Библия на церковно-славянском языке - транслитерация современным русским алфавитом
(1751)

Книга Иудифь

◄◄ | ◄ | Глава ⚫ | ► | ►►

¹ И послаша к нему посланников словесы мирными, глаголюще:

² се, мы отроцы Навуходоносора царя великаго повергаемся пред тобою, употреби нас, якоже угодно есть лицу твоему:

³ се, села наша, и всякое место наше, и все поле пшениц, и овчия и воловыя стада, и вся ограды селений наших, суть пред лицем твоим, употреби, якоже угодно тебе:

⁴ се, и гради наши, и живущии в них раби твои суть: шед срети их, якоже есть благо пред очима твоима.

⁵ И приидоша мужие ко Олоферну и возвестиша ему по словесем сим.

⁶ И сниде на поморие сам и сила его, и утверди стражею грады высокия и взя из них на споборение мужей избранных.

⁷ И прияша его тии и вся окрестная их с венцами и лики и тимпаны.

⁸ И разори вся пределы их, и дубравы их изсече. И бе заповедано ему истребити всех богов земли, яко да самому единому Навуходоносору послужат вси роди и вси языцы, и вся племена их да призывают его в Бога.

⁹ И прииде на лице Есдрилона близ Дотеи, яже есть противу великия пилы Иудеи,

¹⁰ и ополчися между Гаваем и Скифским градом, и бе тамо месяц дний, ко еже собрати всякий припас силы своея.