Библия на церковно-славянском языке - транслитерация современным русским алфавитом
(1751)

Третья книга Царств

◄◄ | ◄ | Глава ⚫ | ► | ►►

¹ И бысть в четыредесятное и в четвертосотное лето исхода сынов Израилевых из Египта, в лето четвертое, в месяц вторый, царствующу царю Соломону над Израилем, и созда храм Господеви.

² И храм, егоже созда Соломон царь Господеви, (бяше) шестьдесят лакот долгота его, и двадесяти лакот широта его, и тридесяти лакот высота его:

³ и притвор, иже пред лицем храма, двадесяти лакот долгота его в широту дому, и десяти лакот широта его пред лицем дому: и созда храм, и соверши его.

⁴ И сотвори храму окна преклонены сокровены.

⁵ И созда на стене дому притворы около храма и давира.

⁶ И сотвори бока около, бок иже с низу, пяти лакот широта его, и средний шести лакот широта, и третий седми лакот широта его: понеже разстояние дому сотвори окрест внеуду храма, яко да не досязают стен храма.

⁷ И храму зиждему сущу, камением краесекомым нетесаным создася: млат же, и теслица, и всякое орудие железно не слышася в храме, егда созидатися ему.

⁸ И двери бока нижняго под стеною храма десною, и извиенный восход до средины, а от средины до трекровных.

⁹ И созда храм, и соверши его: и обстави храм дсками кедровыми.

¹⁰ И сотвори вязания окрест всего храма, пять лакот в высоту его, и связа вязание древом кедровым.

¹¹ И бысть слово Господне к Соломону, глаголющее:

¹² храм сей егоже ты созидаеши, аще пойдеши по заповедем Моим, и судбы Моя сотвориши, и сохраниши вся повеления Моя, еже пребывати в них, утвержу слово Мое с тобою, еже глаголах Давиду отцу твоему,

¹³ и вселюся посреде сынов Израилевых, и не оставлю людий Моих Израиля.

¹⁴ И созда Соломон храм, и сконча его.

¹⁵ И созда стены храму внутрь древом кедровым, от земли храма и даже до стен и даже до верха: около обстави содержащая древами внутрьуду и укрепи внутрь храма боками певговыми.

¹⁶ И созда двадесяти лакот от края стены бок един от земли даже до верха: и сотвори ему внутрь от давира стену до Святая святых.

¹⁷ И четыредесяти лакот бяше храм: сей (есть) храм внутреннейший.

¹⁸ И от кедра во храме внутрь постави плетение и дщицы и ваяния вся кедрова: камень не являшеся.

¹⁹ Пред лицем давира, посреде храма внутрь уготова поставити тамо кивот завета Господня.

²⁰ И пред лицем давира двадесяти лакот долгота, и двадесяти лакот широта, и двадесяти лакот высота его, и объят его златом чистым: и сотвори олтарь кедровый: и повлече Соломон храм внутрь златом чистым, и пригвозди гвоздми златыми пред лицем давира, и объят и златом.

²¹ И весь храм объят златом до скончания всего храма.

²² И все внутрь давира покры златом.

²³ И сотвори в давире два херувима от древ кипарисных, десять лакот мерою величество:

²⁴ и пяти лакот крило херувима единаго, и пяти лакот крило его второе, десяти лакот от края крила его до края крила его:

²⁵ и десяти лакот такожде (мера) херувиму второму, мера едина совершение едино обоим херувимом:

²⁶ и высота херувима единаго десять лакот, такожде и второму херувиму.

²⁷ И постави оба херувима посреде храма внутренняго: и простираху крила своя, и досязаше крило едино до стены храма, и крило другаго херувима досязаше до стены вторыя: и крила их яже бяху посреде храма, касашеся крило с крилом:

²⁸ и объяты быша херувимы златом.

²⁹ И на всех стенах храма около ваяния написа подобием херувимов, и финики, и изваянна произницающая внутрьуду и внеуду.

³⁰ И помост храма из внутрьуду и внеуду объят златом.

³¹ И входу давира сотвори двери от древ смерчиих, и праги пятеричны,

³² и двои двери от древ певговых, и изваяния на них изваяна, херувимы, и финики, и дщицы простертыя, и объят я златом, и бяше златом устроено до херувимов и до фиников.

³³ И тако сотвори вратом храма: и праги от древ смерчиих, притворы четверогубо.

³⁴ И на обоих дверях древа певгова: два затвора дверь едина и вереи их, и два затвора дверь вторая вращающаяся в себе,

³⁵ (на нихже сотвори) изваянныя херувимы и финики, и дщицы простертыя, и объятыя златом свешеным на изображение.

³⁶ И созда двор внутренний: в три ряда нетесаных, и ряд тесанаго кедра около.

³⁷ В лето четвертое основа храм Господень в месяце зии, во вторый месяц.

³⁸ Во единонадесятое лето в месяце Вул, сей месяц осмый, совершися храм по всему словеси своему и по всему устроению своему: и созда его в седмь лет.