сосуды златы, и сосуды сребряны от сребра принесеннаго в дом Господень:

¹⁴ понеже творящым дела дадеся сие, и утвердиша тем дом Господень.

¹⁵ И не сочитаху мужей, имже даяху сребро в руки, даяти творящым дела, зане верно творяху.

¹⁶ Сребро за грехи и сребро за преступление, елико внесено бысть в дом Господень, жерцем бысть.

¹⁷ Тогда взыде Азаил царь Сирский и воева на Геф, и взя его Азаил и разби его: и обрати Азаил лице свое взыти на Иерусалим.

¹⁸ И взя Иоас царь Иудин вся святая, елика освяти Иосафат и Иорам и Охозиа, отцы его и царие Иудины, и святая его, и все злато обретшееся в сокровищих дому Господня и дому царева, и посла Азаилу царю Сирску, и отиде от Иерусалима.

¹⁹ И прочая словес Иоасовых, и вся елика сотвори, не се ли, сия писана в книзе словес дний царей Иудиных?

²⁰ И восташа отроцы его, и совещаша всяк совет, и убиша Иоаса в доме Маллони, иже в Саале.

²¹ И Иезехар сын Иемуафов, и Иезевуф сын Сомиров, раби его убиша его, и умре, и погребоша его со отцы его во граде Давидове. И воцарися Амессиа сын его вместо его.