Библия на церковно-славянском языке - транслитерация современным русским алфавитом
(1751)

Книга Иудифь

◄◄ | ◄ | Глава ⚫ | ► | ►►

¹ И бусть яко преста вопиющи ко Богу Израилеву и сконча вся глаголы сия,

² и воста от повержения и призва рабыню свою и сниде в дом, в немже пребываше во дни субботния и в праздники своя,

³ и сложи вретище, имже одевашеся, и совлече ризы вдовства своего, и обмы тело водою и помазася миром богатым, и разчеса власы главы своея и возложи увясло на ню и облечеся в ризы веселия своего, имиже одевашеся во дни живота мужа своего Манассии:

⁴ и взя сандалия на ноги своя, и обложи мониста и цепки, и перстни и усерязи и все украшение свое, и украсися зело на прельщение очес мужеских, елицы аще увидят ю:

⁵ и даде рабыни своей оплетен сосуд вина и чванец елеа, и мешец наполни мукою и плетеницы смоквами и хлебы чистыми, и обви вся сосуды своя, и возложи на ню.

⁶ И изыдосте ко вратом града Ветилуи и обретосте стоящих при них Озию и старцев града Хаврина и Хармина.

⁷ Якоже увидеша ю, и бе изменено лице ея, и ризу премененну ея, и удивишася о красоте ея попремногу зело и реша ей:

⁸ Бог, Бог отец наших да даст тя в благодать и совершит начинания твоя в величие сынов Израилевых и возвышение Иерусалима. И поклонися Богу

⁹ и рече к ним: повелите отверсти ми врата града, и изыду ко совершению словес, ихже глаголасте со мною. И повелеша юношам отверсти ей, якоже глаголаше.

¹⁰ И сотвориша тако. И изыде Иудиф сама и рабыня ея с нею: назираху же ю мужие града, дондеже сниде с горы, дондеже прейде юдоль, и ктому не увидеша ея.

¹¹ И идясте юдолию прямо. И срете ю первая стража Ассирийская,

¹² и взяша ю и вопросиша: от коих еси? И откуду грядеши? И камо идеши? И рече: дщи есмь Евреов и убегаю от лица их, яко имут предани быти вам на поглощение:

¹³ и аз гряду пред лице Олоферна вождоначалника силы вашея, еже возвестити глаголы истины, и покажу пред лицем его путь, по немуже пойдет и возобладает всею горнею, и не погибнет от мужей его плоть едина,ниже дух жизни.

¹⁴ Якоже услышаша мужие глаголы ея и усмотриша лице ея, и бяше пред ними чудна красотою зело, и реша к ней:

¹⁵ спасла еси душу твою, потщавшися снити пред лице господина нашего: и ныне приступи ко шатру его, и от нас проводят тя, дондеже предадут тя в руце его:

¹⁶ аще же станеши пред ним, да не убоишися сердцем твоим, но возвести по глаголом твоим, и благо тебе сотворит.

¹⁷ И избраша от себе мужей сто и присовокупиша ей и рабыни ея, и ведоша я ко шатру Олофернову.

¹⁸ И бысть стечение во всем ополчении, разгласися бо по шатром пришествие ея: и пришедше окружаху ю, яко стояше вне шатра Олофернова, дондеже возвестиша ему о ней.

¹⁹ И чудяхуся о красоте ея и удивляхуся сыном Израилевым о ней, и реша кийждо ко ближнему ссвему: кто презрит людий сих, иже имут у себе жен таковых? Яко не добро есть оставити из них мужа единаго, иже оставлени бывше возмогут прехитрити всю землю.

²⁰ И изыдоша спящии при Олоферне и вси служителие его и введоша ю в шатер.

²¹ И бе Олоферн опочивая на одре своем под завесою, яже бе от порфиры и злата и смарагда и камений многоценных втканных.

²² И возвестиша ему о ней, и изыде в предсение, и лампады сребряныя предидяху ему.

²³ Егда же прииде пред лице его Иудиф и слуг его, дивишася вси о красоте лица ея. И падши на лице поклонися ему: и воздвигоша ю раби его.