Библия на церковно-славянском языке - транслитерация современным русским алфавитом
(1751)

Книга Иудифь

◄◄ | ◄ | Глава ⚫ | ► | ►►

¹ И повеле ввести ю, идеже положени быша сосуди сребрянии его, и повеле уготовити ей от пищей устроеваемых себе и от вина своего пити.

² И рече Иудиф: не снем от них, да не будет соблазн, но от принесенных со мною мне подаваемо да будет.

³ И рече к ней Олоферн: аще же оскудеют сущая с тобою, откуду принесем тебе давати подобная сим? Несть бо с нами от рода твоего.

⁴ И рече Иудиф к нему: жива есть душа твоя, господине мой, яко не иждивет раба твоя сущих со мною, дондеже сотворит Господь рукою моею, яже устави.

⁵ И ведоша ю отроцы Олоферновы в шатер, и спа даже до полунощи: и воста о утренней стражи

⁶ и посла ко Олоферну, глаголющи: да повелит убо господин мой пущати рабу твою на молитву исходити.

⁷ И повеле Олоферн телохранителем не возбраняти ей. И пребысть в полку дни три: и исхождаше в нощи в дебрь Ветилуи и умывашеся во ополчении во источнице воды,

⁸ и яко взыде, моляшеся Господу Богу Израилеву, да управит путь ея ко возставлению сынов людий Своих:

⁹ и входящи чиста пребываше в шатре, донелиже приношаше пищу свою ко вечеру.

¹⁰ И бысть в день четвертый, сотвори Олоферн пир рабом своим единым, и не призва в послужение ни единаго от сущих при службах,

¹¹ и рече Вагою евнуху, иже бяше приставник над всеми сущими его: шед убо увещай жену Евреиню, яже есть у тебе, еже приити к нам и ясти и пити с нами:

¹² се бо, студно лицу нашему, аще жену сицевую оставим не беседовавше с нею, зане аще сея не призовем, посмеется нам.

¹³ И изыде Вагоа от лица Олофернова и вниде к ней и рече: да не обленится убо отроковица добрая сия, пришедши ко господину моему, прославитися пред лицем его и пити с нами в веселие вино и быти в день сей, яко дщи едина от сынов Ассуровых, яже предстоят в дому Навуходоносорове.

¹⁴ И рече к нему Иудиф: и кто есмь аз противоглаголющи господину моему? Зане все, еже будет пред очесы его угодно, потщавшися сотворю, и будет сие ми радование даже до дне смерти моея.

¹⁵ И воставши украсися одеянием и всяким украшением женским: и прииде раба ея и постла ей пред Олоферном долу ковры, ихже взя от Вагои ко повседневному употреблению своему, во еже ясти возлегшей на них:

¹⁶ и вшедши возлеже Иудиф. И изступи сердце Олоферново о ней, и подвижеся душа его: и бяше желателен зело, еже снитися с нею, и усмотреваше времене, еже обольстити ю, от негоже дне виде ю:

¹⁷ и рече к ней Олоферн: пий убо и буди с нами в веселии.

¹⁸ И рече Иудиф: буду убо пити, господине, яко возвеличися живот мой во мне днесь паче всех дний рождения моего.

¹⁹ И вземши яде и пи пред ним, яже уготова раба ея.

²⁰ И возвеселися Олоферн о ней и пи вина много зело, елико не пи никогдаже в день един, отнелиже родися.