Библия на церковно-славянском языке - транслитерация современным русским алфавитом
(1751)

Книга Иудифь

◄◄ | ◄ | Глава ⚫ | ► | ►►

¹ И услышаша сынове Израилевы живущии во Иудеи вся, елика сотвори Олоферн языком, вождоначалник Навуходоносора царя Ассирийскаго, и имже образом расхити вся священная их и даде сия во истребление:

² и убояшася зело от лица его, и о Иерусалиме и о храме Господа Бога своего смятошася,

³ понеже недавно изыдоша от пленения и недавно вси людие соврашася Иудейстии, и сосуди и олтарь и дом от осквернения освящена быша.

⁴ И послаша во всякий предел Самарии и Конии, и Вефорона и Велмена и Иерихона, и в Хову и Есору и во юдоль Салимскую,

⁵ и предприяша вся верхи гор высоких, и оградиша стенами сущыя в них села, и отложиша на пищу ко приуготовлению брани, яко недавно быша поля их пожата.

⁶ И писа Иоаким иерей великий, иже бе во днех онех во Иерусалиме, живущым во Ветилуи и Ветомесфеме, иже есть противу Есдрилоиа, на лицы поля сущаго близ Дофаима,

⁷ глаголя одержати восходы горния, ибо ими бе вход во Иудею, и бе удобно возбраняти их приходящих, тесну проходу сушу, яко всем мужем по два (проити).

⁸ И сотвориша сынове Израилевы, якоже повеле им Иоаким иерей великий и старейшинство всего сонма Израилева, иже седяху во Иерусалиме.

⁹ И возопиша всякий муж Израилев к Богу с прилежанием великим и смириша душы своя в прилежании велицем:

¹⁰ сами и жены их и младенецы их, и скоти их, и всякий пришлец и наемник, и сребром купленый их, возложиша вретища на чресла своя.

¹¹ И всякий муж Израилев и жена, и дети, и жнвущии во Иерусалиме падоша пред лицем храма, и посыпаша перстию главы своя, и простроша вретища своя пред лицем Господним,

¹² и олтарь вретищем одеяша, и возопиша к Богу Израилеву единодушно прилежно, еже не дати в расхищение младенцев их, и жен в пленение, и градов наследия их в разорение, и святая во осквернение и поношение, обрадование языком.

¹³ И услыша Господь глас их и призре на скорбь их. И бяху людие постящеся дни многи во всей Иудеи и Иерусалиме, пред лицем святых Господа Вседержителя.

¹⁴ И Иоаким иерей великий, и вси предстоящии пред Господем, иерее и служащии Господеви, вретищами препоясани о чреслех своих, приношаху всесожжение непрестанное и обеты и произвольная даяния людий:

¹⁵ и бе пепел на кидарех их, и вопияху ко Господу от всея силы, да посетит во благо весь дом Израилев.